COVID-19-عا قارسى ەگىلمەگەندەردى مەكتەپكە كىرگىزبەيدى دەگەن اقپارات - فەيك
بۇل اقپارات - جالعان، دەپ حابارلايدى stopfake.kz سايتى.
حابارلامادا اۆتور ق ر دەنساۋلىق ساقتاۋ ءمينيسترى الەكسەي سويدىڭ سوزىنە سۇيەنەدى. اعىمداعى جىلدىڭ 19- شىلدەسىندە «حابار 24» تەلەارناسىنىڭ ەفيرىندە مينيستر قازاقستانعا Pfizer/BioNTech وندىرگەن COVID-19 عا قارسى ۆاكسينانى جەتكىزۋ جوسپارى جايلى باياندادى.
بۇگىنگى تاڭدا بۇل پرەپارات كلينيكالىق سىناقتاردان ءوتىپ، 12 جاستان اسقان جاس وسپىرىمدەردى ۆاكسينالاۋ ءۇشىن ماقۇلدانعان.
الايدا، بۇل ءبىزدىڭ ەلىمىزدە 12 جاستان اسقان وقۋشىلارعا ۆاكسيناتسيا مىندەتتى بولادى جانە ونسىز بالالار مەكتەپكە بارا الماي، كەمسىتۋشىلىككە ۇشىرايدى دەگەننىڭ بەلگىسى ەمەس. الەكسەي سوي مۇنداي مالىمدەمە جاساعان جوق.
بىرىنشىدەن، Pfizer/BioNTech ۆاكسيناسىنىڭ العاشقى پارتياسى وسى جىلدىڭ قازان ايىندا، ياعني وقۋ جىلى باستالعاننان كەيىن اكەلىنۋى مۇمكىن.
ەكىنشىدەن، دەنساۋلىق ساقتاۋ ءمينيسترىنىڭ ءوزى حابارلاعانداي، بالالاردى COVID-19-عا قارسى ۆاكسينالاۋ تەك ەرىكتى تۇردە عانا جۇرگىزىلەدى جانە كامەلەتكە تولماعاندار اتا-انالارىنىڭ كەلىسىمىمەن عانا ەگىلەدى. دەمەك، ەكپە سالدىرماعان بالالاردى ءبىلىم الۋعا كونستيتۋتسيالىق قۇقىعىنان ايىرادى دەگەن قاۋەسەت نەگىزسىز جانە شىندىققا جاناسپايدى. قازاقستاندىق وقۋشىلار ۆاكسيناتسيا مارتەبەسىنە قاراماستان ءبىلىم الاتىن بولادى.
