ءۇندىستاندىق ايەل مۇگەدەك كۇيەۋىن ارقالاپ، جاياۋ 150 شاقىرىم جولدى ەڭسەردى
استانا. KAZINFORM - ءۇندىستاندا ەكى جاس بالاسىن ەرتىپ العان اشا ەسىمدى ايەل كۇيەۋى ساچيندى ارقالاپ، حاريدۆار قالاسىنان ماديناگارعا جاياۋ باردى، دەپ حابارلايدى Times Now.
ەلدەگى شيۆا تابىنۋشىلارىنا ارنالعان جىل سايىنعى زيارات بولىپ تابىلاتىن كانۆار ياترا راسىمىندە ول قاسيەتتى گانگا وزەنىنەن سۋ اكەلۋ ءۇشىن كۇيەۋىن ارقالاپ الدى. ونىڭ جۇبايى ساچين بىلتىر ومىرتقاسىنا وتا جاسالعان سوڭ بەلىنەن تومەنگى جاعى سال بولىپ، جۇرە الماي قالعان. ول بۇل ءدىني مەرەكەگە 13 جىل بويى ءوزى قاتىسقان. ءبىراق بيىل سال اۋرۋىنا شالدىققان ول ايەلىنىڭ كومەگىمەن قاتىسۋعا مۇمكىندىك الدى.
اشا مۇنى كۇيەۋىنىڭ اياعىنان تۇرىپ، تولىق ساۋىعىپ كەتۋى ءۇشىن عانا جاساپ جاتقانىن ايتتى. ايەل وسى ارەكەتىنەن كەيىن ينتەرنەتتە ۇلكەن تانىمالدىلىققا يە بولدى. الەۋمەتتىك جەلى قولدانۋشىلارى ونىڭ بۇل ارەكەتىن ەرەكشە ماحاببات پەن ادالدىقتىڭ سيمۆولى رەتىندە باعالادى.
كانۆار ياترا 1980-جىلداردىڭ اياعىنا دەيىن بىرنەشە اۋليەلەر مەن قارت تابىنۋشىلاردىڭ شاعىن ءراسىمى رەتىندە وتكىزىلىپ، كەيىن تانىمال بولا باستاعان. بۇگىندە ءۇندىستانداعى ەڭ ءىرى جىل سايىنعى ءدىني ءىس-شاراعا اينالدى. 2023 - 2024 -جىلدارداعى زياراتقا 30 ميلليونعا جۋىق ءدىندارلار قاتىستى.
