ءسوزبۇيداعا سالعان كاسىپكەرلەرمەن اڭگىمە باسقاشا بولادى - توقايەۆ كاپيتالدى زاڭداستىرۋ تۋرالى

استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا اتىمتاي كاسىپكەرلەردىڭ التىن ءتىزىمى تۋرالى ايتتى.

«بىلتىر بيزنەس وكىلدەرىمەن وتكەن كەزدەسۋدە بۇل ماسەلە بويىنشا مەن ناقتى ۇستانىمدى ايتتىم. ءبىز كاسىپ يەلەرىمەن ءوزارا كەلىسىمگە كەلدىك، ياعني «كاپيتالدى زاڭداستىرۋ» ءۇشىن مىندەتتى تۇردە قازاقستان ەكونوميكاسىنا قارجى سالۋ قاجەت بولادى. ەڭ باستىسى، سالىنعان قارجى ەل يگىلىگىنە جاراۋى كەرەك. بۇل تالاپتى نورماتيۆتىك تۇرعىدان بەكىتىپ الۋ قاجەت.

ءتيىستى رەەسترگە ەنگىزىلگەن كاسىپكەرلەرمەن كەلىسىم جاساعان كەزدە مەملەكەتكە قايتارىلاتىن اكتيۆتەردى «زاڭسىز» دەپ تانىماۋ تۋرالى نورمانى بەكىتۋگە بولادى. بۇل - شىن مانىندە، ءىرى كاسىپ يەلەرىنىڭ مۇددەسىنە ساي كەلەتىن ماڭىزدى قادام. ءبىراق كاسىپكەرلەر دە قارجىنى رەسپۋبليكالىق بيۋدجەتكە اۋدارۋ ماسەلەسىنە كەلگەندە ۇكىمەتپەن جانە باس پروكۋراتۋرامەن تىعىز بايلانىستا جۇمىس ىستەۋگە ءتيىس. بۇل - ءار تەڭگە ءۇشىن ساۋدالاسپاي، قاجەتتى شارانىڭ ءبارىن ءوز ەركىمەن جاساۋ كەرەك دەگەن ءسوز»، - دەدى پرەزيدەنت.

مەملەكەت باسشىسى كاسىپكەرلەر وسى ەلدىڭ ازاماتى رەتىندە مەكتەپ، اۋرۋحانا، ستاديون، مۋزەي جانە باسقا دا الەۋمەتتىك-مادەني نىساندار سالۋعا قوماقتى قارجى بولۋگە مىندەتتى ەكەنىن ايتتى.

«مۇنداي كاسىپكەرلەردىڭ ەسىمى جومارت جانداردىڭ «التىن تىزىمىنە» جازىلادى. ال ودان باس تارتقان نەمەسە ءسوزبۇيداعا سالعان كاسىپكەرلەرگە قاتىستى اڭگىمە باسقاشا بولادى»، - دەدى قاسىم-جومارت توقايەۆ.

سالىق سالاسىندا اكىمشىلەندىرۋ ىسىندە جازالاۋ تاسىلىنەن باس تارتقان ابزال.

«جەكە تابىس سالىعىنىڭ مولشەرلەمەسىن ازاماتتاردىڭ كىرىسىنە قاراي ديففەرەنسياتسيالاۋ قاجەتتىگى تۋىنداپ وتىر. سالىقتىق اكىمشىلەندىرۋ ىسىندە جازالاۋ تاسىلىنەن دە باس تارتقان ابزال. ماجبۇرلەۋ شارالارىن قولدانباي-اق، حابارلاما جىبەرۋ ارقىلى وندىرىلەتىن سالىق بەرەشەگىنىڭ جوعارعى شەگىن كوتەرۋگە بولادى دەپ ويلايمىن»، - دەدى قاسىم-جومارت توقايەۆ.

مەملەكەت باسشىسىنىڭ سوزىنە قاراعاندا، سالىق بەرەشەگى وسى شەكتەن اسىپ كەتسە، قارىز سوماسى اياسىندا عانا شەكتەۋ قويىلۋعا ءتيىس.

«ياعني، بورىشكەردىڭ بانكتەگى ەسەپ-شوتى تولىق بۇعاتتالمايدى. بەرەشەك سوماسى تىم كوپ بولعان جاعدايدا، كەپىلگە مۇلىك قويۋدى تالاپ ەتپەي، قارىزدى ءبولىپ تولەۋگە مۇمكىندىك بەرگەن ءجون. جوسپارعا ساي تەكسەرۋ تاسىلىنەن ءبىرجولا باس تارتۋعا تىرىسۋ كەرەك. ول ءۇشىن قاتەرلەردىڭ الدىن الۋ جۇيەسىن جەتىلدىرۋ قاجەت»، - دەدى پرەزيدەنت.

اۆتور

ەسىمجان ناقتىباي