ءدان سەبىلگەن ساتتەن باستاپ، داستارحانعا كەلگەنگە دەيىن ءونىم سيفرلىق تىركەۋدە بولادى
استانا. KAZINFORM - بۇل فەرمەرلەردىڭ جۇمىسىن جەڭىلدەتىپ، جانۋار تۋرالى مالىمەتتەردى ناقتىلاۋعا مۇمكىندىك بەرمەك. بۇل تۋرالى Jibek joly تەلەارناسىنىڭ جاڭالىقتار قىزمەتىندە ايتتى.
ال ءدال وسىنداي سيفرلىق جاڭعىرۋ وسىمدىك شارۋاشىلىعىندا دا قولعا الىنعان. قازىر ارنايى جۇيە جاسالىپ جاتىر. ول ارقىلى ءدان سەبىلگەن ساتتەن باستاپ، دايىن ءونىم داستارحانعا كەلگەنگە دەيىن بۇكىل جول تسيفرلىق تىركەۋدە بولادى.
- وسىمدىك شارۋاشىلىعىن قاداعالاۋ جۇيەسىن ازىرلەپ جاتىرمىز. ونىڭ نەگىزگى ماقساتى ازىق-تۇلىك قاۋىپسىزىدىگىن قامتاماسىز ەتۋ، - دەيدى اگروونەركاسىپ كەشەنىندەگى ەكونوميكالىق ساياساتتى تالداۋ ورتالىعىنىڭ جوبالىق مەنەدجەرى ايدار جاقسىبايەۆ.
بۇرىن جەر ينسپەكتورلارى القاپتى جاياۋ ارالايتىن. اقپاراتتىق جۇيەلەر ءبىر-بىرىمەن بايلانىسپاعاندىقتان، تەكسەرىس ۇزاققا سوزىلىپ كەتەتىن. ءقازىر بۇل ءادىس وتكەننىڭ ەنشىسىندە.
بۇگىندە 116 ميلليون گەكتار جەر تولىقتاي سپۋتنيكتىك باقىلاۋعا الىنعان. 2022 -جىلدان بەرى 12 ميلليون گەكتار پايدالانىلماعان جەر مەملەكەتكە قايتارىلدى. بيىل جىل سوڭىنا دەيىن تاعى 2 ميلليون گەكتار القاپ كەرى قايتارىلماق. ال جالپى 5 ميلليون گەكتار جەر جەرگىلىكتى حالىقتىڭ قاجەتىنە قايتا بولىنگەن. ەندى جەر يەلەرى ەسكەرتۋ حابارلاماسىن SMS ارقىلى الىپ، بارلىق مالىمەتتى جەكە كابينەتتەن كورە الادى.
- قازىرگى تاڭدا مينيسترلىك تاراپىنان كورسەتىلەتىن 79 مەملەكەتتىك قىزمەتتىڭ 77 ى ونلاين قولجەتىمدى. بۇل ياعني %97 ى، - دەيدى اۋىل شارۋاشىلىعى مينيسترلىگىنىڭ باسقارما باسشىسى جاقسىلىق ەركىنبەك ۇلى.
ايتا كەتۋ كەرەك، قازىر ەل اۋماعىندا 200 دەن استام سيفرلىق فەرما بار. ولار درونداردى، داتچيكتەردى جانە GPS جۇيەلەرىن بەلسەندى پايدالانادى. بۇل ناقتى ۋاقىت رەجيمىندە توپىراقتىڭ، ەگىس القاپتارىنىڭ جاعدايىن باقىلاۋعا كومەكتەسىپ، ەگۋ، ۇرىقتاندىرۋ جانە سۋارۋ پروتسەسىن وڭتايلاندىرۋعا جول اشادى.
- قازىر سيفرلىق دامۋ مينيسترلىگىمەن فەرمالارعا ينتەرنەت جەتكىزۋ بويىنشا بىرىگىپ جۇمىس جاساپ جاتىرمىز، - دەيدى اۋىل شارۋاشىلىعى مينيسترلىگىنىڭ باسقارما باسشىسى جاقسىلىق ەركىنبەك ۇلى.
جالپى اگروسالاداعى سيفرلاندىرۋ شىعىندى قىسقارتىپ، ونىمدىلىكتىڭ ۇلعايۋىنا، قىزمەت كورسەتۋدى جەدەلدەتىپ، اشىقتىقتىڭ ارتۋىنا سەپ بولماق. وسىلايشا فەرمەر ۋاقىتىن ۇنەمدەيدى، مەملەكەت باقىلاۋدى كۇشەيتەدى، ال قوعام ازىق-تۇلىك قاۋىپسىزدىگىنە سەنىم ارتادى.
