ءدىنارالىق ديالوگقا جاستاردى كوبىرەك تارتۋ كەرەك - ماۋلەن اشىمبايەۆ
استانا. KAZINFORM - سەنات ءتوراعاسى ماۋلەن اشىمبايەۆ ەلوردادا ءوتىپ جاتقان الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ 22- وتىرىسىندا كونفەسسيالار مەن مادەنيەتتەر اراسىنداعى ديالوگقا جاستاردى كوبىرەك تارتۋدىڭ ماڭىزىنا توقتالدى.
«سەزدى دامىتۋ تۇجىرىمداماسىنىڭ اياسىندا ۇسىنىلىپ وتىرعان ماڭىزدى باستامانىڭ ءبىرى - جاس ءدىن كوشباسشىلارىنىڭ فورۋمىن وتكىزۋ. كونفەسسياارالىق جانە مادەنيەتتەر اراسىنداعى ديالوگقا جاستاردى بەلسەندىرەك جۇمىلدىرۋ قاجەت ەكەنى ايدان انىق. سەز جۇمىسىنا جاس كوشباسشىلاردىڭ قاتىسۋى وركەنيەتتەر اراسىنداعى، دىندەر اراسىنداعى ديالوگتا ءداستۇر مەن ساباقتاستىقتى ساقتاۋعا مۇمكىندىك بەرەدى»، - دەدى ول.
سەنات سپيكەرى اتالعان ۇسىنىس بيىلعى جيىن اياسىندا ىسكە اسىپ جاتقانىن اتاپ ءوتتى.
«ەرتەڭ ءتۇرلى كونفەسسيالاردىڭ، حالىقارالىق قوعامدىق ۇيىمداردىڭ جاس وكىلدەرى، كەلەشەگىنەن زور ءۇمىت كۇتتىرەتىن عالىمدار مەن ساياساتكەرلەر استانادا جينالىپ، جاس كوشباسشىلاردىڭ زاماناۋي الەمنىڭ ۇندەستىكپەن دامۋىنداعى ءرولىن تالقىلايدى. وسى جانە وزگە دە قادامدار ءبىزدىڭ سەزدىڭ ارى قاراي دامۋىنا جانە ىقپالىنىڭ ارتا تۇسۋىنە، سونداي-اق رۋحاني ديپلوماتيانى ىلگەرىلەتۋگە، جاھاندىق دەڭگەيدەگى ءدىنارالىق، مادەنيەتارالىق ديالوگتىڭ ورناۋىنا سەپتىگىن تيگىزەتىنىنەن سەنىمدىمىن»، - دەدى ماۋلەن اشىمبايەۆ.
