ءومىر - وزەن: استانادا مۇحتار شاحانوۆتىڭ كەشى ءوتتى
استانا. KAZINFORM - بۇگىن Nazarbayev University-دە اقىن، قوعام قايراتكەرى، قازاقستاننىڭ حالىق جازۋشىسى مۇحتار شاحانوۆتىڭ شىعارماشىلىق كەشى ءوتتى، دەپ حابارلايدى Kazinform ءتىلشىسى.
اتالعان كەشتى NU Poetry كلۋبى ۇيىمداستىرعان. شارا بارىسىندا كەش قوناقتارى اقىننىڭ ولەڭدەرىن تىڭداپ، وزدەرىن قىزىقتىرعان سۇراقتارعا جاۋاپ الدى. وعان قوسا NU وركەسترى اقىننىڭ «ءومىر - وزەن» ءانىن ورىندادى. سونىمەن قاتار اقىننىڭ قولتاڭباسى قويىلعان كىتاپتارى ساتىلدى.
ايتا كەتۋ كەرەك، 2-شىلدەدە مۇحتار شاحانوۆ 83 جاسقا تولدى. ۇيىمداستىرۋشىلاردىڭ ايتۋىنشا بۇل جولعى كەزدەسۋدى وتكىزۋدىڭ ماقساتى - نازاربايەۆ ۋنيۆەرسيتەتىنىڭ ستۋدەنتتەرىن مۇحتار شاحانوۆتىڭ شىعارماشىلىعىمەن تانىستىرۋ.
اقىنمەن كەزدەسۋ پوەزيا كلۋبىنىڭ تۇلەكتەرى مەن كەش قوناقتارى اقىننىڭ ولەڭدەرىن وقۋمەن باستالدى.
ەسكە سالا كەتەيىك، مۇحتار شاحانوۆ - قازاق ادەبيەتى مەن قوعام ومىرىندەگى باستى تۇلعالاردىڭ ءبىرى. 1942-جىلى 2-شىلدەدە وڭتۇستىك قازاقستان وبلىسى قاسقاسۋ اۋىلىندا دۇنيەگە كەلگەن. ول ءوزىنىڭ بۇكىل شىعارماشىلىق جولىندا ادەبي قىزمەتتى بەلسەندى ازاماتتىق ۇستانىممەن ۇشتاستىردى. ول 1986-جىلعى جەلتوقسان وقيعاسى مەن ارال تەڭىزىنىڭ ەكولوگيالىق ماسەلەلەرىن قامتيتىن ونداعان پوەزيالىق جيناقتار، وچەركتەر مەن پۋبليتسيستيكالىق شىعارمالار جازدى.
نازاربايەۆ ۋنيۆەرسيتەتىنىڭ پروفەسسورى، ۇلتتىق مادەنيەت ورتالىعىنىڭ جەتەكشىسى قۇرمان گۇلتاستىڭ ايتۋىنشا، بۇگىن نازاربايەۆ ۋنيۆەرسيتەتىندە ەرەكشە كۇن. سەبەبى كورنەكتى اقىن جانە قوعام قايراتكەرى مۇحتار شاحانوۆ اتالعان وقۋ ورنىنا قوناققا كەلدى. ال، ستۋدەنتتەر ءۇشىن اڭىز ادامدى كوزبەن كورىپ، داۋىسىن قۇلاعىمەن ەستۋدىڭ بىرەگەي مۇمكىندىگى تۋدى. ول تاماشا اقىن عانا ەمەس، 1986-جىلعى جەلتوقسان وقيعاسىنان كەيىن 70-جىلدارى قازاق ادەبيەتىنە جاڭا تىنىس بەرىپ، ارالدى ساقتاپ قالۋ ءۇشىن كۇرەسىپ، ادىلەتتىڭ ۇنىنە اينالعان تۇلعا. مۇنداي تۇلعامەن كەزدەسۋدىڭ قۇندىلىعى، جاستارعا تاعىلىمى وتە زور.
اۆتور بەيسەن سۇلتان
