ءسىز جاتقا وقۋعا ءتيىس ءبىر ولەڭ

استانا. قازاقپارات - اقىن، جۋرناليست سەرىك تومانوۆ 1956-جىلى تالاس اۋدانى، جدانوۆ اتىنداعى كەڭشاردا دۇنيەگە كەلدى. ەڭبەك جولىن «لەنين جولى» (قازىرگى «تالاس تىنىسى») گازەتىنىڭ رەداكسياسىندا باستادى. العاشقى ولەڭدەرى دە وسىندا جاريالاندى.

اقىننىڭ العاشقى جىر جيناعى 2000-جىلى «اداسىپ جۇرگەن اقبوكەن ەدىم» دەگەن اتپەن جارىق كوردى. ونىڭ «اققۋلار»، « قىزىل كويلەك كيگەن قىز»، «ساتۋشى قىز»، «اۋزىنان ايدىڭ تۇسكەن قىز»، «سەزىمدى قايتەم تۋلاعان» اتتى ولەڭدەرىنە سازگەرلەر ءان جازدى. سىرشىل اقىن، قارىمدى قالامگەر 47 جاسقا قاراعان شاعىندا 2003 -جىلى دۇنيەدەن ءوتتى. سىزدەردىڭ نازارلارىڭىزعا اقىننىڭ «تەرەكتىڭ شەشىمى» اتتى ولەڭىن ۇسىنامىز.

تەرەكتىڭ شەشىمى

مەن - تەرەكپىن،

تونالىپ توزعان بۇگىن.

كۇزى جەتكەن جايدارى جازدان بۇرىن.

ءتىرى ولىكتەي تۇنەرىپ تۇرعانشا بۇل،

قوپارىلا قۇلايىن قوزعال، ءدىڭىم!

قوزعال، ءدىڭىم،

قيناما، قۇلات مەنى.

ۇزىنىمنان تۇسەيىن سۇلاپ كەرى،

مازالاۋىن قويماي تۇر مىنا ءبىر جەل،

بىتپەگەن بە، ءباتشاعار سىناپ تەگى.

قوزعال، ءدىڭىم،

قۇلايىن جاڭقالانىپ،

كۇن كەشكەنشە، قۇر بەكەر قاڭقا باعىپ.

قارىق بولسىن قىسقى وتىن

تابىلدى دەپ،

قوجايىنىم قولىنا بالتانى الىپ.

قوزعال، ءدىڭىم،

قالعان جوق، تاڭدانار تۇك،

قاشانعى تۇرام ساعان سالماق ارتىپ.

سۇيرەتىلىپ قۇر سۇلدە كۇن كەشكەنشە،

جالىن بولىپ لاپىلداپ جانعان ارتىق!

سەرىك تومانوۆ