ءۇندىستاندا تۋريستەرگە جاسالعان شابۋىلدان بىرنەشە ادام قازا تاپتى
نيۋ- دەلي. KAZINFORM - ءۇندىستاننىڭ سولتۇستىگىندەگى دجاممۋ مەن كاشمير وداقتاس ايماعىندا بولعان قارۋلى شابۋىلدان كەمىندە 25 تۋريست قازا تاۋىپ، 20 عا جۋىق ادام جاراقات العان، دەپ حابارلادى ت ا س س.
بۇل تۋرالى The Print پورتالى قورعانىس جانە قاۋىپسىزدىك سالاسىنداعى دەرەككوزدەرگە سىلتەمە جاساپ مالىمەت تاراتتى. الايدا وزگە ءۇندى اقپارات قۇرالدارى قايتىس بولعاندار سانىنا قاتىستى ءارتۇرلى دەرەك كەلتىرۋدە. رەسمي بيلىك ازىرگە ناقتى ساندى جاريالاعان جوق.
شابۋىل پاحالگام ايماعىندا بولعان. بەلگىسىز قارۋلى ادامدار بايساران اڭعارى بويىمەن جاياۋ كوتەرىلىپ كەلە جاتقان تۋريستەرگە وق جاۋدىرعان. وقيعا ورنىنا دەرەۋ قاۋىپسىزدىك كۇشتەرى مەن مەديتسينا قىزمەتكەرلەرى كەلگەن. جەرگىلىكتى بيلىك بۇل شابۋىلدى لاڭكەستىك ارەكەت دەپ اتادى.
ءۇندىستان پرەمەر- ءمينيسترى نارەندرا مودي ساۋد ارابياسىنا ساپارى بارىسىندا ەلدىڭ ىشكى ىستەر ءمينيسترى اميت شاحپەن تەلەفون ارقىلى سويلەسىپ، بارلىق قاجەتتى شارانى قابىلداۋدى جانە وقيعا ورنىنا بارۋدى تاپسىردى.
ءوز كەزەگىندە مينيستر اميت شاح بۇل جانتۇرشىگەرلىك شابۋىلدىڭ ۇيىمداستىرۋشىلارى جازاسىز قالمايتىنىن ايتىپ، دجاممۋ مەن كاشميرگە جول تارتىپ كەتكەنىن حابارلادى. وندا ول بارلىق ۆەدومستۆومەن شۇعىل قاۋىپسىزدىك كەڭەسىن وتكىزبەك.
ايتا كەتەيىك، بۇعان دەيىن ا ق ش- تاعى ۇندىلىك ستۋدەنتتەر ۇساق- تۇيەك ءتارتىپ بۇزعانى ءۇشىن دە دەپورتاتسيالانۋى مۇمكىن ەكەنىن جازعان ەدىك.
