ءسابىز باعاسى قىمباتتاپ، قيار ارزاندادى

استانا. KAZINFORM - ۇلتتىق ستاتيستيكا بيۋروسى ەلىمىز بويىنشا ناۋرىز ايىنداعى جانە ءبىر جىلداعى ينفلياتسيا تۋرالى مالىمەتتەردى جاريالادى.

2024-جىلعى ناۋرىزدا تۇتىنۋ باعالارىنىڭ ايلىق يندەكسى باياۋلاپ، 0,7 پايىزدى قۇرادى (وسى جىلعى اقپاندا - 1,1 پايىز). اقىلى قىزمەتتەر باعاسى 1,1 پايىز، ازىق-تۇلىك تاۋارلارى 0,6 پايىز، ازىق-تۇلىك ەمەس تاۋارلار 0,5 پايىز وسكەن.

تۇرعىن ءۇي-كوممۋنالدىق شارۋاشىلىق سالاسىندا سۋ بۇرۋ ءتاريفى 6,1 پايىز، ەلەكتر ەنەرگياسىنا - 5,9 پايىز، سۋىق سۋعا - 4,4 پايىز، ورتالىقتان جىلىتۋعا - 2,4 پايىز، ىستىق سۋعا 2,3 پايىز ءوستى. قوناق ءۇي قىزمەتتەرى - 1,7 پايىز، قوعامدىق تاماقتاندىرۋ قىزمەتتەرى - 1,2 پايىز، شاشتاراز قىزمەتى 0,8 پايىز قىمباتتاعان.

ازىق-تۇلىك تاۋارلارى ساناتىندا كوكونىستەر مەن جەمىستەردىڭ باعاسى ناۋرىزدا ەداۋىر وسكەنى بايقالادى. ونىڭ ىشىندە الما 4,7 پايىز، ءجۇزىم، ءسابىز 2,7 پايىدان، اق قاۋداندى قىرىققابات 1,4 پايىز قىمباتتاعان. باعانىڭ ءوسۋى قۇمشەكەرگە 3,2 پايىز، جۇمىرتقاعا - 1,5 پايىز، قىشقىل ءسۇت ونىمدەرىنە 1,3 پايىز، سۇتكە، نانعا 0,9 پايىزدان تىركەلدى. بۇل رەتتە قيار 7,1 پايىز، كۇنباعىس مايى 5,7 پايىز، باستى پياز 5 پايىز، قاراقۇمىق جارماسى 3 پايىز ارزاندادى.

وڭىرلەر اراسىندا ەڭ جوعارى ايلىق ينفلياتسيا پاۆلودار وبلىسىندا (2,1 پايىز)، ال ەڭ تومەنگى ينفلياتسيا تۇركىستان وبلىسىندا (0,2 پايىز) تىركەلدى.

وڭىرلەر بولىنىسىندە ەڭ جوعارى ازىق- تۇلىك تاۋارلارىنىڭ باعالارى جەتىسۋ وبلىسىندا 1,1 پايىز، ازىق-تۇلىك ەمەس تاۋارلار شىمكەنت قالاسىندا 1,2 پايىز، اقىلى قىزمەتتەر پاۆلودار وبلىسىندا 5,8 پايىز وسكەن.