ءۇندىستان قىتاي ازاماتتارىنا تۋريستىك ۆيزا بەرۋدى قايتا باستايدى
استانا. KAZINFORM - ءۇندىستان 2025-جىلعى 24-شىلدەدەن باستاپ قىتاي ازاماتتارىنا تۋريستىك ۆيزالار بەرۋدى قايتا جانداندىرادى، دەپ حابارلايدى NDTV.
2020-جىلى ءۇندىستان COVID-19 پاندەمياسىنا بايلانىستى بارلىق تۋريستىك ۆيزانى بەرۋدى ۋاقىتشا توقتاتقان بولاتىن.
ءۇندىستاننىڭ بەيجىڭدەگى ەلشىلىگىنىڭ حابارلاۋىنشا، قىتاي ازاماتتارى تۋريستىك ۆيزا الۋ ءۇشىن ونلاين ءوتىنىم تولتىرىپ، قابىلداۋعا جازىلىپ، ءتولقۇجات پەن قاجەتتى قۇجاتتاردى ءۇندىستاننىڭ بەيجىڭ، شانحاي جانە گۋانجوۋ قالالارىنداعى ۆيزالىق ورتالىقتارعا جەكە تاپسىرۋى ءتيىس.
COVID-19 پاندەمياسى جانە 2020-جىلى گالۆان وزەنىندەگى قاقتىعىستاردان كەيىن ءۇندىستان مەن قىتاي اراسىنداعى قاتىناستار ايتارلىقتاي شەكتەلگەن. قىتاي بىرتىندەپ ءۇندىستان ازاماتتارىنا، اسىرەسە ستۋدەنتتەر مەن كاسىپكەرلەرگە ۆيزا بەرۋدى قايتا باستاعانىمەن، تۋريستىك ساپارعا شەكتەۋ ساقتالىپ كەلدى.
2023-جىلدىڭ قازان ايىندا ءۇندىستان پرەمەر-ءمينيسترى نارەندرا مودي مەن ق ح ر ءتوراعاسى شي جينپيڭ قازاندا كەزدەسۋ وتكىزىپ، ەكىجاقتى قارىم-قاتىناستى جاقسارتۋعا باعىتتالعان ءبىرقاتار شەشىم قابىلداعان ەدى.
NDTV مالىمەتىنشە، بيىلعى جىلدىڭ باسىندا قوس ەل قارىم-قاتىناستى قالپىنا كەلتىرۋ جولدارىن تالقىلاپ، گۋمانيتارلىق بايلانىستاردى كەڭەيتۋ بويىنشا شارالار قابىلداۋعا ۋاعدالاسقان.
ايتا كەتەيىك، بۇعان دەيىن تايلاندتىڭ بۇرىنعى پرەمەر-ءمينيسترى تاكسين چيناۆات ەلدە 1 ميلليون دوللار كولەمىندە ينۆەستيتسيا سالعان شەتەلدىكتەرگە ارنالعان «التىن ۆيزالاردى» ەنگىزۋ تۋرالى ۇسىنىس جاساعان بولاتىن.
ايتا كەتەلىك ءۇندىستان العاشقى وتاندىق چيپىن 2025-جىلى شىعارادى.
