ءماجىلىس ەكونوميكالىق باپتاردى قىلمىستىق سيپاتتان ارىلتۋ قۇجاتىن ماقۇلدادى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق قۇقىق بۇزۋشىلىقتاردى ودان ءارى قىلمىستىق سيپاتتان ارىلتۋ جانە زاڭسىز جولمەن الىنعان كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلەسپە قۇجات ءبىرىنشى وقىلىمدا ماقۇلداندى.

«بۇگىنگى زاڭ جوباسى قازاقستاندا ىڭعايلى بيزنەس ورتا قالىپتاستىرۋ ماقساتىندا، ەكونوميكالىق قىزمەت سالاسىنداعى قىلمىستار بويىنشا جاۋاپكەرشىلىككە تارتۋدىڭ ءادىل تەتىگىن ايقىنداۋدى ەكونوميكالىق قۇقىق بۇزۋشىلىقتاردى ودان ءارى قىلمىسسىزداندىرۋ جولىمەن جۇزەگە اسىرۋ تۋرالى مەملەكەت باسشىسىنىڭ تاپسىرماسىن ورىنداۋ ماقساتىندا ءبىر توپ پارلامەنت دەپۋتتاتارىنىڭ باستاماسىمەن دايىندالدى. سونىمەن، ۇسىنىلىپ وتىرعان زاڭ جوباسىندا قىلمىستىق كودەكستىڭ 4 بابى قىلمىسسىزداندىرىلىپ، قىلمىستىق پروتسەستىك كودەكستىڭ 1 بابىنا وزگەرىس ەنگىزىلىپ وتىر»، - دەدى ءماجىلىس دەپۋتاتى ابزال قۇسپان.

اتاپ ايتقاندا، تولىقتاي قىلمىسسىزداندىرۋعا ەكى باپ ۇشىرايدى، ياعني ق ك- ءنىڭ 219-بابىن (كرەديتتى زاڭسىز الۋ نەمەسە بيۋدجەتتىك كرەديتتى ماقساتسىز پايدالانۋ) جانە ق ك- ءنىڭ 241-بابىن (ق ر بۋحگالتەرلىك ەسەپ جانە قارجىلىق ەسەپتىلىك تۋرالى زاڭناماسىن بۇزۋ)، ا ق ب ت ك- ءنىڭ 239-بابىنىڭ 6-بولىگىنە كوشىرە وتىرىپ. ال ءىشىنارا قىلمىسسىزداندىرۋدا ەكى باپ قامتىلدى. بۇل تۇرعىدا ق ك- ءنىڭ 234-بابى ەسكەرىلىپ (ەكونوميكالىق كونتراباندا)، ا ق ب ت ك- ءنىڭ 551-بابىنا كوشىرىلمەك. سونداي-اق ق ك- ءنىڭ 236-بابى دا (كەدەندىك باجداردى، كەدەندىك الىمداردى، سالىقتاردى، ارنايى، دەمپينگكە قارسى، وتەماقى باجدارىن تولەۋدەن جالتارۋ) ءىشىنارا قىلمىستىق سيپاتتان ارىلادى

«تۇزەتۋلەر ارقىلى اكىمشىلىك قۇقىق بۇزۋشىلىق تۋرالى كودەكستىڭ 551-بابىندا جاۋاپكەرشىلىكتى كوزدەي وتىرىپ، ءىرى مولشەردە قۇقىق بۇزۋ ارەكەتىن جاساۋدىڭ سارالاۋ بەلگىلەرىن قىلمىستىق سيپاتتان ارىلتا وتىرىپ، قىلمىستىق جاۋاپتىلىقتىڭ باستالۋ شەگىن كوتەرۋ ۇسىنىلادى. دەمەك، قىلمىستىق جاۋاپكەرشىلىكتىڭ باستالۋ شەگى اسا ءىرى مولشەرگە دەيىن كوتەرىلەدى. ق ك- ءنىڭ 234-بابى بويىنشا تومەنگى شەگى 10000-نان 20000 ا ە ك- كە دەيىن، ق ك- ءنىڭ 236-بابى بويىنشا 5000-نان 10000 اەك- كە دەيىن كوتەرىلەدى»، - دەدى دەپۋتات.

مۇنىمەن قوسا، زاڭ جوباسىندا 2022 -جىلعى 13-ساۋىردەگى №872 «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» ق ر پرەزيدەنتى جارلىعىن ورىنداۋ ماقساتىندا «قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى» زاڭىنا قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى زاڭنامانىڭ ماقساتتارىن، مىندەتتەرى مەن قاعيدالارىن بەلگىلەۋ، سونىمەن بىرگە ودان ارتىق رەگلامەنتتەۋدەگى كەيبىر نورمالارىن الىپ تاستاۋ تۇزەتۋلەرىن ەسكەرەدى.

«زاڭ جوباسى پراكتيكالىق قولدانۋدى، حالىقارالىق ستاندارتتار تالاپتارىن، ف ا ت ف ۇسىنىمدارىن، سونداي-اق تىركەلگەن قىلمىستىق ىستەر جانە سوتقا جىبەرىلگەن ىستەر بويىنشا ستاتيستيكالىق دەرەكتەردى ەسكەرە وتىرىپ، قىلمىستىق سوت ءىسىن جۇرگىزۋدە ازاماتتار مەن بيزنەس-قاۋىمداستىقتاردىڭ قۇقىقتارىن قورعاۋعا باعىتتالعان»، - دەدى ا. قۇسپان.

ايتا كەتەيىك، مەملەكەت باسشىسى قاسىم-جومارت توقايەۆ بىلتىرعى جولداۋىندا ەكونوميكالىق سيپاتتاعى كەيبىر زاڭ بۇزۋ ارەكەتتەرىن قىلمىس ساناتىنان الىپ تاستاۋ جۇمىسىن جالعاستىرۋ قاجەتتىگىن ايتقان- دى. پرەزيدەنتتىڭ ءدال وسى تاپسىرماسىنا وراي ازىرلەنگەن زاڭ جوباسى ءماجىلىستىڭ قاراۋىنا ءتۇستى. قۇجات دەپۋتاتتار تاراپىنان بۇگە-شىگەسىنە دەيىن تالقىلانىپ، جان-جاقتى سۇزگىدەن وتكىزىلمەك. وسى ورايدا، Kazinform ءماجىلىس دەپۋتاتى، زاڭناما جانە سوت-قۇقىقتىق رەفورما كوميتەتىنىڭ مۇشەسى، زاڭ جوباسى اۆتورلارىنىڭ ءبىرى ابزال قۇسپانمەن سۇحباتتاسقان بولاتىن.

اۆتور

رۋسلان عابباسوۆ