ءۇندىستانداعى ۇشاق اپاتى: قۇتقارۋشىلار 60 ادامنىڭ دەنەسىن تاپتى
نيۋ- دەلي. KAZINFORM - ءۇندىستاننىڭ باتىسىندا بولعان جولاۋشىلار ۇشاعى اپاتىنىڭ ورنىنان 60 ادامنىڭ ءمايىتى تابىلدى. بۇل تۋرالى The New Indian Express باسىلىمى حابارلادى، دەپ جازدى تاسس.
بار مالىمەتتەرگە قاراعاندا، قازا تاپقانداردىڭ جالپى سانى 150 ادامعا جەتۋى مۇمكىن. قۇتقارۋشىلار قيراندىلار اراسىنان تابىلعان 60 ءمايىتتىڭ ونىن مەديتسينالىق كوللەدجدىڭ جاتاقحانا اۋماعىنان شىعارعان.
اتالعان جاتاقحانا - Air India ۇشاعى قۇلاعان جەر.
بۇعان دەيىن ءۇندىستان پوليتسياسى Air India ۇشاعى دارىگەرلەرگە ارنالعان جاتاقحانا عيماراتىنا قۇلاعانىن حابارلاعان بولاتىن.
ەسكە سالا كەتەيىك، Air India اۋەكومپانياسىنىڭ Boeing 787 Dreamliner ۇشاعى احمەداباد قالاسىنداعى ساردار ۆاللابحبحايا پاتەلا حالىقارالىق اۋەجايىنان ۇشىپ شىققاننان كەيىن كوپ ۇزاماي اپاتقا ۇشىرادى.
احمادابادتان 13:38- دە كوتەرىلگەن Boeing 787-8 ۇشاعىنىڭ بورتىندا 242 جولاۋشى مەن ەكيپاج مۇشەلەرى بولعان. ولاردىڭ 169-ى ءۇندىستان ازاماتى، 53- ءى ۇلى بريتانيا ازاماتى، بىرەۋى كانادا ازاماتى جانە جەتەۋى پورتۋگاليا ازاماتى بولعانى حابارلاندى.
قازاقستان پرەزيدەنتى ءۇندىستان پرەمەر-مينيسترىنە كوڭىل ايتۋ جەدەلحاتىن جولدادى.
ارتىنشا ءۇندىستانداعى ۇشاق اپاتى بولعان جەردە 20 مەديتسينا ستۋدەنتى جاراقات العانى بەلگىلى بولدى.
قازاقستاننىڭ نيۋ- دەليدەگى ەلشىلىگى ءۇندىستاننىڭ قۇزىرلى ورگاندارىمەن بايلانىستا. Air India ۇشاعىنىڭ اپاتىنان قازا تاپقان نەمەسە زارداپ شەككەن قازاقستان ازاماتتارى تۋرالى اقپارات تۇسكەن جوق، - دەپ حابارلادى ق ر سىرتقى ىستەر مينيسترلىگى.
