ءماجىلىس ۇلەسكەرلىك قۇرىلىستى رەتتەيتىن زاڭ جوباسىن ماقۇلدادى
استانا. KAZINFORM - ءماجىلىس دەپۋتاتتارى ۇلەسكەرلىك قۇرىلىستى رەتتەيتىن زاڭ جوباسىن ءبىرىنشى وقىلىمدا ماقۇلدادى.
زاڭ جوباسىن تانىستىرعان دەپۋتات سامات مۇسابايەۆتىڭ ايتۋىنشا، زاڭناماعا ۇسىنىلىپ وتىرعان جاڭاشىلدىقتار ۇلەسكەرلىك قۇرىلىسقا ءتارتىپ ورناتۋعا ارنالعان.
- زاڭ جوباسى تۇرعىن ءۇي قۇرىلىسىنا ۇلەستىك قاتىسۋدىڭ تارتىمدىلىعىن ارتتىرۋعا مۇمكىندىك بەرەتىن شارالاردى ىنتالاندىرۋعا باعىتتالعان. جۇمىس توبى بارىسىندا دەپۋتاتتار تۇرعىن ءۇي قۇرىلىسىنا ۇلەستىك قاتىسۋ تۋرالى زاڭنىڭ قولدانۋ اياسىن كەڭەيتۋ ءۇشىن ءبىرقاتار تۇزەتۋگە باستاماشىلىق جاسادى، - دەدى ول.
اتاپ ايتساق، ۇلەسكەرلەردىڭ قۇقىعىن قورعاۋ ءۇشىن الدىن الا شارت جاساۋعا، ينۆەستيتسيا مەن برونداۋعا، الدىن الا كەلىسىمشارتتار جاساسۋعا تىيىم سالۋ تەتىكتەرى ناقتىلانباق.
سالىنىپ جاتقان ءۇيدى اكىمدىكتىڭ رۇقساتىنسىز نەمەسە ءبىرىڭعاي وپەراتوردىڭ كەپىلدىگى بولماعان جاعدايدا جارنامالاۋعا، ەكىنشى دەڭگەيلى بانكتەردەن يپوتەكا راسىمدەۋگە تىيىم سالىنادى.
ال ۇلەسكەرلەردىڭ اقشاسىن زاڭسىز تارتقانى جانە جارناما تاراتقانى ءۇشىن 2000 ايلىقتىق ەسەپتىك كورسەتكىشكە دەيىن (7,9 ميلليون تەڭگەگە دەيىن) ايىپپۇل سالۋ كوزدەلگەن.
وسىعان دەيىن ۇكىمەت باسشىسىنىڭ قۇرىلىس تالاپتارىنىڭ بۇزىلۋىنا قاتىستى شاعىمدار كوبەيىپ بارا جاتقانىن ايتقانى تۋرالى جازعان ەدىك.
