ءۇش وڭىردە جاڭا تەاتر عيماراتتارى سالىنادى
استانا. KAZINFORM - ەلىمىزدىڭ ءۇش وڭىرىندە جاڭا تەاتر عيماراتتارى سالىنادى. بۇل تۋرالى مادەنيەت جانە اقپارات مينيسترلىگىنەن ءمالىم ەتتى.
- بۇگىندە ەلىمىزدە تەاترلاردىڭ جاڭا عيماراتتارىن سالۋ جۇمىستارى جۇرگىزىلۋدە. اقتوبە قالاسىنىڭ استانا اۋدانى التىن وردا شاعىن اۋدانىندا دراما تەاترى قۇرىلىسى ءۇشىن ەلدى مەكەن جەر ساناتىنان جەر تەلىمى بەرىلدى. جاڭا دراما تەاتر عيماراتىن سالۋعا وبلىستىق بيۋدجەتتەن جوبالىق- سمەتالىق قۇجاتتامانى ازىرلەۋگە قاراجات ءبولىندى. جوبالىق-سمەتالىق قۇجات ازىرلەنىپ، مەملەكەتتىك ساراپتاماعا جىبەرىلدى. ساراپتاما ازىرلەۋدىڭ مەرزىمى 2025 -جىلعى 10-شىلدەگە بەلگىلەندى، - دەپ اتاپ وتەدى مينيسترىلىكتەن اگەنتتىك ساۋالىنا وراي.
مۇنان بولەك، قونايەۆ قالاسىندا وبلىستىق دراما تەاتر قۇرىلىسىنىڭ جوبالىق سمەتالىق قۇجاتتاماسىن ازىرلەنىپ جاتىر. جەر ۋچاسكەسى رەسىمدەۋ ساتىسىندا. جالپى الاڭى - 13332,03 شارشى مەتر. جوبانىڭ دايىندىعى 30 پايىز. ساراپتامانىڭ وڭ قورىتىندىسىن الۋدىڭ جوسپارلانعان كۇنى - 2025 -جىلعى جەلتوقسان.
- سونداي-اق، شىمكەنت قالاسىنىڭ اكىمدىگى شىمكەنت سيتي شاعىن اۋدانىندا سالىنۋى جوسپارلانعان وپەرا جانە بالەت تەاترى عيماراتىنىڭ قۇرىلىسى بويىنشا جوبالىق-سمەتالىق قۇجاتتاما ازىرلەۋ ءۇشىن ۇكىمەت قاۋلىسىنا سايكەس جوبالاۋشى مەكەمە رەتىندە «Qazaq Project» ج ش س ايقىندالعانىن مالىمدەدى. قازىرگى كەزدە وبەكتىنىڭ ەسكيزدىك جوباسى ازىرلەنۋدە جانە ءتيىستى مەكەمەلەرمەن كەلىسىلۋدە. سونىمەن قاتار جوبالىق-سمەتالىق قۇجاتتاما ازىرلەۋ ءۇشىن قاجەتتى قاراجاتقا بيۋدجەتتىك ءوتىنىم جەرگىلىكتى بيۋدجەتتى ناقتىلاۋ كەزىندە بەرىلەتىن بولادى. جوعارىدا ايتىلعانداردىڭ نەگىزىندە بيۋدجەت قۇرىلىسى بويىنشا بيۋدجەتتىك وتىنىمدەر جوبالىق-سمەتالىق قۇجاتتاما دايىن بولعاننان كەيىن بيۋدجەتتىك زاڭناماعا سايكەس ازىرلەنەدى، - دەدى ۆەدومستۆودان.
ەستەرىڭىزگە سالا كەتسەك، مەملەكەت باسشىسى قاسىم-جومارت توقايەۆ بۋرابايدا وتكەن ۇلتتىق قۇرىلتايدىڭ 4-وتىرىسىندا سەمەيدە ءبىر عيماراتتا ءۇش بىردەي تەاتر سىعىلىسىپ وتىرعانىن، ايماقتاردا تەاترلاردى سالۋعا جانە دامىتۋعا باسا نازار اۋدارۋ كەرەكتىگىن ايتقان ەدى.
وسى ورايدا سەمەيدە 15 ميلليارد تەڭگەگە كونگرەسس حولل سالىناتىندىعى بەلگىلى بولدى.
