ءتورت جىلدا ءبىر كەلەتىن «كىبىسەنى» بىلەسىز بە

استانا. KAZINFORM - قولدانىستاعى كۇنتىزبە بويىنشا بيىلعى 2024 -جىل كىبىسە بوپ ەسەپتەلەدى. بۇل - وسى جىلداعى تاۋلىك سانى جىلداعىدان ءبىر كۇنگە ارتىق دەگەن ءسوز.

ءتورت جىلدا اينالىپ كەلەتىن ارتىق كۇندى قىس پەن كوكتەمنىڭ تۇيىسەر تۇسى - اقپاننىڭ سوڭىنا كىرگىزىپ قويعان. ياعني ءاربىر ءتورتىنشى جىل 366 كۇندى دوڭگەلەكتەيدى. ءسويتىپ، كىبىسە جىلىنىڭ قاراپايىم جىلدان ءبىر كۇن ارتىقشىلىعى بار.

ۋيكيپەدياداعى مالىمەتكە نازار سالساق، كىبىسە جىلىنىڭ پايدا بولۋى ەجەلگى مىسىردان باستاۋ العان. وسى ەلدىڭ عالىمى سوتيس سوناۋ جىلداردىڭ وزىندە ەڭ جارىق جۇلدىز - «سۇمبىلەنى» ءبىراز زەرتتەگەن. ونىڭ تاڭەرتەڭگىلىك وڭتۇستىك كوكجيەكتەن كورىنەتىنىن اڭعارعاننان باستاپ، ءار جىلدىڭ 365 كۇننەن تۇراتىنىن انىقتاعان. وسىلاي، جۇلدىزداردىڭ جاي-كۇيىن تەرەڭ زەرتتەگەن مىسىرلىق عالىمدار كۇندەردى جاڭىلماي ساناي وتىرىپ، حالىققا سۇمبىلەنىڭ تۋاتىن مەزگىلىن دەر كەزىندە ەسكەرتىپ ءجۇردى. قازىرگى قولدانىستاعى كۇنتىزبە وسىنداي ساناقتىڭ ناتيجەسىندە پايدا بولدى.

ۇلتتىق ستاتيستيكا بيۋروسىنىڭ مالىمەتىنشە، تاۋەلسىزدىك جىلدارىندا (1992 -جىلدان باستاپ) 29-اقپاندا 5110 ادام دۇنيەگە كەلگەن. كىبىسە جىلدارىنىڭ اراسىندا ازىرگە 2016 -جىل كوش باستاپ تۇر. بۇل جىلى 29-اقپاندا 438 ەر بالا، 432 قىز بالا ومىرگە كەلىپتى.

اۆتور

باقىتگۇل اباي قىزى