ءمۇفتيات د ن ق اناليزگە قاتىستى ءپاتۋا شىعاردى

استانا. KAZINFORM - قازاقستان مۇسىلماندارىنىڭ ءدىني باسقارماسى بالاعا د ن ق اناليز جاساۋعا قاتىستى ءپاتۋا شىعارىپ، يسلام ءدىنى بويىنشا قانداي جاعدايدا ساراپتاما ناتيجەسىنە جۇگىنۋ كەرەكتىگىن اتادى.

ق م د ب مالىمەتىنە سۇيەنسەك، شاريعات بويىنشا بالانىڭ تەگىن انىقتاۋدىڭ ءتورت جولى بار.

- ولار: بالانىڭ اق نەكەمەن دۇنيەگە كەلۋى، اكەسى بالام دەپ مويىنداۋى، كۋالىك كەلتىرۋى جانە قيافا ارقىلى (ۇقساتۋ ياعني بالاسىن اكەسىنە ۇقساتۋى) بەكيدى. ال بۇگىندە بالانىڭ تەگى د ن ق ارقىلى انىقتالىپ ءجۇر. بالانىڭ اق نەكەمەن دۇنيەگە كەلۋى جايلى مىنا وقيعانى مىسالعا كەلتىرۋگە بولادى: ساعد يبن ءابي ۋاققاس پەن ابد يبن زامعا ەكەۋى ءبىر بالاعا تالاسىپ قالعاندا پايعامبارىمىز (وعان اللانىڭ سالاۋاتى مەن سالەمى بولسىن) «بالا - توسەك يەسىنىكى» … - دەپ، بالانى ابد يبن زامعاعا شەشىپ بەرگەن، - دەپ جازادى ءمۇفتيات.

وسى رەتتە ءمۇفتيات دنق ادىسىمەن تەكتى انىقتاۋ شاريعاتتا تەكتى انىقتاۋدىڭ ءتورت جولىنان بۇرىن تۇرا ما، الدە كەيىن تۇرا ما دەگەن ماسەلەدە ەكى ۇستانىم بار ەكەنىن العا تارتىپ وتىر.

ءمۇفتيات جازعانداي، ءبىرىنشىسى، كوپشىلىك عالىمداردىڭ كوزقاراسى بويىنشا، د ن ق ارقىلى تەكتى انىقتاۋ قيافادان (ۇقساتۋ) جوعارى تۇرادى. ەكىنشىسى، كەيبىر عالىمدار د ن ق ارقىلى تەكتى انىقتاۋ ناقتى دالەلگە جاتادى ءارى باسقا دالەلدەرگە قاراعاندا جوعارى تۇرادى.

ال ءمۇفتيات كەلتىرگەن دەرەككە سۇيەنسەك، يسلام فيقھ اكادەمياسىنىڭ د ن ق- عا قاتىستى №194 قارارىندا «مىنا ءتورت ماسەلەدە د ن ق ارقىلى تەكتى انىقتاۋعا جۇگىنۋگە بولادى» دەپ جازادى.

4 جاعدايدى اتاعان:

تەگى بەلگىسىز بالاعا ەكى تاراپ تالاسىپ قالعاندا؛

اۋرۋحانادا، جەتىمدەر ۇيىندە بالالار اۋىسىپ كەتكەندە؛

تابيعي اپاتتار مەن سوعىس جاعدايىندا قايتىس بولعان ادامنىڭ، جوعالىپ كەتكەن بالانىڭ كىمگە تيەسىلى ەكەنىن انىقتاۋدا؛

انىق بولعان تەكتى د ن ق- نىڭ ناتيجەسىنە سۇيەنىپ، مويىنداماۋ دۇرىس ەمەس.

وسىلايشا ءمۇفتيات دنق ساراپتاما جۇرگىزۋ ماسەلەسىنە قاتىستى مىنانداۋ ءپاتۋا شىعارعان.

ەسكە سالا كەتەيىك، بۇعان دەيىن قازاقستاندىقتارعا گەنەتيكالىق دەرەكتەردى تالداۋدىڭ وزىق تەحنولوگيالارى قولجەتىمدى بولعانىن جازعان ەدىك. 2024 -جىلدىڭ شىلدەسىندە استانادا ۇلتتىق بيوتەحنولوگيا ورتالىعىندا Astana Genetic Center (AGC) گەنەتيكالىق زەرتتەۋلەر ورتالىعى اشىلعان ەدى.