عىلىم مىقتى بولسا، مەملەكەت تە قۋاتتى بولادى - قاسىم- جومارت توقايەۆ

  استانا. KAZINFORM - عالىمدار وتانىمىزدىڭ عىلىمي- تەحنيكالىق دامۋ كوشىن باستاۋى كەرەك. سەبەبى، عىلىم مىقتى بولسا، مەملەكەت تە قۋاتتى بولادى.

بۇل تۋرالى پرەزيدەنت قاسىم-جومارت توقايەۆ عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ايتتى، دەپ حابارلايدى اقوردانىڭ باسپا ءسوز قىزمەتى.

«عىلىمدى دامىتۋ - ەلىمىز ءۇشىن ستراتەگيالىق ماڭىزى بار باسىمدىق. اسىرەسە دارىندى، قابىلەتتى جاستاردىڭ عىلىممەن اينالىسۋىنا جاعداي جاساۋ وتە ماڭىزدى.

جاسامپازدىق، جاڭاشىلدىق، ءبىلىمپازدىق جانە عىلىمعا قۇشتارلىق - ناعىز وزىق ەلگە كەرەك باستى قاسيەتتەر. مەن اتىراۋدا وتكەن ۇلتتىق قۇرىلتاي وتىرىسىندا وسى ماسەلەگە ارنايى توقتالدىم. ءبىز تۇتاس قوعام بولىپ عىلىمدى جان-جاقتى ناسيحاتتاۋعا كۇش سالۋىمىز كەرەك. عىلىمعا قىزىعۋشىلىقتى مەكتەپتەن باستاپ وياتقان ءجون. تۇتاس قوعام بولىپ عىلىم-ءبىلىمدى دارىپتەۋىمىز كەرەك. قاجەت بولسا، ارنايى قۇجاتتى دايىندايمىز. عىلىم جانە جوعارى ءبىلىم مينيسترىنە وسى ماسەلەنى پىسىقتاۋدى تاپسىرامىن.

قازىر پارلامەنتتە «عىلىم جانە تەحنولوگيالىق ساياسات تۋرالى» زاڭ جوباسى تالقىلانىپ جاتىر. بۇل زاڭ عىلىمنىڭ دامۋىنا زور سەرپىن بەرەدى دەپ سەنەمىن. جالپى ءبىلىم مەن عىلىمعا وزىق حالىقارالىق تاجىريبە اۋاداي قاجەت»، - دەدى پرەزيدەنت.

سونداي- اق، مەملەكەت باسشىسى عالىمدار ويلاپ تاپقان جوبالاردىڭ يگىلىگىن بۇكىل ەلىمىز كورۋى كەرەك ەكەنىن ايتتى.

«سىزدەر الەمنىڭ ۇزدىك عىلىمي ورتالىقتارىندا بولىپ، تاجىريبە جيناقتاپ جۇرسىزدەر. كەزىندە حالقىمىزدىڭ كورنەكتى تۇلعالارى مەن قايراتكەرلەرىنىڭ دە اعارتۋشىلىقپەن اينالىسقانى تەگىن ەمەس.

قازىر جاس عالىمداردىڭ زامانى تۋدى. سىزدەر ۇسىنعان، ويلاپ تاپقان جوبالاردىڭ يگىلىگىن بۇكىل ەلىمىز كورۋى كەرەك. ءبىر سوزبەن، سىزدەر سياقتى عالىمدار وتانىمىزدىڭ عىلىمي-تەحنيكالىق دامۋ كوشىن باستاۋى كەرەك. سەبەبى، عىلىم مىقتى بولسا، مەملەكەت تە قۋاتتى بولادى. عىلىمسىز ەل قۇردىمعا كەتەدى. ال عىلىمى وزىق ەل كەز كەلگەن داعدارىستى ەڭسەرە الادى. عىلىم وركەندەسە، ەكونوميكا دا وركەندەيدى. ياعني حالىقتىڭ ءال-اۋقاتى ارتادى.

تۇپتەپ كەلگەندە، عىلىم ازاماتتاردىڭ تۇرمىسىن - ساپالى، بولاشاعىن - جارقىن ەتۋگە ءتيىس. «ادىلەتتى قازاقستان - ادال ازامات - وزىق ويلى ۇلت» بولامىز دەسەك، وسى ماقساتتى جۇزەگە اسىرۋىمىز كەرەك. مەملەكەت پەن عىلىمي قاۋىمداستىق بۇل جۇمىستى جۇمىلا اتقارادى دەپ سەنەمىن»، - دەدى مەملەكەت باسشىسى.

ودان بولەك، قاسىم-جومارت توقايەۆ قازىر ەل بىرلىگى، مامانداردىڭ كاسىبيلىگى سىنعا ءتۇسىپ جاتقانىن اتاپ ءوتتى.

«اشىعىن ايتساق، ەلىمىزدە كوپ جىل بويى قوردالانعان ماسەلە ءالى دە از ەمەس، ءتۇرلى سالاداعى تۇيتكىلدەر شەشىلمەدى. سونىڭ سالدارىن ەندى كورىپ جاتىرمىز.

قالاي دەسەك تە، الدىمىزدا - ءبىر عانا جول بار. ءبىز بارلىق ماسەلەنى مىندەتتى تۇردە شەشۋىمىز قاجەت. بۇل - زاماننىڭ دا، حالىقتىڭ دا تالابى. جۇيەلى جۇمىس ىستەسەك، بارلىعى ورنىنا كەلەدى دەپ ويلايمىن. ءدال ءقازىر جاسالعان ءىس- ارەكەتتىڭ يگىلىگىن ەرتەڭ كەيىنگى ۇرپاق كورەدى. سوندىقتان بىزگە زور جاۋاپكەرشىلىك جۇكتەلىپ وتىر. ءبارىمىز ءبىر جاعادان باس، ءبىر جەڭنەن قول شىعارىپ ادال ەڭبەك ەتۋىمىز كەرەك.

حالقىمىز بۇدان دا كۇردەلى كەزەڭدەردى ەڭسەرگەن. ءبارىن بەرەكەلى بىرلىكتىڭ ارقاسىندا جەڭە بىلگەن. قازىرگى جاۋاپتى ساتتە دە مىزعىماس ىنتىماعىمىز ايقىن كورىنىپ وتىر. وسى اۋىزبىرشىلىگىمىزدەن ايىرماسىن، بارلىعىن دا ەڭسەرەمىز.

قازاق «جاماندىق كورمەي، جاقسىلىق بولماس» دەيدى. ەلدىڭ بىرلىگى دە، مامانداردىڭ كاسىبي دەڭگەيى دە وسىنداي سىن ساعاتتا شىڭدالادى. قازىر مىڭداعان مەملەكەتتىك قىزمەتشى قۇتقارۋشىلارمەن، ۆولونتەرلەرمەن بىرگە كۇندىز-ءتۇنى جۇمىس ىستەپ جاتىر. ولار اپاتتىڭ الدىن الۋ، ادامداردى قۇتقارۋ جانە تاسقىننىڭ سالدارىن جويۋ ءۇشىن ەڭبەك ەتىپ ءجۇر. ءار ازاماتتىڭ شىنايى وتانشىلدىعى ناقتى ءىس جۇزىندە بايقالىپ جاتىر. حالىققا قىزمەت ەتۋ - پارىز. ال قيىن-قىستاۋ ساتتە تۋعان ەل ءۇشىن ادال قىزمەت ەتۋ - قاسيەتتى بورىش»، - دەپ ءتۇيدى ءسوزىن ق ر پرەزيدەنتى.