ءۇندىستان قىتايمەن شەكاراسىنا ون مىڭ اسكەر جىبەردى
استانا. Kazinform - ءۇندىستان قىتايمەن اراداعى شەكارانى كۇزەتۋ ءۇشىن قوسىمشا 10000 اسكەر جىبەرىپ، ايماقتا اسكەر سانىن ەكى ەسەگە ارتتىردى.
بۇل تۋرالى Bloomberg اگەنتتىگى ۇندىلىك شەنەۋنىكتەرگە سىلتەمە جاساپ حابارلادى.
ايتۋلارىنشا، بۇعان دەيىن ەلدىڭ باتىس شەكاراسىندا قىزمەت ەتكەن 10 مىڭ سارباز قازىر قىتايمەن اراداعى داۋلى شەكارانىڭ ءبىر بولىگىن نىعايتۋعا جۇمىلدىرىلعان.
سونىمەن قاتار، ءۇندىستاننىڭ قىتايمەن شەكاراسىندا ورنالاسقان توعىز مىڭ ساربازدان تۇراتىن كونتينگەنت جاڭادان قۇرىلعان جاۋىنگەرلىك قولباسشىلىققا بەرىلەدى. شەكارانىڭ 532 شاقىرىمدىق بولىگىن قارۋلى كۇشتەردىڭ ەكى بولىمشەسى كۇزەتەدى.
ءۇندىستاننىڭ قارۋلى كۇشتەرى مەن ەلدىڭ قورعانىس مينيسترلىگىنىڭ وكىلدەرى جاعدايعا قاتىستى پىكىر بىلدىرگەن جوق.
انىقتاما ءۇشىن، ءۇندىستان مەن قىتايدىڭ گيمالايداعى داۋلى شەكارالىق ايماعى بار. 2022 -جىلدىڭ جەلتوقسانىندا ءۇندىستان اسكەرى مەن قىتاي ارمياسى اراسىندا شەكارالىق قاقتىعىس بولعان.
اۆتور
جاراسقان نۇرىبايەۆ
