ءتورت ەل ۇكىمەتتەرىنىڭ باسشىلارى كاسىپورىنداردىڭ استاناداعى كورمەسىن ارالادى
قازاقستان، بەلارۋس، قىرعىزستان جانە رەسەي ۇكىمەتتەرىنىڭ باسشىلارى 25-27-قىركۇيەكتە استانادا ءوتىپ جاتقان «يننوپروم. قازاقستان» حالىقارالىق ونەركاسىپ كورمەسىنىڭ ەكسپوزيتسياسىمەن تانىستى. قازاقپارات بۇل تۋرالى primeminister.kz-كە سىلتەمە جاساپ حابارلايدى.
اتالعان ءىس- شارانى العاش رەت وتكىزىپ وتىرعان قازاقستان 2019 -جىلدان بەرى «يننوپرومنىڭ» تۇراقتى قاتىسۋشىسى بولىپ كەلەدى. ال وتكەن جىلى كورمەنىڭ سەرىكتەس ەلى رەتىندە ءوز ونىمدەرىن ۇسىندى. كورمەنىڭ نەگىزگى ماقساتى - وندىرىستىك كووپەراتسيانى دامىتۋ، ينۆەستيتسيا تارتۋ، ساۋدا ىنتىماقتاستىعىن كەڭەيتۋ جانە ءوزارا تاجىريبە الماسۋ.
قازاقستاندىق «يننوپرومنىڭ» تاقىرىبى - جاڭا كەزەڭنىڭ ونەركاسىپتىك ستراتەگيالارى.
ەلورداداعى EXPO ورتالىعىنىڭ الاڭىندا ۇيىمداستىرىلعان كورمەگە ە ا ە و ەلدەرىنەن 300 دەن استام كاسىپورىن مەن كومپانيا قاتىسىپ جاتىر. كەلۋشىلەر نازارىنا مەتاللۋرگيا، ماشينا جاساۋ، حيميا جانە جەڭىل ونەركاسىپ، قۇرىلىس يندۋسترياسى مەن فارماتسيەۆتيكا سالالارىنداعى ونىمدەردىڭ كەڭ اسسورتيمەنتى ۇسىنىلعان.
كورمەنى ارالاۋ بارىسىندا ءاليحان سمايىلوۆ، رومان گولوۆچەنكو (بەلارۋس)، اقىلبەك جاپاروۆ (قىرعىزستان) جانە ميحايل ميشۋستينگە (رەسەي) «ت ك ش قازورتالىعى» ا ق» كومپانياسىنىڭ، Railways System KZ تەمىرجول ماشينا جاساۋ كاسىپورىندارى قاۋىمداستىعىنىڭ، قازاقستاندىق اۋىل شارۋاشىلىعى تەحنيكاسى، اۆتوموبيلدەر، مۇناي- گاز، تاۋ- كەن جانە مەديتسينالىق تەحنيكا، ەلەكتروتەحنيكا، باقىلاۋ- ولشەۋ اسپاپتارى، ارنايى جۇمىس كيىمدەرى، تىڭايتقىشتار جانە تاعى دا باسقا وندىرۋشىلەردىڭ ستەندتەرى تانىستىرىلدى.
سونىمەن قاتار ۇكىمەتتەر باسشىلارى نازارىنا ۆيرتۋالدى شىندىق تەحنولوگيالارىن پايدالانا وتىرىپ، ونەركاسىپتىك IT ازىرلەمەلەر، اقپاراتتىق جۇيەلەر مەن سيفرلىق ونىمدەر ۇسىنىلدى.
ايتا كەتەيىك، قازاقستان ە ا ە و سەرىكتەستەرىمەن بىرلەسىپ ونەركاسىپ سالاسىندا 38 بىرلەسكەن جوبانى جۇزەگە اسىرعان. بۇل رەتتە كووپەراتسيانىڭ نەگىزگى باسىمدىقتارى تەرەڭ وڭدەۋ، بارىنشا وقشاۋلاۋ، جاڭا ءونىم شىعارۋ جانە ەكسپورتتىق الەۋەت بولدى. سونىمەن قاتار بۇگىنگى تاڭدا تاعى 80 جوبانى ىسكە اسىرۋ جۇمىستارى پىسىقتالىپ جاتىر. بۇل مەملەكەت باسشىسى قاسىم- جومارت توقايەۆتىڭ تاياۋداعى قازاقستان حالقىنا جولداۋىندا ايتىلعان ەلدىڭ ونەركاسىپتىك نەگىزىن قالىپتاستىرۋ جانە تەرەڭ وڭدەلگەن كلاستەرلەر قۇرۋعا دەن قويۋ جونىندەگى تاپسىرمالارى تۇرعىسىنان ەرەكشە ماڭىزعا يە.
جالپى، سوڭعى 5 جىلدا رەسپۋبليكانىڭ وڭدەۋ ونەركاسىبىندەگى ءونىم كولەمى 2,2 ەسەگە - 2017 -جىلعى 9,4 تريلليون تەڭگەدەن 2022 -جىلى 20,7 تريلليون تەڭگەگە دەيىن ارتتى.
