ءۇندىستان عارىشقا ادام ءتارىزدى روبوتتى ۇشىرادى

 استانا. kazinform - ءۇندىستان 2024-جىلدىڭ ءۇشىنشى توقسانىندا «Vyommitra» ەسىمدى ادام ءتارىزدى روبوتتى وربيتاعا جىبەرۋدى جوسپارلاپ وتىر.

ت ا س س اقپارات اگەنتتىگىنىڭ حابارلاۋىنشا، بۇل تۋرالى ءۇندىستاننىڭ عىلىم جانە تەحنولوگيا ءمينيسترى دجيتەندرا سينگح مالىمدەمە جاساعان.

- بۇل ميسسيا 2024 -جىلدىڭ ءۇشىنشى توقسانىنا جوسپارلانعان جانە عارىش كەمەسىنىڭ استروناۆتى عارىشتىق ورتاداعى ادامنىڭ فۋنكتسيالارىن يميتاتسيالاۋعا جانە تىرشىلىكتى قامتاماسىز ەتۋ جۇيەلەرىمەن بايلانىس ورناتۋعا ارنالعان،- دەدى مينيستر.

ونىڭ ايتۋىنشا، روبوت وربيتالىق مودۋلدىڭ پارامەترلەرىن باقىلاپ، كەمەنىڭ التى پانەلىن باسقارىپ، سۇراقتارعا جاۋاپ بەرە الادى.

روبوت اتاۋى ەكى سانسكريت سوزىنەن، «vyom»- عارىش جانە «mitra»- دوس دەگەن سوزدەن شىققان. عارىشقا ۇشىرىلعالى وتىرعان روبوت ايەل كەيپىنە ەنىپ، بىرنەشە تىلدەگى سۇراقتارعا وڭاي جاۋاپ بەرە الادى. كەمەنىڭ تەحنيكالىق جاعدايى تۋرالى اقپارات ونىڭ جاساندى ينتەللەكتىنە جۇكتەلگەن.

ءۇندىستان عارىشتىق زەرتتەۋلەر ۇيىمىنىڭ (ICRO) باسشىسى شريدحارا پانيكەر سومناتحتىڭ ايتۋىنشا، ءۇندىستان 2025 -جىلدىڭ سوڭىنا قاراي ءوزىنىڭ العاشقى ادام باسقاراتىن عارىش كەمەسىن ۇشىرماق.

2018 -جىلدىڭ تامىز ايىندا ەلدىڭ بريتاندىق وتارشىلدىق رەجيمىنەن تاۋەلسىزدىك العانىنا 75 جىل تولۋىنا وراي پرەمەر-مينيستر نارەندرا مودي ءۇندىستاننىڭ ۇلى نەمەسە قىزى 2022-جىلعا قاراي ءۇندىستاننىڭ ۇلتتىق تۋىن عارىشقا جەلبىرەتەتىنىن مالىمدەدى. جوبانىڭ «گاگانيان» اتاۋى سانسكريت تىلىنەن اۋدارعاندا «اسپان كەمەسى» دەگەندى بىلدىرەدى. الايدا 2020 -جىلدىڭ ناۋرىز ايىندا باستالعان COVID-19 پاندەمياسىنا بايلانىستى بۇل جوبا بويىنشا جۇمىس توقتاتىلدى.

بۇل ميسسيا ءساتتى اياقتالعاننان كەيىن وربيتاعا ايەل ەكيپاجىن شىعارۋ جوسپارلانعان بولاتىن. سوندىقتان دا بولار، ۇندىلىك عارىش اگەنتتىگى عارىشتا ايەل كەيپىندەگى العاشقى ادام ءتارىزدى روبوت جاساۋدى ۇيعاردى. دەگەنمەن، ازىرگە ءۇندىستاننىڭ العاشقى عارىشتىق ميسسياسىنا نەگىزگى ۇمىتكەر رەتىندە 4 ادام عانا تاڭدالدى. عارىشكەرلەردىڭ اتى-ءجونى ءالى جاريالانعان جوق، ءبىراق ولاردىڭ بارلىعى اۋە كۇشتەرىنىڭ بۇرىنعى ۇشقىشتارى ەكەنى بەلگىلى. ۇمىتكەرلەر رەسەيدەگى يۋري گاگارين اتىنداعى عارىشكەرلەردى دايارلاۋ ورتالىعىندا دايىندىقتان وتكەن.

First half humanoid that will be a part of @isro Gaganyaan unmanned mission. Humanoid will take off into space this December 2020 pic.twitter.com/BLHFNZNv3S

— Nagarjun Dwarakanath (@nagarjund) January 22, 2020