ءشامشى اۋلەتى كومپوزيتور اندەرىنە ءسوز جازعان اۆتورلاردىڭ ۇرپاعىنا ىزدەۋ سالادى
ءشامشى قالداياقوۆتىڭ كەلىنى، «ءشامشى الەمى» قورىنىڭ اتقارۋشى ديرەكتورى، بوتاگوز قالداياقوۆا دا وسى جۇمىس توبىنىڭ مۇشەسى. ءشامشى مۇراسىن تۇگەندەپ جۇرگەن قارجى مامانىنان وسى سالانىڭ وزەكتى پروبلەمالارى تۋرالى سۇحبات العان ەدىك.
«ءۇش بالامىز دا اتاسىنىڭ جولىن قۋىپ ءجۇر»
- «ءشامشىنىڭ كەلىنى» دەگەن ءسوز ءسىز ءۇشىن ستاتۋس پا، جاۋاپكەرشىلىك پە الدە جاي عانا تۋىستىق اتاۋ ما؟
- ارينە، مارتەبەدەن گورى جاۋاپكەرشىلىگى باسىم. سول جاۋاپكەرشىلىكتى سەزىنگەندىكتەن شىعار، ءۇش بالامىزدى دا مۋزىكاعا باۋلىپ جاتىرمىز. اتالارى سالىپ كەتكەن كەرەمەت جولدى ابىرويمەن جالعاستىرسا دەگەن ءۇمىتىمىز بار.
- ءوزىڭىز ءشامشى اتاڭىزدىڭ كوزىن كوردىڭىز بە؟
- ءشامشى اتامىز 1992-جىلى ومىردەن ءوتتى. ول كەزدە مۇحتار 26 جاستا بولعان. ءبىراق كەشتەۋ ۇيلەنگەن. ءبىز 2004 -جىلى وتاۋ قۇردىق. قازىر ءۇش بالامىز بار - ەكى ۇل، ءبىر قىز. ۇشەۋى دە سكريپكاشى. كۇلاش بايسەيىتوۆا اتىنداعى دارىندى بالالارعا ارنالعان رەسپۋبليكالىق مۋزىكا مەكتەبىندە وقيدى. اكەلەرى دە سول مەكتەپتىڭ تۇلەگى، سكريپكاشى. ۇلكەن قىزىمىز الينا بيىل مەكتەپ بىتىرەدى. اباي 16 دا، نۇرسۇلتان 11 دە. مەن توبىقتىنىڭ قىزىمىن. ءبىر بالامىزدىڭ اتىن اباي دەپ قويعانىمىزدىڭ وسىنداي دا ءبىر سەبەبى بار. مۇحتاردىڭ اباي اتىنداعى وپەرا جانە بالەت تەاترىندا ديريجەر بولىپ جۇمىس ىستەپ كەلە جاتقانىنا 29 جىل بولىپتى.
- ءسىزدىڭ ماماندىعىڭىز قارجىگەر ەكەن. كەزىندە ۇلكەن قىزمەتتەردە دە ءجۇرىپسىز. ءشامشى قالداياقوۆتىڭ مۇراسىنا جاۋاپتى كاسىپكە بەت بۇرۋىڭىزعا جولداسىڭىز ىقپال ەتتى مە؟
- مەن اۋەلدە Philip Morris, Pepsi سياقتى ءىرى كومپانيالاردىڭ سەرىكتەسى بولعان حالىقارالىق جارناما اگەنتتىگىندە قارجى ديرەكتورى بولىپ جۇمىس ىستەدىم. قارجى اينالىمى ۇلكەن ەدى، ياعني قارجى نارىعىنداعى حالىقارالىق ستاندارتتاردىڭ ءبارىن بىلەمىن. اۆتورلىق قۇقىق تۋرالى زاڭمەن تالاي جۇمىس ىستەدىم. وسى تاجىريبەنى ەندى ءشامشى اتامىزدىڭ مۇراسىن ساقتاۋعا پايدالانىپ ءجۇرمىن.
- قازاقستاندا رەسمي جۇمىس ىستەپ كەلە جاتقان نەشە اۆتورلىق قوعام بار؟ رەسمي تىركەلمەي جۇمىس ىستەپ جۇرگەندەرى بار ما؟
- ول جايىندا جاڭا زاڭ جوباسىن تالقىلاعان كەزدە ايتايىق.
- جاقسى، اۆتورلىق قوعامداردىڭ وزىنەن سۇراسا، ماردىمدى تابىسىمىز جوق دەپ شاعىمدانادى. ال ونىڭ جۇمىسىنا كوڭىلى تولمايتىندار ميللياردتاپ تابىس تاۋىپ جاتقانىن ايتادى. وسى ەكى ارگۋمەنتتىڭ قايسىسى شىندىققا جاقىن؟ جالپى اۆتورلىق قوعامداردىڭ جىلدىق قاراجات اينالىمى نەشە تەڭگە بولادى دەپ ويلايسىز؟
- ونى تاپ باسىپ ايتۋ قيىن. مەن سىزگە تەلەارنالاردىڭ مىسالىندا ءتۇسىندىرىپ كورەيىن. تەلەارنالاردىڭ جىلدىق كرەاتيۆتى كونتەنت اينالىمى دەيتىن ۇعىم بار. وسى اقشانىڭ 1 پايىزىن اۆتورلىق قوعامدارعا تولەۋ كەرەك. ول 1 پايىز اقشامەن بىرگە، ەسەپتى كەزەڭدە قاي اۆتوردىڭ، قاي تۋىندىسى، نەشە رەت تەلەارنادان بەرىلگەنىن كورسەتەتىن ەسەپ جولدايدى. مىسالى، ءۇش ايدىڭ ىشىندە ءشامشى قالداياقوۆتىڭ «ءومىر وزەن» ءانى 25 رەت، «اق بانتيك» ءانى 100 رەت شىرقالدى دەگەن سياقتى ەسەپ بەرىلەدى.
مىسالى، جەتەكشى تەلەارنانىڭ اۆتورلىق تۋىندىلاردى ءبىر جىلدىڭ ىشىندە كورسەتۋ اينالىمى 7 ميلليارد تەڭگە دەسەك، سونىڭ 1 پايىزى رەتىندە 70 ميلليون تەڭگەنى اۆتورلىق قوعامعا، قازاقستان اۆتورلارىنىڭ قوعامىنا («قازاق» ) تولەيدى. بۇل جەردە ءبىز ءبىر تەلەارنانىڭ عانا اۋداراتىن قاراجاتىن شامامەن ايتىپ وتىرمىز. ەلىمىزدە وسىنداي قانشا رەسۋرس بار ەكەنىن ءوزىڭىز ەسەپتەي بەرىڭىز. اۆتورلىق قوعامدار وسى سومانىڭ 30 پايىزىن وزىنە قالدىرادى. جۇمىسشىلاردىڭ ايلىعىنا، بۋحگالتەرلىك جۇمىس جۇرگىزۋگە، باسقارۋ جۇمىستارىنا دەپ وپەراتسيالىق شىعىندارعا جۇمساۋعا حاقىلى. قالعان 70 پايىزىن ءشامشى قالداياقوۆتان باستاپ قايرات نۇرتاستارعا دەيىن، اۆتوردىڭ بارىنە كىمنىڭ تۋىندىسى، قانشا ويناتىلعانىنا قاراي تاراتادى.
- ماجىلىستە كرەاتيۆتى يندۋستريانى دامىتۋعا ارنالعان زاڭ جوباسىن تالقىلاۋعا قاتىسقان كەزدە ءبىراز ۇسىنىسىڭىزدى ايتا الماي كەتكەندەي كورىندىڭىز. دەپۋتاتتار ازىرلەپ جاتقان زاڭ جوباسىندا قانداي نورمالار سىزگە ۇنادى، قايسىسى ۇناعان جوق؟
- ۇسىنىلىپ وتىرعان زاڭ جوباسىن ازىرلەگەندەر ەلدەگى اۆتورلىق قوعامداردى بۇگىنگى زاماننىڭ تالابىنا ساي كەلمەيتىن ۇيىمدار دەپ وتىر. ەلدە 15 اۆتورلىق قوعام بار دەپ ەسەپتەلەدى. ارينە، بۇل كوپ دەپ ويلايمىن. سانىن قىسقارتىپ، ساپاسىن كوتەرۋىمىز كەرەك. ول ءۇشىن اككرەديتتەۋ ءتاسىلىن ەنگىزۋ كەرەك. ادىلەت مينيسترلىگىنەن، مادەنيەت جانە اقپارات مينيسترلىگىنەن رۇقسات بەرەتىن قۇجاتتاردى راسىمدەۋ كەرەك. مەملەكەتتىك ورگانداردىڭ قولىندا اۆتورلىق قوعامداردى الەۋەتىنە قاراپ ىرىكتەيتىن، اۆتورلارمەن شىنايى جۇمىس ىستەي الاتىندارىنا عانا اۆتورلىق قوعام ستاتۋسىن بەرەتىن ولشەمشارت بولۋ كەرەك. مەنىڭ بىلۋىمشە، قازىر سول 15 اۆتورلىق قوعامنىڭ كەيبىرىندە رەسمي رۇقسات تا جوق.
- دەپۋتاتتار اۆتورلىق قوعامداردىڭ فۋنكتسياسىن مەملەكەتكە بەرمەكشى مە؟
- سولاي سياقتى. مەملەكەتتىك ورگانعا نەمەسە مەملەكەتتىك كاسىپورىنعا بەرمەكشى. ول جاعىن ءالى اشىپ ايتپادى. بالكىم «قازپاتەنتكە» جۇكتەيتىن شىعار.
- سوندا مەملەكەت تەلەارنالارعا، راديولارعا مەملەكەتتىك تاپسىرىس اياسىندا بولگەن قارجىنىڭ ءبىر بولىگىن اۆتورلىق قۇقىق اياسىندا وزىنە قايتارىپ الا ما؟
- اۆتورلىق قوعامداردىڭ فۋنكتسياسى اۆتورلىق تۋىندىلاردىڭ ورىندالۋىنان تۇسكەن سىياقىنى جيناپ، باسىم بولىگىن اۆتورلار مەن مۇراگەرلەرگە تاراتۋ عوي. وسى فۋنكتسيانى مەملەكەتكە بەرمەك.
- بۇل سىزدەرگە ۇناماي ما؟
- ءبىز قارسىمىز. ويتكەنى مەملەكەت اكتيۆتەردى ءساتتى باسقارا المايدى. ءبىرىڭعاي جيناقتاۋشى زەينەتاقى قورىنىڭ ماڭىنداعى شۋدى، م ءا م س جۇيەسىن الايىق. ەل ىشىندە سىن مەن كۇمان كوپ.
- ودان دا اۆتورلىق قوعامداردى ىرىكتەپ، سولارمەن جۇمىس ىستەي بەرەيىك دەيسىز بە؟
- ءيا. 3-4 اۆتورلىق قوعامدى عانا قالدىرىپ، ولاردىڭ بۇكىل قارجى وپەراتسياسىن، ەسەبىن سيفرلاندىرۋ كەرەك. Egov-تەگى سياقتى ءار اۆتوردىڭ، زاڭدى مۇراگەردىڭ جەكە كابينەتى بولسىن. سوندا قاي اۆتوردىڭ، قاي تۋىندىسى، قاي رەسۋرستا، نەشە رەت ويناتىلعانى، كونتەنت تاراتۋشى كوز اۆتورلىق سىياقى رەتىندە قانشا قاراجات اۋدارعانى اشىق بولار ەدى. قازىر ول ەسەپتىڭ ءبارى قاعازدا. ال «قاعاز ءبارىن كوتەرەدى» دەيتىن ءتامسىلدىڭ ماعىناسىن بىلەسىز.. .
«اۆتورلىق قوعامدار كەيىنگى 3 جىلدا مۇحتار شاحانوۆقا ءبىر تەڭگە دە سىياقى تولەمەگەن»
- اۆتورلىق سىياقى ءوندىرۋدىڭ قازىرگى جۇيەسى كىمدەرگە ءتيىمدى؟ اۆتورلار مەن ولاردىڭ مۇراگەرلەرىنە قانشالىقتى پايدالى؟
- ادىلەت مينيسترلىگى ەكى جىل بۇرىن «قازاقستان اۆتورلارى قوعامى» بىرلەستىگىندە اۋديت جۇرگىزدى. سول كەزدە 1,5 ميلليارد تەڭگەنىڭ زاڭ بۇزۋ فاكتىسىن اشكەرەلەدى. قاراپايىمداپ ايتقاندا، شوتتا جاتۋعا ءتيىس بولعان 1,5 ميلليارد تەڭگەنىڭ قايدا كەتكەنىن تۇسىندىرە الماي قويعان. مىنا جاقتا شوتىندا 1 ميلليون دوللار جاتقان. قىسقاسى تۇسىنىكسىز دۇنيە كوپ. سودان بەرى ول ۇيىم ادىلەت مينيسترلىگىنىڭ وكىلدەرىن دە، اۆتورلاردى دا تەكسەرۋگە جولاتپايتىن بولىپ الدى. تەكسەرۋگە رۇقسات بەرمەي، قاسارىسىپ وتىر. ال كەزىندە وسى بىرلەستىكتىڭ باسقارما مۇشەلەرىن اۆتورلار مەن ولاردىڭ مۇراگەرلەرى داۋىسقا سالۋ ارقىلى سايلاپ العان بولاتىن. ەندى سول ءوز سايلاۋشىلارىنا ەسەپ بەرگىسى كەلمەي ءجۇر.
- ءشامشى اۋلەتى كومپوزيتوردىڭ اۆتورلىق سىياقىسىنان جىل سايىن نەشە تەڭگە تابىس الىپ وتىر؟ ول تابىستى اۋلەت مۇشەلەرى قالاي ءبولىسىپ ءجۇر؟
- ءشامشى اتامىزدىڭ مۇحتاردان باسقا تاعى ءبىر ۇلى مەن 92 جاستاعى جارى دا زاڭدى مۇراگەر بولىپ ەسەپتەلەدى. قازىر قازاقستان اۆتورلارى قوعامىن بالنۇر قىدىربەك باسقارىپ وتىر. بالكىم جاقسى كومپوزيتور شىعار، ءبىراق باسقارۋشى رەتىندەگى جۇمىسىنا سۇراق كوپ. مىسالى، ءشامشى اتامىزدىڭ ءۇش مۇراگەرىنىڭ ءبىرى رەتىندە مۇحتارعا ءۇش ايدا 20 مىڭ تەڭگە تولەپ وتىر. جازدا ەڭ كوپ تولەگەنى 30 مىڭ تەڭگە بولدى. كەيدە ەشتەڭە تولەمەي قويادى. قازىر ءبىز ولارمەن سوتتاسىپ جاتىرمىز. سوندىقتان بۇكىل ءمان- جايدى اشىپ ايتا المايمىن. ءبىراق سۇراق كوپ. مىسالى، تويحانالاردا دا ءشامشى اتامىزدىڭ ءانى وتە كوپ ورىندالادى. ءبىراق ول جاقتان اقشا قالاي كەلىپ جاتقانىن، كىمگە كەلىپ جاتقانىن بىلمەيمىز.
- دەپۋتاتتار اۆتورلىق قوعامداردى سيفرلىق الاڭعا شىعارۋعا قارسى ما سوندا؟
- ازىرگە ناقتى ۇستانىمدارى تۇسىنىكسىز. اۆتورلىق قوعامداردى جويىپ، ورنىنا مەملەكەتتىك وپەراتوردى قويعىلارى كەلىپ وتىر.
- ەلىمىزدە ابايدىڭ كىتاپتارى ەڭ كوپ ساتىلادى ەكەن. ودان بەرگى الاش ارىستارىنىڭ ادەبي، پۋبليتسيستيكالىق مۇراسىن قايتا باسىپ شىعارىپ، اقىن- جازۋشىلاردىڭ شىعارماسىن كىتاپ ەتىپ باسىپ، پايدا تاۋىپ جۇرگەن جەكەمەنشىك باسپالار بار. ال تويلاردا قۇرمانعازىنىڭ «ادايىنسىز» داستارحانعا اس كەلمەيدى. وسى اۆتورلاردىڭ قۇقىعىن قورعاپ جۇرگەن بىرەۋ بار ما؟
- قازىرگى زاڭ بويىنشا اۆتور ومىردەن وتسە، مۇراگەرلىك قۇقىق ونىڭ جۇبايى مەن بالالارىنا تەڭدەي ۇلەسپەن ساقتالادى. مىسالى، ءۇش اي سايىن ءبىر اۆتورعا 100 مىڭ تەڭگە اۆتورلىق سىياقى تيەسىلى بولسا، ارتىندا قالعان ەكى بالاسى مەن ايەلىنە 33 مىڭ تەڭگەدەن بەرىلەدى دەگەن ءسوز. ءسىز ايتىپ وتىرعان ادامداردىڭ ومىردەن وتكەنىنە عاسىردان استام ۋاقىت ءوتىپ كەتكەن. اۆتور كوز جۇمعاننان كەيىن 70 جىل وتكەندە ونىڭ مۇراسى زاڭ بويىنشا حالىق مۇراسىنا اينالادى. ءشامشى اتامىز 1992 -جىلى كەتتى دەپ وتىرمىز عوي. 2062 -جىلدان كەيىن ونىڭ مۇراسى دا حالىققا ورتاق مۇراعا اينالادى، ياعني ول كەزدە ۇرپاعى اۆتورلىق سىياقى تالاپ ەتە المايدى.
- ءشامشى اندەرىنە ەڭ كوپ ءماتىن جازعان اقىندارمەن، ولاردىڭ مۇراگەرلەرىمەن بايلانىسىڭىز بار ما؟ ولار اۆتورلىق سىياقى الىپ وتىر ما؟
- ءبىز ءشامشى قالداياقوۆتىڭ نەگىزگى حيت اندەرىنە ءسوز جازعان اقىندارمەن بايلانىس ورناتىپ جاتىرمىز. ارينە، ءبىرىنشى كەزەكتە مۇحتار شاحانوۆپەن، ونىڭ جارىمەن تىعىز بايلانىس بار. ودان كەيىن تولەگەن ايبەرگەنوۆتىڭ مۇراگەرلەرىمەن، قادىر مىرزا ءالىنىڭ بالالارىمەن، جۇمەكەن ناجىمەدەنوۆتىڭ ۇلىمەن، تۇمانباي مولداعاليەۆتىڭ بالالارىمەن، نۇرسۇلتان ءالىمقۇلوۆتىڭ، سابىرحان اسانوۆتىڭ ۇرپاعىمەن بايلانىس ورناتىپ جاتىرمىز.
قازىر ەندى مۇزافار الىمبايەۆتىڭ ۇرپاقتارىن ىزدەپ جاتىرمىز. تابا الماي جۇرگەنىمىزگە ءبىراز بولدى. ولاردى دا ءوز كوماندامىزعا قوسىپ الساق دەگەنبىز. جازۋشىلار وداعى ارقىلى ىزدەپ تە تابا الماي قويعان اۆتورلار بار. مىسالى، ماچەكين دەگەن ادام ءشامشى اتامىزبەن بىرگە ءان جازعان. ورايى كەلگەندە، وسى ادامداردىڭ ۇرپاقتارىنا ىزدەۋ سالاتىنىمىزدى ايتا كەتكىم كەلەدى.
ولاردى ءبىز اتالارىمىزدىڭ اۆتورلىق قۇقىعىن بىرگە قورعاپ، سولاردىڭ اراسىنداعى شىعارماشىلىق بايلانىستى، اۋلەتتەر اراسىنداعى دوستىققا ۇلاستىرساق دەگەن نيەتپەن ىزدەستىرىپ جاتىرمىز. مىسالى، مۇحتار شاحانوۆ كەيىنگى ءۇش جىلدا قازاقستان اۆتورلار قوعامىنان بىردە- ءبىر تەڭگە اۆتورلىق سىياقى الماعانىن ايتىپ وتىر. كوزى ءتىرى مۇحتار اعامىزدىڭ جاعدايى وسىنداي بولعاندا، باسقا اۆتورلاردىڭ جاعدايىن ءوزىڭىز ويلاي بەرىڭىز.
قادىر مىرزا ءالىنىڭ ۇرپاقتارى دا اۆتورلىق قوعاممەن سوتتاسقانىن بىلەمىن. تولەگەن ايبەرگەنوۆتىڭ قىزى سالتانات ءبىر توقساندا كەيدە 3 مىڭ تەڭگە، كەيدە 25 مىڭ تەڭگە تۇسەتىنىن ايتتى. قىسقاسى، توقسانىنا 25 مىڭ تەڭگەدەن جوعارى الىپ كورمەگەن.
ودان كەيىن سول اۆتورلار ارقىلى ءشامشى اتامىزدىڭ مۇراسىن ناقتى تۇگەندەۋگە بولادى دەپ ويلايمىز. مىسالى، اتامىزدىڭ كوزى ءتىرى كەزىندە اندەر جيناعىنا 55 تۋىندى كىرگەن. سول جيناققا كىرمەي قالعان 2-3 قولجازبا بار دەپ جۇرەتىنبىز. شىن مانىندە، ءشامشى اتامىز سازىن جازعان اندەردىڭ سانى 72 بولىپ شىقتى. وسى اندەردىڭ كوبىن تەڭ اۆتورلاردىڭ ۇرپاقتارى ارقىلى تاۋىپ جاتىرمىز. ءالى دە ەلگە تانىلماي قالعان اندەرى بولۋى مۇمكىن. ءبىز تاپقان اندەر ەلگە تانىلماعانىمەن سازى، اۋەزى وتە تارتىمدى. ولار دا حالىق كوزايىمىنا اينالۋعا لايىق دەپ وتىرمىز. سونداي اندەردى قازىرگى انشىلەرگە بەرىپ، ءبىر كونسەرت وتكىزسەك دەگەن جوسپارىمىز بار. اتامىزدىڭ تەڭ اۆتورلارىن ىزدەۋدەگى ءبىر ماقساتىمىز وسى.
- ال YouTube ارنالار، لەيبلدەر مەن چارتتار، مەيرامحانالار، تويحانالار مەن مادەنيەت ۇيلەرى، تەاترلار قالاي اۆتورلىق سىياقى تولەپ ءجۇر. سىزدىڭشە، بۇل كونتەنت كوزدەرى اۆتورلارمەن قالاي جۇمىس ىستەۋ كەرەك؟
- ءسىز اتاعان كوزدەردەگى پيراتتىق كونتەنتتى مونەتيزاتسيالاپ جۇرگەندەر كوپ. ەشكىمنەن رۇقسات سۇراپ جاتقان جوق. ءوزىمىزدىڭ قور ارقىلى ءشامشى الەمىنە بايلانىسى بار اۆتورلاردى، اۆتورلاردىڭ مۇراگەرلەرىن جيناپ، ولارمەن دۇرىس جۇمىستى جولعا قويعىمىز كەلەدى. اۆتورلىق قوعامدار ارقىلى ەمەس، قور رەتىندە لەيبلدەرمەن تىكەلەي جۇمىس ىستەمەكشىمىز. مىسالى، Ozen لەيبلىمەن ءشامشى اندەرىن تاراتۋ باعىتىندا تىكەلەي كەلىسىمشارتىمىز بار. قۇداي قالاسا، ءبىر ايدىڭ ىشىندە سولارمەن بىرگە ءشامشى اندەرىنىڭ تۇتاس البومىن شىعارامىز. ەسترادالىق- سيمفونيالاق وركەسترمەن بىرگە جازىپ، اندەردى قايتا تاسپاعا تۇسىرگەنبىز. ءتىپتى، ماسكەۋدەگى مامانداردىڭ كومەگىنە جۇگىندىك. ساپاسىنا سەنىپ وتىرمىز.
- تويحانالاردان قانشا سىياقى الىپ وتىرسىزدار؟
- تويحانالار دا، مادەنيەت ۇيلەرى مەن فيلارمونيالار دە اۆتولىق قوعامدارمەن جۇمىس ىستەيدى. اۆتورلىق قوعامداردىڭ ءار قالادا وكىلدەرى بار. سولار ءوز قالاسىنداعى تويحانالاردى قاداعالاپ، تيەسىلى اۆتورلىق سىياقىنى جيناپ وتىرۋى كەرەك. مۇندا دا سول جينالعان اقشانىڭ 30 پايىزىن اۆتورلىق قوعامى ءوزى الىپ، 70 پايىزىن اۆتورلارعا تەڭدەي ءبولىپ بەرۋى كەرەك. ءبىراق تويحانالاردا نە بولىپ جاتقانى بىزگە جۇمباق. ويتكەنى ەسەپتىڭ ءبارى قاعاز جۇزىندە جۇرگىزىلەدى. بىت- شىت ءبارى. سالانى سيفرلاندىرۋ كەرەك دەپ وتىرعانىمىز سول. ونىڭ شەشىمى بار، Audoo پلاتفورماسى دەپ اتالادى. وسى پلاتفورما ارقىلى مەرەكەلىك شارالار مەن توي- جيىنداردا ورىندالاتىن تۋىندىلاردىڭ اينالىمىن رەتتەۋگە بولادى.
- YouTube-تە ءشامشى اندەرى رۇقساتسىز كورسەتىلىپ جاتقانىن ايتتىڭىز عوي. ءبىز بۇل رەسۋرستى اۆتورلىق قۇقىقتى قاتتى ساقتايدى دەپ بىلەمىز. سوندا قازاق اۆتورلارىنىڭ قۇقىعى مۇندا دا قورعالماعان با؟
- YouTube تە تەك ءشامشى اتامىزدىڭ عانا اندەرىن رۇقساتسىز پايدالانىپ جۇرگەن 100گە جۋىق «پيرات» بار. ءبىز ولاردى دا Ozen لەيبلى ارقىلى تارتىپكە شاقىرايىق دەپ وتىرمىز. ولارمەن ەندى Ozen ماماندارى اينالىسادى.
P. S. سۇحبات سوڭىندا بوتاگوز قالداياقوۆا بىزدەن ءشامشى اۋلەتى بايلانىس ورناتقىسى كەلەتىن اۆتورلاردىڭ ءتىزىمىن جاريالاۋىمىزدى ءوتىندى. ولاردىڭ ىشىندە كوزى ءتىرى قالامگەرلەر دە بار. ب. قالداياقوۆا حابارلاسۋلارىن (77010344560) وتىنەدى. ىزدەۋ سالۋداعى ماقساتى - ءشامشى قالداياقوۆتىڭ ەلگە تانىلماي قالعان اندەرىن تاۋىپ، كومپوزيتورمەن تاندەم قۇرىپ جۇمىس ىستەگەن قالامگەرلەردىڭ اۆتورلىق قۇقىعىن بىرلەسىپ قورعاۋ.
گۋسمان احمەدزيانوۆ
ماحمۋد حۋساينوۆ
ماكسۋتبەك مانچەكين
زەينوللا شۇكىروۆ
ەركەش يبراگيم
قۋاندىق شاڭعىتبايەۆ
نۇتفوللا شاكەنوۆ
قوسجان مۇسىرەپوۆ
قابدىكارىم ىدىرىسوۆ
ادىلبەك ءابايدىلدانوۆ
اقۇشتاپ باقتىگەرەيەۆا
اۆتور
ەسىمجان ناقتىباي
