ءسان-سالتانات سالىعى: قىمبات مۇلىك جوعارى كوەففيتسيەنتپەن ەسەپتەلەدى

استانا. KAZINFORM - قارجى ۆيتسە-ءمينيسترى ەرجان ءبىرجانوۆ جاڭا سالىق كودەكسىنىڭ جوباسى دايىندالعانىن ايتتى.

«قازىر جاڭا سالىق كودەكسىنىڭ جوباسى دايىندالدى. ونىڭ اياسىندا مۇلىكتىڭ قۇنى بەلگىلى ءبىر شەكتەن اسىپ تۇسسە، وعان سالىق جوعارى كوەففيتسيەنت بويىنشا سالىنادى. قازىر وسى پرينتسيپتى ۇستانىپ وتىرمىز. ءدال قازىر شەكتى مولشەردى جاريالاي المايمىن، سەبەبى تالقىلاۋ ءجۇرىپ جاتىر»، - دەدى ە. ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.

بۇل رەتتە ول قىمبات مۇلىككە كوەففيتسيەنت جوعارى بولاتىنىن ناقتىلادى.

«ماسەلەن، تۇرعىن ءۇيدىڭ باعاسى تىم جوعارى بولسا، ءتيستى دەڭگەي بەلگىلەنەدى»، - دەدى ۆيتسە- مينيستر.

بۇدان بۇرىن حابارلانعانداي، جاڭا سالىق كودەكسى پارلامەنت قاراۋىنا 15-مامىرعا دەيىن ەنگىزىلۋى كەرەك.

بيىل 7-قاڭتاردا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ جاڭا سالىق كودەكسىن ازىرلەۋ بارىسىنا كوڭىلى تولمايتىنىن ايتتى.

اۆتور

رۋسلان عابباسوۆ