ءتىل ۇيرەنۋشىلەر ەندى قازاق ماقالدارىن اعىلشىنشا ەمىن-ەركىن قولدانا الادى
استانا. KAZINFORM - ەلىمىزدە قازاقشا-ورىسشا-اعىلشىنشا فرازەولوگيالىق سوزدىك جارىققا شىقتى.
سوزدىكتىڭ تانىستىرىلىمى ەلورداداعى ۇلتتىق اكادەميالىق كىتاپحانادا ءوتتى. ادىستەمەلىك قۇرالدىڭ اۆتورى - جازۋشىلار وداعىنىڭ مۇشەسى، فيلولوگيا عىلىمدارىنىڭ كانديداتى، ىلەسپە اۋدارماشى كامال الپەيىسوۆا.
ەڭبەك مەملەكەتتىك ءتىلدىڭ ەلارالىق قاتىناستاردا قولدانىلۋ اياسىن كەڭەيتۋگە باعىتتالعان. اتاپ ايتقاندا، ساياساتكەرلەردىڭ، جۋرناليستەردىڭ، عالىمداردىڭ، ۇستازداردىڭ قازاق تىلىندەگى ماقال-ماتەل، تۇراقتى تىركەس، قاناتتى سوزدەرىن، ياعني فرازەولوگيزمدەرىن باسقا تىلدەردە قولدانۋعا مۇمكىندىك بەرەدى.
- ءار ادام انا ءتىلىن دامىتۋ ءۇشىن ءوزىنىڭ قابىلەتى جەتەتىن شارۋانى ىستەيدى. بىرەۋ ءان جازادى، بىرەۋ ولەڭ شىعارادى، بىرەۋ ءتىل عىلىمىن زەرتتەيدى. مەن ءوزىمىزدىڭ تىلىمىزدەگى ءىنجۋ-مارجانداردى - ماقال- ماتەلدەردى، تۇراقتى تىركەستەردى باسقا ەلدەر دە تانىسا، بىلسە دەدىم. باسىندا ءوز ءتىلىمىزدى جاڭا مەڭگەرىپ جۇرگەن باۋىرلارىمىز ءۇشىن قازاقشا-ورىسشا سوزدىك جاساعانمىن. ول سوزدىك 2006, 2011, 2016 -جىلدارى شىقتى. امەريكاعا ساپارىمدا تالانتتى جاستاردى كورىپ، ولار «ءبىزدىڭ قازاق حالقىندا مىنانداي ماقال بار، ونىڭ اعىلشىنشاسى بىلاي دەپ ايتىپ وتىرسا عوي» دەپ ارماندادىم. سول ويدان وسى كىتاپ تۋدى، - دەدى كامال الپەيىسوۆا.
سونداي- اق اۆتور بۇل كىتاپتىڭ قازاقشا-ورىسشا بولىگىن ءوزى جازعانىن، ال اعىلشىنشا باعانىن ءوزىنىڭ شاكىرتى، شىعىس انگلياداعى نورۆيچ ۋنيۆەرسيتەتىن ءتامامداعان مەرەي مالىكوۆا جازىپ شىققانىن ايتتى.
سوزدىك وقىرماننىڭ ءتىل بايلىعىن ارتتىرىپ، ءۇش تىلدە ەركىن سويلەۋگە، شەشەندىك ونەردى يگەرۋگە تاپتىرماس قۇرال سانالادى. قازىرگى تاڭدا ول 2000 دانامەن باسىلىپ شىققان جانە ونلاين نۇسقاسى جاسالىپ جاتىر.
اتاپ وتەرلىك جايت، بۇل ەڭبەككە قازاقتىڭ 1001 فرازەولوگيزمى ەنىپ وتىر. ولار نەعۇرلىم كەڭ تارالۋى، قازاق حالقىنىڭ دانالىعىن كورسەتە الۋى، حالىقتار اراسىنداعى بايلانىس كەزىندە ءجيى قولدانىلۋى سىندى كريتەرييلەر بويىنشا ىرىكتەلىپ الىنعان.
ايتا كەتسەك «قازاق ءتىلىنىڭ ۇلتتىق سوزدىك قورى» اقپاراتتىق جۇيەسىن قالىپتاستىرۋ قاعيداسى ازىرلەندى.
