ءۇندىستاننان رەسەيگە اۆتوستوپپەن شىققان ساياحاتشى قازاقستاندا جولدا قالدى
سەمەي. KAZINFORM - ءۇندىستاننان رەسەيگە اۆتوستوپپەن شىققان ساياحاتشى اباي وبلىسى پوليتسەيلەرىنەن كومەك سۇرادى.
پوليتسيا قىزمەتكەرلەرى «كوردون» بەكەتىندە رەسەي فەدەراتسياسىنىڭ ازاماتىنا كومەك كورسەتتى. ول ءۇندىستاننان اۆتوستوپپەن كەلە جاتقان.
- پوليتسيا كاپيتانى ازامات احماديەۆكە جانە پوليتسيانىڭ اعا لەيتەنانتى ەستاي مۋسينگە 40 جاستاعى رەسەي فەدەراتسياسىنىڭ ازاماتى يگور جۋكوۆ جۇگىندى. ول شەكاراعا دەيىن كولىك تابۋعا كومەك سۇرادى. ءتارتىپ ساقشىلارى ساياحاتشىعا كومەك كورسەتىپ، شەكارادان ءوتۋ ءتارتىبىن ءتۇسىندىرىپ، ونىڭ ءارى قارايعى جولىن قاۋىپسىز تۇردە ۇيىمداستىرۋعا كومەكتەستى، - دەپ حابارلادى وبلىستىق پوليتسيا دەپارتامەنتىنەن.
يگور جۋكوۆ تەك پوليتسەيلەرگە ەمەس، بارشا قازاق ەلىنە ريزاشىلىعىن ءبىلدىردى.
- اۆتوستوپپەن بىرنەشە مەملەكەتتى ارالاپ، ەندى مىنە قازاقستانعا تابان تىرەپ وتىرمىن. مۇنداعى حالىقتىڭ قوناقجايلىعى كەرەمەت. مەيىرىم توگىپ، اركەز كومەكتەسۋگە ءازىر تۇرادى. سول ءۇشىن سىزدەرگە شىن جۇرەكتەن العىس ايتامىن! - دەدى ساياحاتشى.
ەسكە سالساق، بۇعان دەيىن اباي وبلىسىندا 1300-دەن استام جۇرگىزۋشى قاۋىپسىزدىك بەلدىگىن تاقپاعانى ءۇشىن جازالانعانى جايلى جازعانبىز.
اۆتور
تالعاتجان مۇحامەتبەك ۇلى
