ءماجىلىس رەسپۋبليكالىق بيۋجەت تۋرالى زاڭدى قابىلدادى

ق ر پارلامەنتى ءماجىلىسى «2024-2026-جىلدارعا ارنالعان رەسپۋبليكالىق بيۋجەت تۋرالى» زاڭدى قابىلدادى، دەپ حابارلايدى Kazinform.

«جالپى العاندا، بيۋجەتتىڭ بۇل پارامەترلەرى الەۋمەتتىك جانە باسقا دا مىندەتتەمەلەردى ۋاقىتىلى ورىنداۋعا، سونداي-اق مەملەكەت باسشىسىنىڭ تاپسىرمالارىن ساپالى جۇزەگە اسىرۋعا مۇمكىندىك بەرەدى. ماجىلىستە زاڭ جوباسى كەڭىنەن تالقىلاندى. كوميتەتتەر مەن جۇمىس توپتارىنىڭ 25 وتىرىسى وتكىزىلدى. وندا دەپۋتاتتاردىڭ 300 دەن استام ساۋالىنا جاۋاپ بەرىلدى. بارلىق فراكسيامەن جۇمىس جۇرگىزىلدى. «AMANAT» فراكسياسىنىڭ كەڭەيتىلگەن جينالىسى وتكىزىلدى»، - دەدى ۇكىمەت باسشىسىنىڭ ورىنباسارى، قارجى ءمينيسترى ەرۇلان جاماۋبايەۆ ءماجىلىستىڭ جالپى وتىرىسىندا.

ءمينيستردىڭ ايتۋىنشا، دەپۋتاتتار كوتەرگەن ماسەلەلەر، اسىرەسە ءوڭىر قاجەتتىلىكتەرى بارىنشا ەسكەرىلدى.

«ناتيجەسىندە 2,5 تريلليون تەڭگەگە جۋىق قاراجات ماڭىزدىلىعىنا قاراي قايتا ءبولىندى. ونىڭ ىشىندە ۇكىمەت رەزەرۆى ەسەبىنەن 56 ميلليارد تەڭگە قوسىمشا قاراستىرىلدى. قورىتىندىلاي كەلە، بيىلعى زاڭ جوباسىن تالقىلاۋعا بەلسەندىلىك تانىتقان بارلىق دەپۋتاتقا العىس بىلدىرەمىز. زاڭ جوباسىن قولداۋلارىڭىزدى سۇرايمىن»، - دەيدى ول.