ءورت سوندىرۋشىلەر جاڭا جىل ءتۇنى قالاي قىزمەت اتقارادى
اقتوبە قالاسىنداعى №4-ءورت ءسوندىرۋ ءبولىمى جاڭا جىل ءتۇنى كۇشەيتىلگەن تارتىپتە جۇمىس ىستەدى. بارلىعى ءتورت ەسەپتوپ جۇمىسقا شىعىپ، قالانىڭ بىرنەشە شاعىن اۋدانىنداعى قاۋىپسىزدىكتى باقىلادى. Kazinform ءتىلشىسى مەرەكەدە جۇمىس ىستەگەن ءورت سوندىرۋشىلەرمەن كەزدەسىپ كەلدى.
جاڭا جىلدا ەشكىم ۇيىنە سۇرانىپ كەتپەيدى - اسلان قوجاگەلدين
جاڭا جىل ءتۇنى №4-ءورت ءسوندىرۋ ءبولىمى باستىعىنىڭ ورىنباسارى اسلان قوجاگەلدين كەزەكشىلىككە ءتۇستى. ول جەكە قۇرامنىڭ جۇمىسىن باقىلاپ، قاداعالاپ وتىردى. بارلىعى 20 عا جۋىق قىزمەتكەر كەزەكشىلىك اتقاردى. مۇنداعى جۇمىس 31-جەلتوقسان كۇنى عانا ەمەس، بالالاردىڭ جاڭا جىلدىق ەرتەڭگىلىكتەرى كەزىندە دە قاربالاسقا تولى بولدى. سەبەبى بەكىتىلگەن اۋماقتا سپورت، مادەنيەت وشاقتارى بار. ونداعى مەرەكەلىك شارانىڭ بارىندە ءورت سوندىرۋشىلەر باقىلاۋ جۇمىسىن جۇرگىزەدى.
- ءبىزدىڭ ءبولىم اقتوبە قالاسىنداعى باتىس-2، 8-شاعىن اۋدان مەن جاڭاقونىستى، وڭتۇستىك- باتىستى قارايدى. وسى اۋماققا جاۋاپتىمىز. ءوزىم 2015 -جىلدان بەرى وسى سالادا جۇمىس ىستەپ ءجۇرمىن. الدىمەن جۇرگىزۋشى بولدىم. كەيىن قاراۋىل باستىعىنا كوتەرىلىپ، قازىر ءبولىم باستىعىنىڭ ورىنباسارى قىزمەتىن اتقارىپ ءجۇرمىن. نەگىزى بالا كۇنگى ارمانىم دەپ تە ايتۋعا بولادى. جوعارى وقۋ ورنىنىڭ ديپلومىن العان سوڭ ءۇش اي كۋرس وقىپ، سەرتيفيكات الۋعا، وفيتسەر قۇرامىنا ەنۋگە مۇمكىندىك بولدى. سول مۇمكىندىكتى قالت جىبەرمەدىم، - دەدى اسلان قوجاگەلدين.
ءورت ءسوندىرۋشىنىڭ بويىنان تابىلۋى ءتيىس قاسيەتتىڭ ءبارىن بويعا جيعان مامان ۇرەي مەن قورقىنىشتى جەڭۋ ماڭىزدى ەكەنىن ايتىپ بەردى. الدىڭدا كومەك سۇراپ تۇرعان ادامدى كورگەندە ءبارى ۇمىتىلىپ، شۇعىل شەشىم قابىلدايتىن قاسيەتكە يە قىزمەتكەر قوعامنىڭ دا كوزقاراسى وڭ ەكەنىن جاسىرمايدى. بۇل دا بولسا ولارعا ۇلكەن دەمەۋ.
- قانشاما ءورت بولىپ، قىزمەتكەرلەرىمىز باقيلىق بولىپ كەتىپ جاتىر. قازىر قوعامنىڭ پىكىرى جاقسى. جاقسى قارسى الادى، باعالايدى. ينتەرنەتتە دە جاقسى كوممەنتاري جازىلىپ جاتادى. ول ەندى ءوزىمىزدىڭ جۇمىسىمىزدىڭ جەمىسى دەپ ويلايمىن. قانشاما ادام قۇتقارىلدى، قار قۇرساۋىنان شىقتى، سۋ تاسقىنىندا امان قالدى، - دەدى ول.
ءورت سوندىرۋشىلەردىڭ كۇن ءتارتىبى جازۋدى. ولار سول تالاپپەن تاڭەرتەڭ كەزەكشىلىكتى قابىلداپ الىپ، قۇجاتتارىنا، كيىمدەرىنە تەكسەرۋ جۇرگىزىلەدى. كەيىن تەوريالىق بىلىكتىلىگىن ارتتىرىپ، تۇستەن كەيىن قۇرال- جابدىقتاردىڭ جاراقتىلىعىن قايتا ءبىر تەكسەرىپ، ازىرلەيدى. ال شاقىرۋ بولسا، بىردەن اتتانىپ، جينالۋىنا 2-3 مينۋت قانا ۋاقىت بەرىلەدى. كەلگەن سوڭ تەحنيكا جۋىلادى، كيىمدەرى كەپتىرىلەدى. تەوريالىق ساباق ءارى قاراي جالعاسادى.
- جاڭا جىلدا ءجيى كەزەكشىلىككە تۇسەمىز. مەن جاۋاپتى تۇلعا بولىپ ءتۇستىم وسى جولى. جاقىندارىمدى جاڭا جىل مەرەكەسى وتكەن سوڭ قۇتتىقتايمىن. ون جىلداي قىزمەت ەتتىم. سونىڭ بەس جىلىن جاڭا جىلدى بولىمدە قارسى الدىم. حالىق تويلاپ جاتادى. ءبىز كۇشەيتىلگەن نۇسقادا ەڭبەك ەتەمىز، قاۋىپسىز تويلاۋىنا مۇمكىندىك جاسايمىز. ال شاقىرتۋ بولماسا كىشىگىرىم داستارقان جايىپ، تىلەگىمىزدى ايتامىز. تۇسكى اسقا، كەشكى اسقا جينالامىز. سۇرانسا جىبەرمەيمىز. وتباسىندا جاقىنى كوز جۇمسا عانا جىبەرىلەدى. ال مەرەكەگە وراي بوساتىلمايدى، - دەدى اسلان قوجاگەلدين.
ادام ءومىرى بارىنەن قىمبات - نۇربول ابديگاپپاروۆ
اقتوبە قالاسى №4-ءورت ءسوندىرۋ ءبولىمىنىڭ قاراۋىل باستىعى نۇربول ابدىعاپپاروۆ بولسا بۇعان دەيىن حرومتاۋ اۋدانىندا جۇمىس ىستەپ، كەيىن وبلىس ورتالىعىنا اۋىسقان. ول قازىرگى كەزدە 13 قىزمەتكەرىنە جاۋاپتى. اۋىسىمدى قابىلداپ العان سوڭ كۇن ءتارتىبى بويىنشا ءورت تاكتيكاسى، ءورت نورماتيۆتەرىن وقىتادى. كەيىن پراكتيكالىق ساباققا اۋىسىپ، تۇستەن كەيىن تەحنيكاعا كۇتىم جاسايدى، تازالايدى. سونىمەن بىرگە ۇلكەن نىسانداردىڭ، عيراتتاردىڭ سىزباسىن قاراپ، جاتتىعادى.
- شەشۋشى ۋاقىتتىڭ بەس پرينتسيپى بار. كۇندەلىكتى ساباقتا سونى ايتامىز. بىرىنشىدەن، ادام ءومىرىن قۇتقارۋ. ەكىنشىدەن، جارىلىستىڭ الدىن الۋ. ءورتتى سوندىرمەس بۇرىس وسى ەكەۋىن ىستەمىز. سودان كەيىن عانا ءسوندىرۋ جۇمىستارىن جۇرگىزەمىز. ىشكە كەلگەن سوڭ پايدالانعان قۇرال- سايماندى تازا ۇستايمىز، كەلەسى شىعۋ دايىنداپ قويامىز. ءوزىم بۇعان دەيىن حرومتاۋ اۋدانىندا جۇمىس ىستەدىم. بوران كۇنى جۇكتى ايەل جەدەل جاردەم شاقىرىپ، جولعا شىققان. ءسويتىپ جولدا قالىپ قويعان. ءبىز شاقىرتۋعا تريكولمەن شىقتىق. جۇكتى ايەل كولىكتە بوساندى. ونى اۋدانعا جەتكىزدىك. ال قالاداعى وقيعاعا كەلەر بولساق، ءا. مولداعۇلوۆا داڭعىلىنداعى ءۇيدىڭ ءۇشىنشى قاباتىن ءورت بالكونىنان باستاپ تارادى. سول كەزدە ءبىرىنشى بارىپ، راتسيا ارقىلى قوسىمشا كومەك سۇرادىم. بالالاردى ىشكە كىرگىزدىم، اۆتوباسپالداقپەن قۇتقارۋ جۇمىستارىن جۇرگىزۋگە بۇيرىق بەردىم. سونىمەن بىرگە باتىس - 2-شاعىن اۋدانىنداعى №14-ۇيدە ءورت بولدى. قۇتقارۋ جۇمىستارىن جۇرگىزگەندە كوزىمدى جۇمىپ جۇرگەندەي بولدىم، ەشتەڭە كورىنبەدى. باسپالدىقپەن كوتەرىلگەندە تۇنشىعىپ جاتقان داۋىس ەستىلدى. بالا مەن ايەل جەردە جاتتى. قازىر ايەلدى قۇتقارسام، بالا شىداماي قالادى دەپ ويلادىم. ەڭ ءبىرىنشى بالانى الىپ كەتتىم. سوسىن بارىپ اناسىن شىعارىپ، جەدەل جاردەمگە تابىستادىق. كەيىن امان ەكەنىن ەستىدىم، - دەدى ول.
نۇربول ابدىعاپپاروۆتىڭ ايتۋىنشا، ماڭىزدىسى ادامدى دارىگەرلەر قولىنا امان تاپسىرۋ.
بالالارىم ماقتان ەتەدى - ەرجان تۇرتايەۆ
№4 ءورت ءسوندىرۋ ءبولىمىنىڭ بولىمشە كومانديرى ەرجان تۇرتايەۆ بولسا ون جىلدان بەرى وسى سالادا ەڭبەك ەتەدى. نەگىزگى ماماندىعى زاڭگەر. بالا كۇنگى ارمانى قۇتقارۋشى بولىپ، ادامدارعا كومەك كورسەتۋ ەدى. ءسويتىپ قولعا ديپلوم العان سوڭ اسكەرگە اتتاندى. كەلگەن سوڭ بىردەن ءورت ءسوندىرۋ بولىمىنە جۇمىسقا ورنالاستى.
- بىزدە ءار شىعۋدىڭ ءوزى تاجىريبە. كۇندەلىكتى قىزمەتتە ءتۇرلى جاعداي بولادى. شۇعىل شەشىم قابىلدايتىن دا كەز كەزدەسەدى. ءبىر قاۋىپتى شاقىرتۋ ەسىمدە. 2015 -جىلى ءبولىم قالاداعى ماسكەۋ اۋدانىنا دا جاۋاپتى بولدى. تاڭعى ساعات 5:00 شاماسىندا جەر ءۇيدىڭ ورتەنگەنى تۋرالى حابار ءتۇستى. ءۇي تۇگەل جانىپ جاتتى. كىرۋ مۇمكىندىگى از بولدى. بىزگە جەتكەن اقپارات بويىنشا ەكى ادام ىشىندە قالعان. تەرەزەدەن كىرىپ، جەر باۋىرلاپ، بولمەلەردى ارالاپ شىقتىق. دەنەسى كۇيمەگەن، ءبىراق ۋلانىپ قالعان قىزدىڭ مۇردەسىن الىپ شىقتى. اجەسى دە سول ۇيدە قالعان. ونى دا قۇتقارۋ مۇمكىن بولمادى. تاڭ بولعان سوڭ كوبى ۇيىقتاپ جاتادى، حابار كەش ءتۇسىپ قالعان. ەڭ ءبىرىنشى اۋىر شاقىرتۋدىڭ ءبىرى وسى بولدى، - دەدى ول.
ءۇش بالانىڭ اكەسى جاڭا جىلدى جۇمىس ورنىندا قارسى الدى. بالالارى بۇل كۇنى وتباسى مۇشەلەرىنىڭ ءتورت كوزى تۇگەل بولعانىن قالاسا دا اسا جاۋاپتى جۇمىستى تۇسىنەدى.
- ولار ءورت ءسوندىرۋشى ماماندىعىن تۇسىنەدى. دەمالىس كۇندەرى اكەلىپ كورسەتەمىن، تانىستىرامىن. بەس جاستاعى بالام بولسا بالاباقشادا ماقتانىشپەن ايتادى، سۋرەتتەرىن سالادى. جۇمىستان ساعىنا قارسى الادى. جاڭا جىلدا وتباسى اماندىعىن تىلەيمىن، - دەدى ول.
جەكە قۇرامدى وقيعا ورنىنا جەتكىزۋ مىندەتىم - ازامات امانگەلدى
شاقىرتۋ تۇسكەن بويدا قولىنا قۇجات الىپ، باعىتىن انىق بىلەتىن جۇرگىزۋشى ازامات امانگەلدىنىڭ بۇل قىزمەتكە ورنالاسقانىنا بەس جىل بولدى. ونىڭ مىندەتى - جەكە قۇرامدى شاقىرتۋ ورنىنا جەتكىزۋ، سۋدى ۇزدىك بەرىپ تۇرۋ. قاجەت كەزدە كولىگىن ءوزى جوندەپ الىپ، مۇنتازداي تازا ۇستايدى.
- تاڭەرتەڭ كەزەكشىلىككە تۇسكەندە قابىلداپ الامىز. ماي، سۋىن تەكسەرەمىز، وتالدىرامىز. ءوزىم ق. جۇبانوۆ اتىنداعى اقتوبە وڭىرلىك ۋنيۆەرسيتەتىن ءبىتىردىم. نەگىزگى ماماندىعىم - بيولوگ- تەحنولوگ. بۇل جۇمىستى دوسىمنان ەستىدىم. ول وسى سالادا جۇمىس ىستەيدى. اڭگىمە بارىسىندا قىزىقتى جايتتاردى ايتىپ وتىرادى. سوعان قىزىعىپ، مەن دە كەلدىم. وكىنبەيمىن. اسكەرگە بارىپ كەلگەن سوڭ بىردەن قۇجاتتارىمدى تاپسىردىم. مەن ءوزىم تەحنيكاعا جاقىن اداممىن، ءبارىن اكەمنەن ۇيرەنگەم. سول ءۇشىن مەن وسى باعىتتى، جۇرگىزۋشىلىكتى تاڭدادىم. كوشەدە ارنايى كولىك جۇرگىزۋشىسىن سىيلايدى. تەك كەيدە كەپتەلىسكە تاپ بولىپ، جول بەرمەي جاتادى. سونىمەن بىرگە ادامدار كولىكتى تۇراققا دۇرىس قويماي كەتەدى. سونداي كەزدە قيىنداۋ بولادى، - دەدى ازامات امانگەلدى.
ايتا كەتەيىك، №4-ءورت ءسوندىرۋ بولىمىندە 8 تەحنيكا بار. بارلىعى 57 قىزمەتكەر جۇمىس ىستەيدى. ونىڭ ۇشەۋى باسشىلىق قىزمەت، تورتەۋى راديوتەلەفونشى، تورتەۋى جۇرگىزۋشى، قالعانى ءورت ءسوندىرۋشى. اۋماققا قاراستى 226 گيدرانت بار. جاڭا جىل ءتۇنى اقتوبە قالاسىندا شاقىرتۋ بولمادى.
اۆتور
التىناي ساعىندىقوۆا
