ءومىر ءبىز ويلاعانداي ەمەس

 ەكى پەرىشتە جولعا شىعىپتى. ءبىرىنشى كۇنى جولاۋشىلار ءبىر بايدىڭ ۇيىنە تۇسەدى. ءبىراق بۇل وتباسى اسا قوناقجاي بولماي شىعادى. ولار ەكى جولاۋشى-پەرىشتەنى قوناق بولمەگە جاتقىزباي، جەرتولەگە قونۋعا رۇقسات ەتىپتى.

توسەكتەرىن سالىپ، ەندى جاتايىن دەگەندە پەرىشتەلەردىڭ ۇلكەنى قابىرعاداعى تەسىكتى كورىپ، ونى بىتەپ تاستاپتى. كىشىسى نەگە ولاي ىستەگەنىن سۇرايدى. سوندا ۇلكەنى:

ءومىر ءبىز ويلاعانداي ەمەس، - دەپ جاۋاپ قاتىپتى.

كەلەسى كۇنى ولار ىڭىرشاعى شىققان كەدەيدىڭ ۇيىنە تۇنەيدى. ءبىراق ءۇي يەسى وتە قوناقجاي ەكەن، ايەلى ەكەۋى كەشكى استارىن پەرىشتەلەرمەن تەڭدەي ءبولىسىپ جەيدى. جايلى جاتاسىزدار دەپ ءوز توسەكتەرىن بوساتىپ بەرەدى.

ۇيقىلارىن قاندىرىپ تۇرسا، ەرلى-زايىپتىلار قاتتى قايعىرىپ، جىلاپ وتىر ەكەن. سويتسە ءسۇتىن ساتىپ، سودان تابىس كورىپ وتىرعان جالعىز سيىرى ءولىپ قالىپتى. سوندا كىشى پەرىشتە ۇلكەنىنەن سۇراپتى:

قالاي بولعانى بۇل؟ ءبىرىنشى ءۇي باقۋاتتى بولسا دا سەن ولارعا كومەكتەستىڭ. مىنا بەيباقتار اۋزىنداعىسىن جىرىپ، بارىمەن ءبولىستى. ال، سەن ولاردىڭ جالعىز سيىرىنىڭ ءولىپ قالۋىنا جول بەردىڭ...

ءومىر ءبىز ويلاعانداي ەمەس، - دەپ جاۋاپ بەرەدى ەرەسەك پەرىشتە. - ءبىز جەرتولەدە قونعان كەزدە قابىرعا تەسىگىندە ولجا بارىن ءبىلدىم. وندا كوپ التىن كومىلگەن. ول ءۇيدىڭ قوجايىنى ءبىزدى جوندەمدى كۇتىپ الماعان سوڭ، سول التىندى تاۋىپ الماسىن دەپ تەسىكتى بىتەپ تاستادىم.

كەلەسى ءتۇنى جاتار كەزدە جارلىنىڭ ايەلىنىڭ جانىن الماققا ازىرەيىل كەلدى، ءبىراق مەن وعان سيىردى بەردىم. ءومىر ءبىز ويلاعانداي ەمەس. ءبىز ءبارىن بىلە بەرمەيمىز. ءتىپتى سەنىمى بولا تۇرا، پەندە نە نارسەنىڭ دە ونىڭ يگىلىگى ءۇشىن جاسالارىن تۇيسىنە بەرمەيدى. ونى ۋاقىت وتە كەلە عانا تۇسىنەدى.

(اۋدارما)
شىنار ابەلدا