ءۇندىستان مەن پاكىستان اۋە كۇشتەرى قيان-كەسكى شايقاس جۇرگىزدى
استانا. قازاقپارات - ءۇندىستان مەن پاكىستاننىڭ اۋە كۇشتەرى شەكارادا قيان-كەسكى شايقاس جۇرگىزدى. CNN تەلەاراناسىنىڭ حابارلاۋىنشا، وعان ەكى جاقتان باس-اياعى 125 جويعىش ۇشاق قاتىسقان.
ءبىراق ەكى جاق ءبىر-ءبىرىنىڭ اۋە كەڭىستىگىنە كىرمەي، 160 شاقىرىمداي قاشىقتىقتان سوعىسقان. پاكىستان ءۇندىستاننىڭ 5 جويعىش ۇشاعىن اتىپ تۇسىرگەنىن مالىمدەدى. نيۋ-دەلي بۇل اقپاردى راستاعان جوق. ۇرىس ءبىر ساعاتقا سوزىلعان. CNN ۇشاقتاردىڭ شەكارانى كەسىپ وتپەي، الىستان شايقاسۋىن 2019 -جىلعى وقيعامەن بايلانىستىرادى. ول كەزدە پاكىستان ءۇندى جويعىش ۇشاعىن اتىپ ءتۇسىرىپ، ۇشقىشىن قايتارماس بۇرىن تەلەارنادان كورسەتىپ ماسقارالاعان ەدى. «بۇل جولى تاراپتار سونداي جاعدايدىڭ قايتالانباۋىنا كۇش سالسا كەرەك»، - دەپ توپشىلايدى.
پاكىستان مەن ءۇندىستان اراسىندا اقپاراتتىق سوعىس باستالعان سىڭايلى. ويتكەنى ەكى تاراپ تاراتقان دەرەكتەر ءبىر-بىرىنە قايشى. ماسەلەن، پاكىستان ءۇندىستاننىڭ 12 درونىن اتىپ تۇسىرگەنىن مالىمدەدى. ەل اسكەرىنىڭ رەسمي وكىلى احمەد شاريف چاۋدحريدىڭ ايتۋىنشا، ولارمەن پاكىستاننىڭ اسكەري نىساندارىنا سوققى جاسالماق بولعان.
الايدا ءۇندىستان تاراپى پاكىستان اسكەرىنىڭ باسپا ءسوز قىزمەتى تاراتقان كەي اقپارات جالعان ەكەنىن مالىمدەدى. رەسمي نيۋ- دەلي: «لاحور قالاسىنىڭ ماڭىندا اتىپ تۇسىرىلگەن دروننىڭ سۋرەتى - 2022 -جىلى ۋكراينادا تۇسىرىلگەن كادرلار»، - دەيدى. سونداي-اق پاكىستان كۇشتەرىنىڭ 1 ءۇندى جويعىش ۇشاعىن اتىپ قۇلاتقانى جايلى مالىمەتى دە وتىرىك دەپ وتىر.
احۋالدىڭ ۋشىعۋىنا بايلانىستى ءۇندىستاننىڭ سولتۇستىگىندە 21 اۋەجاي جابىلدى. ولار 10- مامىرعا دەيىن جۇمىس ىستەمەيدى. سالدارىنان 150-گە جۋىق رەيس كەيىنگە شەگەرىلدى. بۇعان دەيىن پاكىستان ءوز اۋە كەڭىستىگىن 48 ساعاتقا جاپقان ەدى. ءبىراق قازىر اۋەجايلاردىڭ كوبى جۇمىسىن قايتا جانداندىردى. ال حالىقارالىق اۋە كومپانيالارى وڭىرگە رەيستەرىن ۋاقىتشا توقتاتىپ جاتىر.
24.kz
