ءماجىلىس دەپۋتاتى الماتىداعى ەلەكتروموبيلدەر شىعاراتىن زاۋىت قۇرىلىسىمەن تانىستى

الماتى. KAZINFORM - ءماجىلىس دەپۋتاتى، «اق جول» پارتياسى فراكسياسىنىڭ جەتەكشىسى ازات پەرۋاشيەۆ الماتىنىڭ يندۋستريالىق ايماعىنا جۇمىس ساپارى بارىسىندا Hyundai Trans Kazakhstan كومپانياسىنا باردى.

- ءبىر جىل بۇرىن وسى كاسىپورىنعا كەلگەنىمىزدە Astana Motors كومپانياسىنىڭ نەگىزىن قالاۋشى نۇرلان سماعۇلوۆ اۆتوكولىكتەردى شاعىن ءتۇيىندى قۇراستىرۋعا كوشۋ تۋرالى جوسپارىن ايتقان ەدى. بۇگىن ءبىز جۇمىس پروتسەسىن، جاڭا ءوندىرىس جەلىلەرىن كورىپ وتىرمىز. سونىمەن قاتار ەلەكتروموبيلدەر، گيبريدتى مودەلدەر مەن قۇراستىرىلعان اۆتوكولىكتەردىڭ بولشەكتەرىن شىعاراتىن زاۋىتتاردىڭ قۇرىلىس بارىسىمەن تانىستىق. بۇل بيزنەس پەن ءوندىرىستى دامىتۋ قورى اراسىنداعى ىنتىماقتاستىقتىڭ ەڭ جارقىن ءارى تابىستى ۇلگىسى،- دەدى دەپۋتات.

قازاقستان پرەزيدەنتى قاسىم-جومارت توقايەۆ 2023 -جىلعى جولداۋىندا جانە بيىل 7 - اقپانداعى ۇكىمەت وتىرىسىندا لوكاليزاتسيا مەن جەرگىلىكتى قامتۋدى ارتتىرا وتىرىپ، ءىرى ءتۇيىندى قۇراستىرۋدان شاعىن ءتۇيىندى وندىرىسكە كوشۋ مىندەتىن قويعان بولاتىن.

كەزدەسۋ بارىسىندا ازات پەرۋاشيەۆ زاۋىت باسشىلىعىمەن مۇنداي كاسىپورىنداردى ودان ءارى قولداۋ بويىنشا قاجەتتى شارالاردى جانە وسى تاجىريبەنى مۇناي-گاز، تاۋ- كەن مەتاللۋرگياسى، جول، قۇرىلىس، ەنەرگەتيكا سىندى سالالاردا پايدالانۋ ماسەلەلەرىن تالقىلادى.