ءوز-وزىڭە دياگنوز قويۋ: ينتەرنەتتەن اۋرۋ تۋرالى اقپارات ىزدەگەندە اباي بولۋ كەرەك

ينتەرنەت - كوپتەگەن ادام ءۇشىن العاشقى كەڭەسشى. الايدا، دارىگەرلەر ينتەرنەتتەگى مەديتسينالىق اقپاراتقا سەنە بەرۋگە بولمايتىنىن ەسكەرتەدى. اسىرەسە جاساندى ينتەللەكت (ج ي) كەڭ تارالىپ جاتقان قازىرگى زاماندا بۇل ماسەلە بۇرىنعىدان دا وزەكتى بولا ءتۇستى. بۇل تۋرالى euronews.com جازدى.

اقپارات كوزىنە ءمان بەرىڭىز

دۇرىس سايتتاردان الىنعان اقپارات ادامعا ءوز بەلگىلەرىن ءتۇسىنىپ، دارىگەرگە بارۋعا دايىندالۋعا كومەكتەسەدى. ءبىراق سەنىمسىز دەرەككوزدەردەن الىنعان مالىمەت مازاسىزدىقتى كۇشەيتىپ، جاعدايدى ۋشىقتىرۋى مۇمكىن.

دارىگەرلەردىڭ ايتۋىنشا، Google ارقىلى ىزدەۋ كەزىندە ءبىرىنشى شىققان سىلتەمەنى باسۋعا اسىقپاعان ءجون. كوپتەگەن كومپانيالار ءوز سايتتارىن جارناما ارقىلى ناتيجەلەردىڭ جوعارعى جاعىنا شىعارادى. مۇنداي سىلتەمەلەر «سپونسورلىق» رەتىندە بەلگىلەنۋى مۇمكىن.

سەنىمدى اقپارات كوزدەرىنە ەۋروپالىق اۋرۋلاردىڭ الدىن الۋ جانە باقىلاۋ ورتالىعى (ECDC)، ۇلتتىق دەنساۋلىق ساقتاۋ قىزمەتتەرى نەمەسە مەملەكەتتىك مەديتسينالىق ۇيىمداردىڭ سايتتارى جاتادى.

ج ي بەرگەن جاۋاپتار كۇماندى بولۋى مۇمكىن

قازىر كوپتەگەن ادام مەديتسينالىق سۇراقتارعا ج ي ارقىلى جىلدام جاۋاپ الۋعا تىرىسادى. الايدا ج ي بەرەتىن اقپاراتتىڭ قايدان الىنعانى ءجيى كورسەتىلمەيدى. بۇل ونىڭ شىنايىلىعىنا كۇمان تۋدىرادى.

سالا ماماندارى «گالليۋتسيناتسيا» دەپ اتايتىن قۇبىلىس - ج ي ويدان شىعارىپ اقپارات بەرۋى دە ءجيى كەزدەسەدى. ەگەر دەرەككوز كورسەتىلمەسە، اسا ساق بولىڭىز.

سۇراعىڭىزدى دۇرىس قويىڭىز

Cleveland Clinic دارىگەرى ەريك بۋسستىڭ ايتۋىنشا، دۇرىس سۇراق قويا ءبىلۋ - دۇرىس جاۋاپتىڭ كىلتى. مىسالى، «تەرى استىندا ءتۇيىن نە سەبەپتى پايدا بولادى؟» دەگەن ساۋال «بۇل ءتۇيىن قاتەرلى ىسىك پە؟» دەگەن سۇراقتان اناعۇرلىم ءتيىمدى.

بىردەن دياگنوز قويۋعا تىرىسۋ ادامدى بالاما سەبەپتەردەن اداستىرىپ، جالعان قورىتىندى جاساۋعا اكەلۋى مۇمكىن. سوندىقتان ناقتى سيمپتومدارعا نەگىزدەلگەن ىزدەۋ جۇرگىزىڭىز.

كەي جاعدايدا مۇلدە ىزدەمەۋ كەرەك

كەۋدە اۋىرسا، باس اينالسا نەمەسە ينسۋلت بەلگىلەرى سياقتى شۇعىل جاعدايلاردا ينتەرنەتكە جۇگىنبەي، بىردەن جەدەل مەديتسينالىق كومەككە جۇگىنۋ قاجەت.

Brown ۋنيۆەرسيتەتىنىڭ جەدەل مەديتسينالىق ورتالىعىنىڭ ديرەكتورى وليۆە گەراردي: «مۇنداي جاعدايدا ۋاقىتتى جوعالتۋ قاۋىپتى. اۋرۋ ەرتە انىقتالسا - ناتيجەلى ەمدەلەدى» دەيدى.

ناقتى جاۋاپ بەرەتىن - دارىگەر

امەريكالىق وتباسىلىق دارىگەرلەر اكادەمياسىنىڭ مۇشەسى سارا سەمس: «كوپتەگەن بەلگى جەڭىل اۋرۋ مەن اۋىر دەرتتىڭ ارالىعىندا بولۋى مۇمكىن. مىسالى، زاردەگى قان قاتەرلى ىسىكتى دە، بۇيرەك تاستارىن نەمەسە ينفەكتسيانى دا ءبىلدىرۋى مۇمكىن» دەپ ەسكەرتەدى.

سول سەكىلدى، كەنەتتەن سالماق جوعالتۋ - قاتەرلى ىسىكتىڭ بەلگىسى دە بولۋى ىقتيمال، ءبىراق ول قالقانشا بەزىنىڭ بەلسەندىلىگىمەن نەمەسە فيزيكالىق بەلسەندىلىكتىڭ ارتۋىمەن دە بايلانىستى بولۋى مۇمكىن.

ينتەرنەت - اقپارات الۋ قۇرالى، ءبىراق ول دارىگەردىڭ ورنىن باسا المايدى. ءوز- وزىڭىزگە دياگنوز قويماس بۇرىن، دەرەككوزدىڭ سەنىمدىلىگىنە كوز جەتكىزىڭىز. ەڭ دۇرىسى - سيمپتومدارىڭىزدى جازىپ الىپ، ارنايى مامانعا جۇگىنۋ.