ءبىز قىتايمەن قارىم-قاتىناستى جوعارى باعالايمىز - پرەزيدەنت

استانا. KAZINFORM - مەملەكەت باسشىسى قىتاي كوممۋنيستىك پارتياسى ورتالىق كوميتەتى حالىقارالىق بايلانىستار ءبولىمىنىڭ مەڭگەرۋشىسى ليۋ جياۋچاۋدى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.

كەزدەسۋ بارىسىندا قاسىم-جومارت توقايەۆ قازاق-قىتاي ماڭگى ءارى جان-جاقتى ستراتەگيالىق سەرىكتەستىگى قارقىندى دامىپ كەلە جاتقانىن جانە بولاشاقتا دا وسى باعىتتان اينىمايتىنىن اتاپ ءوتتى.

- بۇگىندە ءبىزدىڭ بەرىك بايلانىستارىمىز ماڭگى دوستىق، تاتۋ كورشىلىك پەن ستراتەگيالىق سەرىكتەستىككە نەگىزدەلگەن ءوزارا ءتيىمدى مەملەكەتارالىق ىقپالداستىقتىڭ ۇلگىسى سانالادى. ءبىز ق ح ر- مەن قارىم-قاتىناستى جوعارى باعالايمىز. سونداي-اق قازاقستان تاراپىنان جان-جاقتى ىنتىماقتاستىقتى نىعايتۋ ءۇشىن بارلىق قاجەتتى شارا قابىلدانادى. سونىمەن قاتار مەن قىتاي كومپارتياسى ورتالىق كوميتەتىنىڭ باس حاتشىسى، قىتاي حالىق رەسپۋبليكاسىنىڭ ءتوراعاسى شي جينپيڭ مىرزامەن دوستىعىمدى وتە جوعارى باعالايمىن، - دەدى مەملەكەت باسشىسى.

پرەزيدەنت ماۋسىم ايىندا ەكىنشى «ورتالىق ازيا - قىتاي» سامميتىنە قاتىسۋ ءۇشىن استاناعا كەلەتىن ق ح ر ءتوراعاسىنىڭ ساپارى اياسىندا ستراتەگيالىق سەرىكتەستىكتىڭ جاڭا مۇمكىندىكتەرى ايقىندالاتىنىنا سەنىم ءبىلدىردى.

مەملەكەت باسشىسى قازاقستان مەن قىتايدىڭ كوپجاقتى قۇرىلىمدار اياسىنداعى كوزقاراستارى ۇقساس ەكەنىن اتاپ ءوتىپ، ءتوراعا شي جينپيڭنىڭ حالىقارالىق قۇقىقتىڭ نەگىزگى قاعيداتتارى مەن ب ۇ ۇ جارعىسىنا ساي ءادىل الەمدىك ءتارتىپتى قالىپتاستىرۋدى كوزدەيتىن جاھاندىق باستامالارىن قولدايتىنىن جەتكىزدى.

بۇدان بولەك، قاسىم-جومارت توقايەۆ ەلىمىزدىڭ «ءبىرتۇتاس قىتاي» ساياساتىنا بەيىل ەكەنىن راستادى.

ءوز كەزەگىندە ليۋ تسزيانچاو مەملەكەت باسشىسىنا ءتوراعا شي جينپيڭنىڭ ىستىق ىقىلاسىن جەتكىزدى. ونىڭ ايتۋىنشا، قىتاي قازاقستاندى ستراتەگيالىق تۇرعىدان ماڭىزدى سەرىكتەس رەتىندە قاراستىرادى جانە قازاق-قىتاي ماڭگى ءارى جان-جاقتى ارىپتەستىگىن تەرەڭدەتۋگە ەرەكشە ءمان بەرەدى.

كەزدەسۋ بارىسىندا ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى نىعايتۋ جولدارى تالقىلاندى. وسى ورايدا قاسىم-جومارت توقايەۆ ەكى ەلدىڭ تاۋار اينالىمىن ۇلعايتىپ، كولىك-لوگيستيكا، ەنەرگەتيكا جانە جاساندى ينتەللەكتىنى دامىتۋ سالالارىندا ءىرى ينۆەستيتسيالىق جوبالاردى جۇزەگە اسىرۋعا وراسان زور مۇمكىندىك بار ەكەنىن اتاپ ءوتتى.

ايتا كەتەلىك سلوۆەنيا پرەزيدەنتى ناتاشا پيرتس-مۋسار قازاقستانعا رەسمي ساپارمەن كەلەتىنى تۋرالى جازعان ەدىك.