عىلىم جانە جوعارى ءبىلىم مينيسترلىگى مەن Huawei ءوزارا تۇسىنىستىك تۋرالى مەموراندۋمعا قول قويدى
استانا. KAZINFORM - قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن Huawei ءوزارا تۇسىنىستىك تۋرالى مەموراندۋمعا قول قويدى.
مەموراندۋمعا قول قويۋ ق ر عىلىم جانە جوعارى ءبىلىم ءمينيسترى ساياسات نۇربەك باستاعان قازاقستان دەلەگاتسياسىنىڭ قىتايعا رەسمي ساپارى اياسىندا ءوتتى. ساپار كەزىندە دەلەگاتسيا Huawei باسشىلىعىمەن كەزدەستى، كومپانيانىڭ ماڭىزدى نىساندارىن ارالادى جانە ارى قارايعى ىنتىماقتاستىق پەرسپەكتيۆالارىن تالقىلادى.
Huawei- ءدىڭ شەنچجەندەگى شتاب-پاتەرىندە قازاقستان دەلەگاتسياسى كومپانيانىڭ وزىق يننوۆاتسيالارىمەن، سونىڭ ىشىندە تسيفرلىق سىنىپتارعا ارنالعان يننوۆاتسيالىق شەشىمدەرى مەن بۇلتتىق پلاتفورمالارىمەن تانىستى. ساپار بارىسىندا دەلەگاتسيا كومپانيانىڭ زاماناۋي تەحنولوگيالارىن زەرتتەپ، Huawei- ءدىڭ يننوۆاتسيالىق شەشىمدەرى كورسەتىلگەن كورمە زالىن، Huawei Cloud دەرەكتەردى وڭدەۋ ورتالىعىن جانە دۋنگۋانداعى HUAWEI زەرتتەۋ جانە ازىرلەۋ ورتالىعىن ارالادى. ەرەكشە نازار Smart Classroom - سيفرلىق سىنىپتاردىڭ زاماناۋي تۇجىرىمداماسىن تانىستىرۋعا ءبولىندى.
سونىمەن قاتار Huawei ۆيتسە-رەزيدەنتى لي سزيۋنفەن جانە Huawei Kazakhstan باس ديرەكتورى ماكس چجاومەن جوعارى دەڭگەيدەگى كەزدەسۋ وتكىزدى. بۇل باسقوسۋدا ىنتىماقتاستىقتىڭ ودان ءارى پەرسپەكتيۆالارى مەن سەرىكتەستىك قاتىناستاردى دامىتۋداعى نەگىزگى باعىتتار تالقىلاندى. ساپاردىڭ شارىقتاۋ شەگى - قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى مەن Huawei اراسىندا ءوزارا تۇسىنىستىك تۋرالى مەموراندۋمعا سالتاناتتى تۇردە قول قويىلۋى بولدى.
«Huawei قازاقستانداعى اكت سالاسىنداعى تالانتتاردى دامىتۋعا ۇلەسىن قوسۋدى جالعاستىرادى. سونىمەن قاتار ءبىز عىلىم جانە جوعارى ءبىلىم مينيسترلىگىمەن جانە ۋنيۆەرسيتەتتەرمەن اقىلدى سىنىپتار مەن اقىلدى كامپۋستار سالاسىندا ىنتىماقتاستىقتى باستاعانىمىزعا قۋانىشتىمىز. ءبىزدىڭ ماقساتىمىز - قازاقستانداعى ءبىلىم بەرۋدى تسيفرلاندىرۋعا ىقپال ەتۋ»، - دەپ مالىمدەدى Huawei Kazakhstan كومپانياسىنىڭ باس ديرەكتورى ماكس چجاو.
مەموراندۋم اياسىندا 2025-جىلى اقىلدى سىنىپتاردىڭ پيلوتتىق جوبالارى جۇزەگە اسىرىلادى. ىنتىماقتاستىق تۋرالى كەلىسىم ەڭ ۇزدىك ستۋدەنتتەرگە Huawei دە تاعىلىمدامادان ءوتۋ جانە حالىقارالىق بايقاۋلارعا قاتىسۋ سياقتى بىرەگەي مۇمكىندىكتەر بەرەدى. سونداي-اق كومپانيا جۇمىسقا ورنالاسۋعا جاردەمدەسۋ جانە تۇلەكتەردى ەلدىڭ سيفرلىق ەكونوميكاسىنا ءساتتى ينتەگراتسيالاۋ ماقساتىندا جۇمىس جارمەڭكەلەرىن ۇيىمداستىرادى.
Huawei-مەن ىنتىماقتاستىق جاڭا بۋىن ماماندارىن دايىنداۋعا، سونىمەن قاتار قازاقستاننىڭ سيفرلىق ەكونوميكا سالاسىنداعى حالىقارالىق ۇستانىمىن نىعايتۋعا نەگىز بولادى. بۇل قادام ءبىلىم دەڭگەيىن ارتتىرۋعا جانە باسەكەگە قابىلەتتى ءبىلىم ەكونوميكاسىن قۇرۋعا باعىتتالعان مەملەكەتتىك سيفرلاندىرۋ ستراتەگياسىن جۇزەگە اسىرۋدىڭ ماڭىزدى بۋىنى سانالادى. جوبا قازاقستاننىڭ وزىق تەحنولوگيالار مەن اكت سالاسىنداعى زاماناۋي داعدىلاردى دامىتۋعا بەيىلدىلىگىن ايقىن كورسەتەدى، بۇل ەلدىڭ سيفرلىق ترانسفورماتسياسىنىڭ تابىستى بولۋىنداعى نەگىزگى فاكتورعا اينالىپ وتىر.
