ءتىس اۋرۋىن باساتىن ادىستەر

استانا. KAZINFORM - ءتىستىڭ اۋىرعانى ەڭ اۋەلى جۇيكە جۇيەسىنە اسەر ەتەدى. ءتىس اۋرۋىنىڭ ءتۇرلى سەبەبى بار. مىسالى، تىسكە قانقۇرت ءتۇسىپ، قاجالۋىنان نەمەسە ءەمالدىڭ السىرەۋىنەن اۋىرۋى مۇمكىن.

جالپى، ءتىس نەدەن اۋىرادى؟ بۇعان بىرنەشە سەبەپ بار: ءتاتتى تاعامدار مەن گازدالعان سۋسىنداردى كوپ مولشەردە تۇتىنۋ، ساعىزدى ۇزاق ۋاقىت شايناۋ، ءتىس كۇتىمىنە سالعىرت قاراۋ جانە ت. ب. ءتىستىڭ اۋىرعانى ەڭ اۋەلى جۇيكە جۇيەسىنە اسەر ەتەدى. بۇل سۋىق، ىستىق، ءتاتتى، قىشقىل تاعامداردى جەگەن كەزدە، اۋا تيگەندە سەزىلەدى. سودان كەيىن ادامنىڭ تەمپەراتۋراسى كوتەرىلىپ، باسى اينالىپ، ۇيىقتاي الماي، بەتى ءىسىپ كەتەدى.

مۇنى ءۇي جاعدايىندا قالاي ەمدەۋگە بولادى؟ الدىمەن اۋىرعان كەزدە ءتىسىڭىزدى تازالاپ الىڭىز. اۋىز قۋىسىن تۇز، اس سوداسى قوسىلعان جىلى سۋمەن بىرنەشە رەت شايىڭىز. پياز بەن سارىمساقتى ۇككىشتەن وتكىزىپ، تۇزبەن، سودامەن ارالاستىرىڭىز. ونى داكەگە وراپ، اۋىرعان تىسكە باسىڭىز. بۇل ءادىستى كۇنىنە ءار ەكى ساعات سايىن ەكى-ءۇش رەت جاساۋعا بولادى. ورامالعا سالىنعان مۇز كەسەكتەرىن بەتىڭىزگە باسۋ ارقىلى اۋرۋدى باسەڭدەتە الاسىز.

5-6 تامشى يود پەن 1 قاسىق تۇزدى 1 ستاقان سۋدا ەرىتىپ، اۋىرعان ءتىسىڭىزدى شايىڭىز. مۇنىمەن قوسا اۋرۋدى جەڭىلدەتۋگە نۇكتەلى ماسساج كومەكتەسەدى. جوعارعى ەرىننىڭ ۇستىندەگى نۇكتەنى تاۋىپ، ءبىرقالىپتى ماسساج جاساي وتىرىپ اۋرۋدى باسۋعا بولادى.

ءتىسىم ساۋ بولسىن دەسەڭىز، ءتىس دارىگەرىنە قارالىپ تۇرىڭىز. سەبەبى ءتىستىڭ اۋىرعانى باسىلعانىمەن، ارتىنشا قايتا پايدا بولىپ، سوزىلمالى تۇرگە كوشۋى مۇمكىن. سوندىقتان اۋرۋدىڭ الدىن الىپ، ءتىس كۇتىمىنە ءمان بەرگەنىڭىز ءجون.