ءماجىلىس جولاۋشىلاردى اۆتوكولىكپەن تاسىمالداۋ سالاسىنا وزگەرىستەر ەنگىزدى

استانا. KAZINFORM - بۇگىن ءماجىلىستىڭ جالپى وتىرىسىندا. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جولاۋشىلاردى اۆتوموبيلمەن تاسىمالداۋ سالاسىنداعى كەيبىر مەملەكەتتىك فۋنكتسيالاردى مىندەتتى مۇشەلىككە (قاتىسۋعا) نەگىزدەلگەن ءوزىن-ءوزى رەتتەۋگە بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى ولقىلىمدا ماقۇلداندى.

«زاڭ جوباسى ءوزىن-ءوزى رەتتەۋگە تۇراقتى حالىقارالىق، وبلىسارالىق، تۇراقتى ەمەس اۆتوبۋس تاسىمالى، تاكسي جانە ولارعا قاتىستى ديسپەتچەرلىك جۇمىستى، سونداي-اق دەپۋتاتتار ۇسىنىسىمەن اۆتوبەكەت قىزمەتتەرىن ۇيىمداستىرۋ فۋنكسياسىن بەرۋدى كوزدەيدى. سونىمەن قاتار، زاڭ جوباسى - ءوزىن-ءوزى رەتتەۋدى قۇرۋ، ونىڭ مۇشەلەرىنىڭ قۇقىقتارى مەن مىندەتتەرى، مۇشەلىك جارنانىڭ مولشەرى، ءوزىن- ءوزى رەتتەۋ ۇيىمىن تىزىلىمگە قوسۋ نەمەسە الىپ تاستاۋ ءتارتىبى، سونداي-اق مۇلىكتىك جاۋاپتىلىق ماسەلەلەرىن رەگلامەنتتەيدى. مينيسترلىك وسى ماسەلە بويىنشا جۇمىستى 2020-جىلى باستادى جانە ونىڭ اياسىندا قاجەت قوعامدىق تىڭداۋلاردى وتكىزدى، ءتيىستى تالداۋلاردى جۇرگىزدى، حالىقارالىق تاجىريبەلەردى زەردەلەدى»، - دەدى كولىك ءمينيسترى مارات قارابايەۆ.

زاڭ جوباسىندا ەسكەرىلگەن فۋنكتسيالاردى ءوزىن-ءوزى رەتتەۋگە بەرۋ:

- تاسىمال پروتسەسىن باقىلاۋدى مەملەكەتتىك دەڭگەيدەن ءوزىن-ءوزى رەتتەۋدىڭ ىشكى ۇيىمداستىرۋشىلىق دەڭگەيىنە اۋىستىرا وتىرىپ، وسى نارىقتا قىزمەت كورسەتۋشىلەردىڭ جۇمىس ساپاسىن ءوز مۇشەسى رەتىندە باقىلاۋعا مۇمكىندىك بەرەدى؛

- كاسىبي ءالسىز تاسىمالداۋشىلاردى وزدىگىنەن تاسىمال نارىعىنان شىعاراتىن ادال باسەكەلەستىككە نەگىزدەلگەن وداقتا قىزمەت اتقارۋعا جاعداي جاسايدى؛

- نارىقتىڭ نەگىزگى تالاپتارىن ەسكەرە وتىرىپ ۋاكىلەتتى ورگان انىقتاعان باستى باعىتتاردى دامىتۋعا بەيىمدەلگەن ساپالى ستاندارتتار مەن قاعيدالاردى جەدەل قابىلداۋعا مۇمكىندىك جاسايدى؛

- سالاداعى بيۋروكراتيا مەن سىبايلاس جەمقورلىق سالدارىن ازايتا كەلە، قوعامدىق باقىلاۋ تەتىگىن دامىتۋدى قامتاماسىز ەتەدى.

«دامىعان ەلدەردە ءوزىن-ءوزى رەتتەۋ ەكونوميكانىڭ بارلىق سالاسىندا ورىن العان. حالىقارالىق تاجىريبە - سالانىڭ ءوزىن- ءوزى رەتتەۋگە ءوتۋىنىڭ تيىمدىلىگىن كورسەتەدى، ويتكەنى تەك ءبىر سالانىڭ ماسەلەسىمەن اينالىساتىن بىلىكتى ساراپشىلارى بار جەكە ۇيىمنىڭ بولۋى وسى سالانىڭ قارقىندى تۇردە دامۋىن قامتاماسىز ەتە الادى. ماسەلەن، ءوزىن-ءوزى رەتتەۋ امەريكادا 1934-جىلدان باستاپ كاسىپكەرلىكتىڭ بارلىق سەكتورىندا، ءتىپتى دەنساۋلىق سالاسىندا دا جۇمىس ىستەيدى. انگليادا 1889-جىلى جۇك تاسىمال قاۋىمداستىعى قۇرىلعان، ول قازىرگى كۇنى ەلدەگى جۇك كولىك پاركىنىڭ جارتىسىن، سونداي-اق تەمىرجولمەن %90 جۇكتى، ال تەڭىز كولىگىمەن 70 پايىز جۇكتى تاسىمالدايتىن وپەراتورلاردى بىرىكتىرەدى. كورشى ەلدەردە ءوزىن-ءوزى رەتتەۋدە رەسەي كوشباسشى بولىپ وتىر. ول ەلدە 2007-جىلى «ءوزىن-ءوزى رەتتەۋ تۋرالى» زاڭ قابىلدانىپ «تاۋەلسىز باعالاۋ»، «تورەلىك باسقارۋ»، «ساۋلەت-قۇرىلىس/كاداستر»، «اۆتوكولىكپەن حالىقارالىق جۇك تاسىمالى» ءوزىن-ءوزى رەتتەۋگە ءوتتى. 2018-جىلدان باستاپ ەلىمىزدە دە مىندەتتى مۇشەلىكپەن ءوزىن-ءوزى رەتتەۋ «تاۋەلسىز باعالاۋ» جانە «زاڭ كونسۋلتانتتارى» سالاسىندا ەنگىزىلىپ، قازىر ءوز قىزمەتىن ءتيىمدى اتقارىپ جاتىر»، - دەدى مينيستر.

زاڭ جوباسىندا «كولىك تۋرالى»، «اۆتوموبيل كولىگى تۋرالى»، «استانانىڭ مارتەبەسى تۋرالى»، «رۇقساتتار جانە حابارلامالار تۋرالى»، «كەيبىر زاڭنامالىق اكتىلەرگە الەۋمەتتىك ماسەلەلەر بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا تۇزەتۋلەر مەن تولىقتىرۋلار ەنگىزۋ كوزدەلگەن.