ءتورت قىتايلىق ستۋدەنت ا ق ش ۇكىمەتىن سوتقا بەردى
استانا. KAZINFORM - ا ق ش- تاعى ءتورت قىتايلىق ستۋدەنت دونالد ترامپ اكىمشىلىگىن سوتقا بەردى. ولار ا ق ش ۇكىمەتىنىڭ شەتەلدىك ستۋدەنتتەرگە قاتىستى ۆيزانى جاپپاي جويۋ ارەكەتىن زاڭسىز دەپ تانىپ، ونى توقتاتۋدى جانە ستۋدەنتتىك مارتەبەنى قالپىنا كەلتىرۋدى تالاپ ەتىپ وتىر. بۇل تۋرالى Lianhe Zaobao باسىلىمى حابارلادى.
وسى اپتادا كاليفورنيا ۋنيۆەرسيتەتى (بەركلي)، كارنەگي-مەللون ۋنيۆەرسيتەتى جانە باسقا دا بەدەلدى وقۋ ورىندارىندا وقيتىن ءتورت قىتايلىق ستۋدەنت كاليفورنيانىڭ فەدەرالدىق وكرۋگتىك سوتىنا شاعىم ءتۇسىردى.
ولاردىڭ مالىمدەۋىنشە، ا ق ش بيلىگى «ۇلتتىق قاۋىپسىزدىك» دەگەن ناقتى ەمەس سەبەپپەن جۇزدەگەن ستۋدەنتتىڭ ۆيزاسىن جويىپ، بۇل تۋرالى نە ستۋدەنتتەرگە، نە ۋنيۆەرسيتەتتەرگە ەسكەرتپەگەن. ۆيزا جويىلعان ستۋدەنتتەردىڭ كوپشىلىگى قىتايدان كەلگەن.
ادۆوكات جۋ كەلياننىڭ ايتۋىنشا، ا ق ش مەملەكەتتىك دەپارتامەنتى 2024 -جىلى 88 وقۋ ورنىنان كەمىندە 529 ستۋدەنت پەن زەرتتەۋشىنىڭ ۆيزاسىن جويعان. جۋ كەلياننىڭ ءوزى بۇعان دەيىن دە ترامپ اكىمشىلىگىنە قارسى ءبىرقاتار ىستەرگە قاتىسىپ، 2020 -جىلى WeChat قولدانۋعا تىيىم سالۋدى توقتاتقان ءىس بويىنشا جەڭىسكە جەتكەن.
شاعىمدا ا ق ش ۇكىمەتى كونستيتۋتسيانى جانە اكىمشىلىك ءىس جۇرگىزۋ ەرەجەلەرىن بۇزدى دەپ كورسەتىلگەن. ويتكەنى ستۋدەنتتەرگە ەشقانداي ەسكەرتۋ، تىڭدالىم نەمەسە رەسمي دالەلدەر ۇسىنىلماعان. كەيبىر جاعدايلاردا كوشى-قون ورگاندارى بىرنەشە جىل بۇرىنعى جول ەرەجەسىن بۇزۋ نەمەسە تۇرمىستىق داۋ نەگىزىندە ۆيزانى جويعان.
ادۆوكاتتىڭ ايتۋىنشا، بۇل ارەكەتتەر تەك زاڭسىز عانا ەمەس، سونىمەن قاتار قىتايلىق ستۋدەنتتەرگە قاتىستى كەمسىتۋشىلىك سيپاتتا جاسالعان.
ءتورت ستۋدەنت سوتتان ۋاقىتشا توقتاتۋ تۋرالى بۇيرىق (TRO) شىعارۋدى سۇرادى. ەگەر سوت بۇل ءوتىنىشتى قاناعاتتاندىرسا، جويىلعان ۆيزالاردىڭ كۇشىن ۋاقىتشا قالپىنا كەلتىرۋ مۇمكىن بولادى.
ايتا كەتەيىك، سوڭعى ايلاردا ا ق ش- تا حالىقارالىق ستۋدەنتتەردىڭ SEVIS تىركەۋى جاپپاي جويىلىپ جاتىر، بۇل ولاردىڭ زاڭدى مارتەبەسىن جوعالتۋىنا الىپ كەلەدى. ەگەر ولار ەلدەن شىقپاسا، بولاشاقتا جاڭا ۆيزا الۋ قيىنعا سوعۋى مۇمكىن.
جاقىندا وسىنداي جاعدايعا ۇشىراعان دارتمۋت كوللەدجىنىڭ دوكتورانتى ليۋ سياوتيان دا سوتقا جۇگىنىپ، ۆيزاسىن ۋاقىتشا قالپىنا كەلتىرۋگە قول جەتكىزدى.
