نۇر-سۇلتاندا COVID-19 جۇقتىرعان ءبىر ناۋقاستىڭ جاعدايى اۋىر

نۇر-سۇلتان. قازاقپارات - نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلوردادا كوروناۆيرۋس ينفەكسياسىمەن تىركەلگەن سوڭعى ءۇش ناۋقاس تۋرالى ايتىپ بەردى، دەپ حابارلايدى قازاقپارات.

ونىڭ ايتۋىنشا، ءبىر ناۋقاس 21 -ناۋرىز كۇنى كەشكە انىقتالدى. ول كوروناۆيرۋس جۇقتىرعان اداممەن جاقىن بايلانىستا بولعان ادام رەتىندە تەكسەرۋگە الىنعان ەدى.

«22 -ناۋرىز كۇنى تاعى ەكى جاعداي تىركەلدى. ونىڭ بىرەۋى - وكپە قابىنۋى كۇدىگىمەن ستاتسيونارداعى بوكستا جاتقان. دياگنوستيكالاۋ كەزىندە كوروناۆيرۋس ينفەكسياسى انىقتالدى. قازىرگى ۋاقىتتا ونىڭ دەنە قىزۋى جوق، ءبىراق جاعدايى اۋىر. ەكى جاقتى پنيەۆمونيا، 1-دەڭگەيدەگى تىنىس جەتىپەۋشىلىگى بار. ءپانارالىق توپ كونسيليۋمى تاعايىندادى»، - دەدى باسقارما باسشىسى «حابار 24» تەلەارناسىندا وتكەن بريفينگتە.

«قالعان 30 ناۋقاستىڭ جاعدايى قاناعاتتانارلىق، دەنە قىزۋى شەكتى مەجەدە. كوروناۆيرۋستىق ينفەكسيا بويىنشا حاتتاماعا سايكەس ەم-دوم الىپ جاتىر»، - دەدى س. قيسىقوۆا.

ايتا كەتەيىك، قازاقستان رەسپۋبليكاسى اۋماعىندا كوروناۆيرۋس ينفەكسياسىن جۇقتىرعان جالپى 56 ناۋقاس تىركەلدى. نۇرسۇلتان قالاسىندا 31 ادامدا كوروناۆيرۋس ينفەكسياسى انىقتالدى. الماتى قالاسىندا - 22 ادام، قاراعاندى قالاسىندا - 2، الماتى وبلىسىندا 1 ادام. بۇعان دەيىن باسقارما باسشىسى ەلوردادا نۇرسۇلتان نازاربايەۆ اتىنداعى اۋەجايعا كەلگەن 600 گە جۋىق جولاۋشىنىڭ تەكسەرىلىپ جاتقانىن حابارلادى.

اۆتور: ايجان سەرىكجان قىزى