ءدىني باسقارما ماساڭ كۇيدە ۇستالعان يمامنىڭ قانداي ىشىمدىك ىشكەنى تۋرالى سۇراققا جاۋاپ بەردى

استانا. KAZINFORM - قوستاناي وبلىسىنىڭ باس يمامى باحىتبەك تاجىمبەتتى ءتارتىپ ساقشىلارى بۋرابايداعى «رەگيون» تۇنگى كلۋبىنىڭ جانىندا «حايلاندەر» كولىگىمەن كەتىپ بارا جاتقاندا قولعا تۇسىرگەن. كەيىن ءوڭىردىڭ باس يمامى جۇمىستان قۋىلدى.

وقيعانىڭ ءمان- جايىن ءبىلۋ ماقساتىندا قازاقستان مۇسىلماندارى ءدىني باسقارماسىنا رەداكسيالىق ساۋال جولداعان ەدىك.

«قوستاناي وبلىسى بويىنشا بۇرىنعى وكىل يمام باقىتبەك تاجىمبەتتىڭ بۋرابايدا قانداي سۋسىن ىشكەندىگى جونىندە بىزدە ناقتى اقپارات جوق»، - دەيدى ءدىني باسقارمادان.

ايتا كەتەيىك، الەۋمەتتىك جەلىدە تاراعان جازبادا يمام ءتارتىپ ساقشىلارىنا قىمىز ءىشتىم دەگەن.

وسى ورايدا ق م د ب، قىمىز - بيەنىڭ سۇتىنەن دايىندالاتىن تابيعي ءونىم جانە ەجەلدەن كەلە جاتقان قازاقتىڭ ءداستۇرلى سۋسىنى بولعاندىقتان يسلام شاريعاتى قىمىز ىشۋگە تىيىم سالمايتىندىعىن حابارلاپ وتىر.

«باقىتبەك تاجىمبەتكە قاتىستى وقيعاعا بايلانىستى قازاقستان مۇسىلماندارى ءدىني باسقارماسى ءتوراعاسىنىڭ باستاماسىمەن يمامدارعا قىزمەتتىك ەتيكا، ءدىن ءىسىنىڭ جانە جاماعاتپەن جۇمىستىڭ جاۋاپكەرشىلىگى جونىندە ارنايى جينالىس ۇيىمداستىرىلىپ، ناسيحات ايتىلدى. ءدىن قىزمەتكەرلەرىنە، وبلىس باس يمامدارىنا ناقتى تاپسىرمالار بەرىلىپ، رۋحانيات ىسىنە ىجداھاتتىلىقپەن قاراۋعا شاقىرىلدى»، - دەلىنگەن رەسمي اقپاراتتا.

ءدىني باسقارمانىڭ مالىمەتىنشە، يمامدار مەن مەشىت قىزمەتكەرلەرىن جۇمىسقا قابىلداۋ ءۇشىن قويىلاتىن تالاپتار 2023 -جىلعى 15-ناۋرىزدا قازاقستان مۇسىلماندارى ءدىني باسقارماسى عۇلامالار كەڭەسىنىڭ XXXVII ماجىلىسىندە بەكىتىلگەن «ءدىني قىزمەتكەرلەردىڭ لاۋازىمدىق مىندەتتەرى» اتتى كونتسەپتۋالدى قۇجاتپەن رەتتەلەدى. اتالعان قۇجات ق م د ب- نىڭ رەسمي سايتىندا (muftyat.kz) قولجەتىمدى.

ەسكە سالساق، 25-شىلدەدە بۋرابايدا ماساڭ كۇيدە كولىك جۇرگىزگەن قوستانايدىڭ باس يمامى ۇستالعانىن جازعان بولاتىنبىز. پوليتسيا ءوڭىردىڭ باس يمامىنا قاتىستى اكىمشىلىك حاتتاما تولتىرعان.

سول كۇنى قازاقستان مۇسىلماندارى ءدىني باسقارماسى ماس كۇيىندە ۇستالعان قوستاناي يمامىن جۇمىستان شىعارعانىن حابارلاپ، ەلدەن كەشىرىم سۇرادى.

ودان بولەك، ماساڭ كۇيدە ۇستالعان يمامنىڭ 7 جىلعا كولىك جۇرگىزۋ قۇقىعىنان ايرىلعانى تۋرالى حابارلاعان بولاتىنبىز.