ءوز مىندەتىن ورىندامايتىن اتا-انالار كوبەيىپ كەلەدى - كوميتەت
استانا. KAZINFORM - قازاقستاندا اتا-انالىق مىندەتتەردى تيىسىنشە ورىنداماۋعا بايلانىستى اكىمشىلىك قۇقىقبۇزۋشىلىقتار ارتىپ كەلەدى. سوڭعى 5 جىلدا مۇنداي جاعدايلار 3,5 ەسە كوبەيگەن. بۇل تۋرالى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا ايتىپ بەردى.
اتا-انالىق مىندەتتى تيىسىنشە ورىنداماۋعا بايلانىستى اكىمشىلىك قۇقىقبۇزۋشىلىق بويىنشا 2020-جىلى 5 مىڭ جاعداي تىركەلسە، 2024-جىلى بۇل كورسەتكىش 19 مىڭعا دەيىن جەتكەن. سونداي-اق 5 جىلدا كامەلەتكە تولماعانداردىڭ تۇنگى ۋاقىتتا ەرەسەكتەردىڭ قاراۋىنسىز ۇيدەن تىس جەردە جۇرەتىن قۇقىقبۇزۋشىلىقتار 2 ەسە - 2020-جىلعى 65 مىڭ جاعدايدان 2024-جىلى 112 مىڭ جاعدايعا دەيىن كوبەيگەن.
- بالالاردىڭ تۇنگى ۋاقىتتا ويىن-ساۋىق ورىندارىندا بولۋ فاكتىلەرى دە 844 جاعدايدان 2406 جاعدايعا دەيىن 3 ەسەگە جۋىق كوبەيگەن. بۇل مالىمەتتەر ەرەكشە نازار اۋدارۋدى تالاپ ەتەدى. كۇن جىلىنعاندا تەرەزەدەن قۇلاۋ، سۋعا باتۋ جانە بالالارعا قاتىستى باسقا دا وقىس وقيعالار كوبەيەدى. تالداۋ كورسەتكەندەي، تەرەزەدەن قۇلاۋدىڭ شامامەن %80 ىندا 2-5 جاس ارالىعىنداعى بالالار زارداپ شەگەدى. سۋعا باتۋ جاعدايلارىنىڭ دا %90 ىندا بالالار ەرەسەكتەردىڭ ءتيىستى باقىلاۋىنسىز سۋ جاعاسىندا جۇرگەن. سونداي-اق، بالالار تۇرمىستىق جاراقات الۋ، جول-كولىك وقيعالارى مەن ءورت سالدارىنان دا قۇربان بولىپ وتىر، - دەدى ن. وسپانوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ايتا كەتەيىك، 2025-جىلدىڭ 1-قىركۇيەگىنەن باستاپ، «دوسبولlike» بۋللينگكە قارسى جوباسى ەلىمىزدىڭ بارلىق مەكتەپتەرى مەن كوللەدجدەرىنە ەنگىزىلەدى.
سونداي-اق، ەلىمىزدىڭ بارلىق وڭىرىندە بالالار مەن اتا-انالارعا كاسىبي كومەك كورسەتەتىن پسيحولوگيالىق قولداۋ ورتالىقتارى اشىلدى. وندا شامامەن 250 مىڭ ادام كومەك الدى.
