ءى ءى م: قاۋىپتى پرانكتەر - ونەر ەمەس، زاڭ بۇزۋشىلىق

استانا. KAZINFORM - ىشكى ىستەر مينيسترلىگى الەۋمەتتىك جەلىلەردە پرانك پەن ەكسترەمالدى ارەكەتتەردى بەينەلەيتىن ۆيدەولار تۇسىرەتىن ازاماتتارعا ۇندەۋ جاسادى، دەپ حابارلايدى Polisia.kz.

- قۇرمەتتى ازاماتتار! سوڭعى ۋاقىتتا ينتەرنەتتە پرانك پەن قاۋىپتى تريۋكتەردى كورسەتەتىن ۆيدەولار جيىلەپ كەتتى. بۇل «حايپ» پەن «قارالىم قۋعان» ارەكەتتەر ءازىل شەڭبەرىنەن اسىپ، قوعامدىق ءتارتىپ پەن ازاماتتاردىڭ قاۋىپسىزدىگىنە قاۋىپ توندىرۋدە، - دەدى ءى ءى م رەسمي وكىلى شىڭعىس الەكەشيەۆ.

مينيسترلىك اگرەسسيا، ارانداتۋ، زورلىق-زومبىلىق ەلەمەنتتەرى بار كونتەنتكە جول بەرىلمەيتىنىن جانە مۇنداي ارەكەتتەر ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانىن ەسكەرتتى.

2025-جىلدىڭ باسىنان بەرى وسىنداي پرانكتەرگە بايلانىستى 24 ادام اكىمشىلىك جاۋاپقا تارتىلعان. ماسەلەن:

استانادا بلوگەرلەر ليفت ىشىندە ء«مايىت» تاسىپ، بالتامەن شابۋىل جاساعان كورىنىس ۇيىمداستىرعان. بۇل ارەكەت جولاۋشىلاردىڭ ۇرەيىن ۇشىرىپ، ناتيجەسىندە قاتىسۋشىلار 15-30 تاۋلىككە اكىمشىلىك قاماۋعا الىنعان.

الماتى وبلىسىندا ەكسترەمالدى ۆيدەو تۇسىرمەك بولعان جاس جىگىت جولدا كەلە جاتقان كولىكتىڭ ۇستىنەن سەكىرىپ، اۋىر جاراقات سالدارىنان كوز جۇمعان.

ءى ءى م بۇل ارەكەتتەردىڭ قوعامدىق مورالعا ساي كەلمەيتىنىن، ادامدارعا پسيحولوگيالىق زاقىم كەلتىرەتىنىن جانە ورىنداۋشىلاردىڭ ءوز ومىرىنە دە قاۋىپ توندىرەتىنىن اتاپ ءوتتى.

- بلوگەرلىك پەن كامەراعا ءتۇسىرۋ قۇقىق بۇزۋعا سىلتاۋ بولماۋى ءتيىس. قاتىگەز پرانكتەر - بۇل ونەر ەمەس، زاڭ بۇزۋشىلىق. بەينە تۇسىرمەس بۇرىن ونىڭ سالدارىن وي ەلەگىنەن وتكىزىڭىز. ومىردە دە، ينتەرنەتتە دە وزگەلەردىڭ قۇقىعى مەن قاۋىپسىزدىگىنە قۇرمەتپەن قاراڭىز، - دەدى ءى ءى م وكىلى.

مينيسترلىك ازاماتتاردى زاڭدى ساقتاۋعا جانە قوعامعا ءقاۋىپ توندىرەتىن ارەكەتتەردەن اۋلاق بولۋعا شاقىرادى.

بۇعان دەيىن استانادا پرانك جاساعان بلوگەرلەر قاماۋعا الىنعانىن جازعانبىز.