ءساۋىر ايىندا قىتايدا ەكسپورت 8 پايىزعا وسكەن
استانا. KAZINFORM - جۇما كۇنى قىتاي ۇكىمەتى ءساۋىر ايىنداعى ەكسپورت كولەمى بىلتىرعى سايكەس كەزەڭمەن سالىستىرعاندا 8,1 پايىزعا ارتقانىن مالىمدەدى. بۇل كورسەتكىش ساراپشىلاردىڭ بولجاۋىنان ءتورت ەسە جوعارى، - دەپ حابارلايدى RFI.
رەسمي ستاتيستيكا كورسەتكەندەي، بەيجىڭ مەن ۆاشينگتون اراسىنداعى ساۋدا قاقتىعىسىنىڭ ۋشىعۋىنا بايلانىستى، ءساۋىر ايىندا قىتايدىڭ ا ق ش- قا ەكسپورتى ناۋرىز ايىمەن سالىستىرعاندا 17,6 پايىزعا ازايعان.
قىتايدىڭ باس كەدەن باسقارماسىنىڭ مالىمەتى بويىنشا، ءساۋىر ايىندا ا ق ش- قا ەكسپورت كولەمى 330 ميلليارد دوللار بولعان، ال ناۋرىز ايىندا بۇل كورسەتكىش 401 ميلليارد دوللار بولاتىن.
شاڭحايداعى Baoyin Asset Management Co.،Ltd. كومپانياسىنىڭ پرەزيدەنتى چجان چجيۋەيدىڭ ايتۋىنشا، ا ق ش ەنگىزگەن تاريفتەردىڭ سالدارى ءساۋىر ايىنىڭ ساۋدا دەرەكتەرىنەن كورىنىس تاۋىپ ۇلگەرمەگەن. ونىڭ پىكىرىنشە، بۇعان تاۋارلاردىڭ باسقا ەلدەر ارقىلى قايتا جونەلتىلۋى جانە تاريفتەر ەنگىزىلگەنگە دەيىن جاسالعان كەلىسىمشارتتار سەبەپ بولۋى مۇمكىن. سونىمەن قاتار ول كەلەسى ايلاردا ساۋدا كورسەتكىشتەرىنىڭ تومەندەي باستايتىنىن بولجايدى.
ءساۋىر ايىندا قىتايدىڭ يمپورت كولەمى نەبارى 0,2 پايىزعا تومەندەگەن. ال ساراپشىلار 6 پايىزعا قىسقارادى دەپ بولجاعان ەدى. يمپورت - ىشكى تۇتىنۋشىلىق سۇرانىستىڭ نەگىزگى كورسەتكىشتەرىنىڭ ءبىرى، سوندىقتان ءتيىستى دەرەكتەر ۇنەمى ءجىتى باقىلانادى.
سونىمەن قاتار، تۇتىنۋشىلىق بەلسەندىلىكتىڭ السىرەۋىنە جانە ا ق ش- پەن ساۋدا قاقتىعىسىنىڭ ورشۋىنە بايلانىستى قالجىراعان ەكونوميكاعا قولداۋ كورسەتۋ ءۇشىن، قىتاي حالىق بانكىنىڭ ءتوراعاسى پان گۋنشەن 7-ءساۋىر كۇنى مىندەتتى رەزەرۆتىك مولشەرلەمەنىڭ 0,5 پايىزدىق پۋنكتكە تومەندەتىلگەنىن مالىمدەدى. بۇل قادام - بانكتەردى نەسيە بەرۋگە ىنتالاندىرۋعا باعىتتالعان. سونداي-اق، ول تۇرعىن ءۇي ساتىپ الۋ ءۇشىن 5 جىلدان ۇزاق مەرزىمگە بەرىلەتىن يپوتەكالىق نەسيەنىڭ پايىزدىق مولشەرلەمەسىنىڭ 2,85 پايىزدان 2,6 پايىزعا تومەندەيتىنىن ايتتى.
RFI- دىڭ اتاپ كورسەتۋىنشە، بۇل قىتاي ۇكىمەتىنىڭ ەكونوميكانى ىنتالاندىرۋ ماقساتىندا وتكەن جىلدىڭ قىركۇيەك ايىنان بەرى قولدانعان ەڭ ماڭىزدى شارالارىنىڭ ءبىرى.
RFI- دىڭ جازۋىنشا، ا ق ش پەن قىتايدىڭ جوعارى لاۋازىمدى تۇلعالارى شۆەيتساريادا كەلىسسوز جۇرگىزۋگە دايىندالىپ جاتقاندا، ترامپ اكىمشىلىگى قىتايدان اكەلىنەتىن تاۋارلارعا سالىنعان 145 پايىز باج سالىعىن 50 پايىزدان 54 پايىزعا دەيىن قىسقارتۋدى قاراستىرىپ وتىرعان كورىنەدى. بۇل شەشىم الداعى اپتادا كۇشىنە ەنۋى مۇمكىن.
بۇعان دەيىن ءساۋىر ايىنداعى رەسمي مالىمەتتەرگە سايكەس قىتاي پورتتارىنان شەت ەلدەرگە جونەلتىلگەن تاۋاردىڭ ناقتى كولەمى وزگەرىسسىز قالىپ وتىرعانىن حابارلاعان ەدىك.
