ءۇندىستاندا توعىز پوليتسەي ءولىم جازاسىنا كەسىلدى
استانا. KAZINFORM - ءۇندىستاندا COVID-19 پاندەمياسى كەزىندە قاماۋدا بولعان اكە مەن بالانىڭ ولىمىنە قاتىسى بار توعىز پوليتسەي ءولىم جازاسىنا كەسىلدى، دەپ حابارلايدى BBC.
58 جاستاعى پ. جايارادج جانە ونىڭ 38 جاستاعى ۇلى بەنيكس ەلدىڭ وڭتۇستىگىندەگى تاميلناد شتاتىنداعى تۇرمەدە كوز جۇمدى. ولار COVID-19 پاندەمياسى كەزىندە كارانتين تالاپتارىن بۇزدى دەگەن كۇدىكپەن ۇستالعان ەدى. ناقتىراق ايتقاندا، وزدەرىنىڭ ۇيالى تەلەفون دۇكەنىن اشىق ۇستاعانى ءۇشىن قاماۋعا الىنعان.
دۇيسەنبى كۇنى ۇكىم شىعارعان سۋديا ەكى ەر ادامنىڭ ءبىر-ءبىرىنىڭ كوز الدىندا شەشىندىرىلىپ، اسا قاتىگەزدىكپەن سوققىعا جىعىلعانىن ايتىپ، بۇل ءىستى بيلىكتى اشىق تۇردە اسىرا پايدالانۋ دەپ اتادى.
- ولار مۇنى ءولتىرۋ نيەتىمەن جاسادى، - دەدى سۋديا.
پوليتسەيلەر وتكەن ايدا كىسى ءولتىردى دەپ تانىلعان. ولار سوت ۇكىمىنە شاعىم تۇسىرە الادى.
- ولار قارۋسىز ادامدارعا شابۋىل جاسادى. ولاردى كەشىرۋگە بولمايدى. جاسى نەمەسە وتباسىلىق جاعدايىنا قاراپ، جەڭىل جازا تاعايىنداۋعا بولمايدى. ولاردىڭ بارلىعى - ءبىلىمدى ادامدار، - دەدى سۋديا ۇكىم شىعارۋ كەزىندە.
جالپى العاندا، اكە مەن بالانىڭ قاتىگەزدىكپەن ولتىرىلۋىنە بايلانىستى ون پوليتسەي قاماۋعا الىنعان. الايدا ايىپتالۋشىلاردىڭ ءبىرى 2020 -جىلى COVID-19 ىندەتىنەن قايتىس بولدى.
بۇل وقيعا تاميلنادتا جاپپاي نارازىلىق تۋدىردى. كوشەگە شىققانداردىڭ اراسىندا شتاتتاعى وپپوزيتسيا دەپۋتاتتارى دا بولدى.
وپپوزيتسيا جەتەكشىسى راحۋل گاندي مەن ءۇندى كريكەتىنىڭ جۇلدىزى شيكحار دحاۆان الەۋمەتتىك جەلىلەردە وسى ەكى ازاماتقا ادىلدىك تالاپ ەتكەندەردىڭ قاتارىندا بولدى.
بۇل ءولىم وقيعاسى ءۇندىستانداعى پوليتسيا وزبىرلىعى ماسەلەسىنە قوعام نازارىن قايتا اۋدارتتى.
قۇقىق قورعاۋ ۇيىمدارىنىڭ مالىمەتىنشە، ءۇندىستاندا جىل سايىن جۇزدەگەن ادام قاماۋدا كوز جۇمادى. ولار كۇدىكتىلەردەن مويىنداتۋ الۋ ءۇشىن ازاپتاۋ مەن قورلاۋ پوليتسيا تاجىريبەسىنىڭ ءبىر بولىگىنە اينالعانىن ايتادى.
وسى جىلدىڭ باسىندا ب ۇ ۇ-نىڭ بىرنەشە ساراپشىسى ءۇندىستاندى پوليتسيا قىزمەتىن حالىقارالىق ادام قۇقىقتارى ستاندارتتارىنا سايكەستەندىرۋ ءۇشىن اۋقىمدى رەفورمالار جۇرگىزۋگە شاقىرعان ەدى.
ايتا كەتەيىك، بۇعان دەيىن قازاقستان مەن ءۇندىستان كريميناليستيكا جانە سيفرلىق تەرگەۋ بويىنشا بىرلەسكەن باعدارلاما ازىرلەيتىنىن جازدىق.
