ءۇندىستان مەن پاكىستان اراسىنداعى احۋال شيەلەنىستى

استانا. KAZINFORM - ءۇندىستان باسقاراتىن كاشميردەگى تانىمال تۋريستىك ورتالىقتا قارۋلى ادامدار توبى 26 ادامدى ولتىرگەننەن كەيىن ءۇندىستان پاكىستانعا قارسى شارالاردى جاريالادى.

قابىلدانعان شارالار قاتارىنا ەكى ەل اراسىنداعى نەگىزگى شەكارا وتكەلىن جابۋ، سۋدى ءبولىسۋ تۋرالى كەلىسىمدى توقتاتۋ، ديپلوماتتاردى شىعارۋ جانە كەيبىر پاكىستاندىقتاردىڭ ەلدەن 48 ساعات ىشىندە كەتۋىن تالاپ ەتۋ كىردى.

ءوزىنىڭ شابۋىلعا قاتىسى جوق دەپ سانايتىن پاكىستان بيلىگى بەيسەنبى كۇنى جاۋاپ بەرۋ ءۇشىن كەزدەسۋ وتكىزەدى، دەپ مالىمدەدى پاكىستان سىرتقى ىستەر ءمينيسترى.

پاحالگامداعى شابۋىل سوڭعى ۋاقىتتاعى ايماقتاعى ەڭ قاندى وقيعالاردىڭ ءبىرى بولدى جانە ونسىز دا شيەلەنىسكەن ەكىجاقتى قارىم-قاتىناستى ودان ءارى قيىنداتا ءتۇسۋى مۇمكىن.

ءۇندىستان ۇكىمەتى بۇل شابۋىلعا قاتاڭ جاۋاپ بەرىپ، جاۋاپكەرشىلىكتى جاناما تۇردە پاكىستانعا جۇكتەپ وتىر.

- بۇل جانتۇرشىگەرلىك ارەكەتتىڭ ارتىندا تۇرعاندار جازالانادى. لاڭكەستىكپەن كۇرەسۋدەگى ءبىزدىڭ شەشىمىمىز اينىمايدى جانە ودان ءارى كۇشەيە تۇسەدى - دەدى ءۇندىستان پرەمەر-ءمينيسترى نارەندرا مودي.

ءۇندىستان سونداي- اق ونداعان جىلدار بويى شيەلەنىسكە توتەپ بەرە العان 1960 -جىلعى يند سۋلارى تۋرالى كەلىسىمدى توقتاتاتىنىن مالىمدەدى. بۇل پاكىستاننىڭ ءبىرقاتار ايماعىن قۇرعاقشىلىققا ۇرىندىرۋى مۇمكىن.

ءۇندىستان قاۋىپسىزدىك قىزمەتتەرىنىڭ مالىمەتىنشە، شابۋىلدىڭ ارتىندا «كاشمير قارسىلاسۋى» دەپ اتالاتىن توپ تۇر.

سارسەنبى كۇنى كەشكە شابۋىلداۋشىلاردى ىزدەۋ جالعاستى. پاكىستان ۇكىمەتى ۇلتتىق قاۋىپسىزدىك كەڭەسىنىڭ وتىرىسى بەيسەنبى كۇنى وتەتىنىن حابارلادى.

پاحالگامداعى شابۋىلدان كەيىن پاكىستان سىرتقى ىستەر مينيسترلىگى تۋريستەردىڭ ولىمىنە الاڭداۋشىلىق ءبىلدىرىپ، كوڭىل ايتتى.

سونداي-اق ءۇندىستان تاراپىنان سارسەنبى كۇنى قولعا الىنعان شارالارعا سايكەس، دەلي ەلىشىلىگىندەگى پاكىستاندىق اسكەر كەڭەسشىلەرگە شۇعىل تۇردە ەلدەن كەتۋ بۇيىرىلدى، كەلەسى اپتادا تاعى ديپلوماتتاردى ەلدەن شىعارۋ جوسپارلانىپ وتىر.

بۇعان دەيىن كاشميردىڭ ءۇندىستان بولىگىندە قارۋلى ادامدار تۋريستەر توبىنا وق جاۋدىرعان. پوليتسيانىڭ مالىمەتىنشە، 26 ادام قازا تاۋىپ، 17 ادام جاراقات الدى.

ۇندىلىك باسپا ءسوزدىڭ حابارلاۋىنشا، قازا بولعانداردىڭ ەكەۋى نەپال جانە ب ا ءا ازاماتتارى، تاعى ەكەۋى - جەرگىلىكتى تۇرعىندار، قالعاندارى ءۇندىستاننىڭ باسقا ايماقتارىنان كەلگەن تۋريستەر ەدى.

اتىس بولعان پاحالگام - تۋريستەر ءۇشىن تانىمال ورىن. ول ءۇندىستان مەن پاكىستان تالاسىپ وتىرعان داۋلى اۋماق، ءۇندىستاننىڭ باقىلاۋىندا. ونداعى حالىق نەگىزىنەن مۇسىلماندار.

بۇعان دەيىن قازاقستان پرەزيدەنتى ءۇندىستان پرەمەر-مينيسترىنە كوڭىل ايتقانىن جازعان بولاتىنبىز.

پرەزيدەنت حالىققا قارسى جاسالعان بۇل زورلىق- زومبىلىقتى قاتاڭ ايىپتايتىنىن جەتكىزىپ، زارداپ شەككەن ازاماتتاردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.

اۆتور

زارينا تۋعانبايەۆا