ءماجىلىس ءتوراعاسى رەسپۋبليكالىق بيۋجەت تۋرالى: وڭىرلەر قارجى سۇراۋىن توقتاتار ەمەس
استانا. KAZINFORM - الداعى ۋاقىتتا اكىمدىكتەردىڭ قىزمەتى بيۋجەتتى ءتيىمدى يگەرۋى مەن كىرىستى ارتتىرۋ جۇمىسى بويىنشا باعالانادى. بۇل تۋرالى ءماجىلىس ءتوراعاسى ەرلان قوشانوۆ ءمالىم ەتتى.
«بيۋجەتارالىق قاتىناستاردا ءبىرقاتار پروبلەما بار. بۇگىندە شاعىن جانە ورتا بيزنەستەن تۇسەتىن سالىق تۇسىمدەرىن وڭىرلەرگە بەرۋ ناتيجەسىندە ولاردىڭ قارجىلىق مۇمكىندىكتەرى ارتقان. سوڭعى جىلدارى بارلىق دەرلىك وڭىردە كورپوراتيۆتىك تابىس سالىعى بويىنشا جوسپارلاردىڭ ارتىعىمەن ورىندالۋى بايقالادى. سونىمەن قاتار، ايماقتارعا رەسپۋبليكالىق بيۋجەتتەن بەرىلەتىن نىسانالى ترانسفەرتتەر كولەمى بۇرىنعى قالپىنشا، ءتىپتى كەي وڭىرلەردە ءوسىپ وتىر. ال، وڭىرلەر ورتالىقتان قارجى سۇراۋىن توقتاتار ەمەس. ءتىپتى جۇمساۋ ماقساتى دا وزگەرمەگەن»، - دەدى ەرلان قوشانوۆ ءماجىلىستىڭ جالپى وتىرىسىندا 2025-2027-جىلدارعا ارنالعان رەسپۋبليكالىق بيۋجەتتى تالقىلاۋدى قورىتىندىلاي وتىرىپ.
سونداي-اق، ءماجىلىس سپيكەرى وڭىرلەردىڭ قوسىمشا رەسۋرستاردى قانشالىقتى ءتيىمدى يگەرىپ جاتقانى الاڭداتاتىنىن ايتتى.
«وڭىرلەرگە تۇسكەن قوسىمشا كىرىستەر تەك قىسقا مەرزىمدىك قاجەتتىلىكتەردى شەشۋگە جۇمسالماۋعا ءتيىس. ول حالىقتىڭ ءومىر ءسۇرۋ ساپاسىن ارتتىرۋدى قامتاماسىز ەتەتىن، ءوڭىر ءۇشىن ماڭىزدى ينفراقۇرىلىمدىق جوبالارعا باعىتتالۋى قاجەت. جەرگىلىكتى جەردەگى ماسەلەلەردىڭ كوپشىلىگى جەرگىلىكتى بيۋجەت ەسەبىنەن شەشىلۋى قاجەت. سوندىقتان اكىمدىكتەردىڭ نەگىزگى ماقساتى - اقشانى ۋاقىتىلى يگەرۋ عانا ەمەس، كىرىستەردى ۇنەمى ءوسىرىپ وتىرۋ بولۋى كەرەك. ول ءۇشىن بيزنەستى دامىتۋعا قولايلى جاعداي جاساعان ءجون»، - دەيدى ول.
ونىڭ ايتۋىنشا، الداعى ۋاقىتتا اكىمدىكتەردىڭ قىزمەتى بيۋجەتتى ءتيىمدى يگەرۋى مەن كىرىستى ارتتىرۋ جۇمىسى بويىنشا باعالانادى.
بۇعان دەيىن ەرلان قوشانوۆ ۇلتتىق قور قاراجاتىن پايدالانۋ پراكتيكاسىن دوعارۋ قاجەتتىگىن باسا ايتتى.
