ءى ءى م قازاقستاندىق قىلمىسكەرلەردىڭ قانداي ەلدەردە تابىلعانىن ايتتى

استانا. KAZINFORM - قازاقستان ءى ءى م ينتەرپول ۇلتتىق ورتالىق بيۋروسى ارقىلى ەلىمىزدىڭ قۇقىق قورعاۋ جانە ۋاكىلەتتى ورگاندارىنىڭ باستاماسىمەن حالىقارالىق ىزدەۋدە جۇرگەن 110-نان استام قىلمىسكەر مەن جوعالىپ كەتكەن ازاماتتار تابىلدى، دەپ حابارلايدى Polisia.kz.

2024 -جىلى ينتەرپولدىڭ بايلانىس ارنالارىنىڭ گەوگرافياسى كەڭەيتىلدى. ىزدەۋدە جۇرگەندەر رەسەي، تۇركيا، ب ا ءا، قىتاي، وڭتۇستىك كورەيا، پولشا، ا ق ش، گرۋزيا، ارمەنيا، ازەربايجان، يسپانيا، ۇلى بريتانيا، چەحيا، شۆەتسيا، ۋكراينا، گەرمانيا، كولۋمبيا، يزرايل، بەلگيا، گرەتسيا، يتاليا، دومينيكان رەسپۋبليكاسى، ليتۆا، قىرعىزستان، وزبەكستان ەلدەرىندە انىقتالىپ، قۇرىقتالدى.

- قىلمىسكەرلەر كوبىنەسە الاياقتىق، بوتەن مۇلىكتى تالان- تاراجعا سالۋ جانە ىسىراپ ەتۋ، ەسىرتكىمەن بايلانىستى قىلمىستار، سىبايلاس جەمقورلىق، قاراقشىلىق، ەكونوميكالىق كونتراباندا، زاڭسىز ويىن بيزنەسى مەن سالىق تولەۋدەن جالتارۋ سياقتى ەكونوميكالىق قىلمىستار جانە ۇرلىق ءۇشىن ىزدەۋدە بولعان، - دەپ جازدى ءىىم باسپا ءسوز قىزمەتىنەن.