ءبىرىڭعاي تولەم قۇجاتى نە ءۇشىن قاجەت جانە كىمگە ءتيىمدى
پەتروپاۆل. KAZINFORM - قازاقستاندا تۇرعىن ءۇي-كوممۋنالدىق قىزمەتتەرگە تولەم جاساۋدى جەڭىلدەتۋ ماقساتىندا ءبىرىڭعاي تولەم قۇجاتى جۇيەسى كەزەڭ-كەزەڭمەن ەنگىزىلىپ جاتىر. بۇل باستاما - سيفرلاندىرۋ ساياساتى اياسىنداعى ماڭىزدى جوبالاردىڭ ءبىرى جانە حالىق پەن كوممۋنالدىق مەكەمەلەر اراسىنداعى ءوزارا ەسەپ ايىرىسۋدى وڭتايلاندىرۋعا باعىتتالعان.
پيلوتتىق جوبا جانە العاشقى تاجىريبە
ءبىرىڭعاي تولەم قۇجاتى ەل بويىنشا ەنگىزىلمەس بۇرىن، پيلوتتىق رەجيمدە بىرنەشە وڭىردە سىناقتان وتكىزىلدى. العاشقىلاردىڭ ءبىرى بولىپ 2015-جىلى پەتروپاۆل قالاسى بۇل باستامانى جۇزەگە اسىرىپ، كوممۋنالدىق قىزمەتتەردى ءبىر تولەم قۇجاتىنا بىرىكتىرۋدى قولعا الدى.
وسى ماقساتتا «سيەۆكازەنەرگو» جشس بازاسىندا ءبىرىڭعاي ەسەپ ايىرىسۋ ورتالىعى (ب ە ا و) قۇرىلىپ، تۇرعىندارعا ءبىر تەرەزە قاعيداتى بويىنشا قىزمەت كورسەتۋدى باستادى.
2025-جىلدىڭ قاڭتار ايىنان باستاپ بۇل مىندەت «سولتۇستىك قازاقستان ەلەكترجەلىستىك تاراتۋ كومپانياسى» ا ق جۇكتەلدى.
- ورتالىق ەڭ الدىمەن تۇرعىندارعا ىڭعايلى بولۋ ءۇشىن قۇرىلدى. مۇندا اي سايىن ءبىرىڭعاي تولەم قۇجاتىن قالىپتاستىرادى، وڭدەپ، باسىپ شىعارىپ، ابونەنتتەرگە جەتكىزەدى. سونداي-اق تولەمدەردى قابىلداپ، كوممۋنالدىق، تۇرعىن ءۇي، ەكسپلۋاتاتسيالىق جانە باسقا دا قىزمەت جەتكىزۋشىلەردىڭ شوتىنا جىبەرىلەدى. ابونەنتتىك دەرەكتەر بازاسىن جيناقتايدى، جاڭارتادى جانە كوممۋنالدىق قىزمەتتەر بويىنشا تولەمدەردى ەسەپتەيدى. بۇدان بولەك تۇتىنۋشىلارمەن كەرى بايلانىس ورناتىپ، قاجەت بولسا كەڭەس بەرەدى. قاتەلىك كەتسە، قارىزدارعا قاتىستى، ەسەپتەۋلەر بويىنشا بارلىق سۇراقتارعا تولىق جاۋاپتى وسى ورتالىقتان الۋعا بولادى، - دەيدى «سولتۇستىك قازاقستان ەلەكترجەلىستىك تاراتۋ كومپانياسى» ا ق ب ە ا و جانە تۇتىنۋشىلارمەن جۇمىس بويىنشا باسقارمانىڭ باسشىسى ءاليا باەكينا.
قازىر پەتروپاۆلدا ب ە ا و « قىزىلجار سۋ» ج ش س، «گورگاز-سەرۆيس» ج ش س، «قازاقتەلەكوم» ا ق، قوقىس شىعارۋ، ليفت، دوموفون، بەينەباقىلاۋ قىزمەتتەرىن كورسەتەتىن ۇيىمدارمەن، پيك جانە ميب-تەرمەن كەلىسىمگە وتىرعان. بۇل كوممۋنالدىق قىزمەتتەردىڭ تۇبىرتەگى ءبىر قۇجاتقا بىرىكتىرىلگەن.
ماماننىڭ ايتۋىنشا، ب ە ا و جانىنان بايلانىس ورتالىعى اشىلعان. ول كۇن سايىن ساعات 08:00 دەن 20:00 گە دەيىن، ءۇزىلىسسىز جانە دەمالىسسىز جۇمىس ىستەيدى. مەكەمە 8 اۋداننىڭ تۇتىنۋشىلارىنا دا قىزمەت كورسەتەدى. قوڭىراۋلار مەن وتىنىشتەرگە تولىق جاۋاپ بەرىلەدى.
تۇتىنۋشىلار ءۇشىن «جەكە كابينەت» قىزمەتى ىسكە قوسىلعان. وندا: تولەم تۋرالى مالىمەتتەرمەن تانىسۋعا، قارىزدى كورۋگە، تولەم شوتىن قالىپتاستىرۋعا، سۋ جانە ەلەكتر ەسەپتەۋ قۇرالدارىنىڭ كورسەتكىشتەرىن جىبەرۋگە، تاريفتىك كالكۋلياتور ارقىلى الدىن الا ەسەپ جۇرگىزۋگە بولادى.
تۇتىنۋشىعا قول جەتىمدى قىزمەت
ونەركاسىپ جانە قۇرىلىس مينيسترلىگىنىڭ مالىمەتىنشە، قازاقستاندا ءبىرىڭعاي ەسەپ ايىرىسۋ ورتالىعىنىڭ سانى 44 كە جەتتى، 20 ءوڭىر قامتىلعان.
ءبىر ب ە ا و بىرنەشە وڭىرگە قىزمەت كورسەتۋى مۇمكىن.
سونداي-اق، ورالدا: «باتىس ەنەرگورەسۋرسى» ج ش س، پەتروپاۆلدا: «سيەۆكازەنەرگوسبىت» ج ش س، قوستاناي وبلىسىندا: «ەنەرگيارك رۋدنىي» ج ش س جانە باسقالار ءبىرىڭعاي تولەم قۇجاتىن وبلىستىق جانە اۋداندىق دەڭگەيدە دە ۇسىنادى.
ال استانا مەن الماتى سياقتى ءىرى قالالارعا جانە الماتى، اقمولا وبلىستارىنا «السەكو» ا ق قىزمەت كورسەتەدى. جاقىندا بۇل كومپانيا «استانا-ەرتس» ج ش س ساتىپ الدى.
- ءبىز «استانا-ەرتس» ج ش س وپەراتسيالىق مودەلىنە وزگەرىستەر ەنگىزۋدى جوسپارلاپ وتىرعان جوقپىز. كەرىسىنشە، ورتاق ماقساتقا جەتۋ ءۇشىن بىرلەسىپ جۇمىس ىستەۋدى جالعاستىرامىز، ساپانى باسقارۋ، سيفرلاندىرۋ جانە كليەنتتىك سەرۆيس سالاسىنداعى تاجىريبەمىزبەن تولىقتىرعىمىز كەلەدى. تۇرعىن ءۇي-كوممۋنالدىق قىزمەتتەردىڭ تۇتىنۋشىلارعا ساپاسىن جانە ىڭعايلىلىعىن ارتتىرۋ ءۇشىن «السەكو» ا ق جاڭا سيفرلىق شەشىمدەر ازىرلەپ، ەنگىزەدى. سونىڭ ءبىرى - اپتاسىنا جەتى كۇن-تاۋلىك بويى جۇمىس ىستەيتىن جەكە كابينەت قۇرۋ. بۇل جەردە ەڭ قاجەتتى فۋنكسيالار - تۇبىرتەكتەردى قاراۋ، ەسەپتەگىشتەردىڭ كورسەتكىشتەرىن بەرۋ، تولەم تۋرالى اقپاراتتى قاراۋ قولجەتىمدى بولادى، - دەيدى كومپانيانىڭ كليەنتتىك سەرۆيس كەڭسەسىنىڭ ديرەكتورى ەلميرا جۇماقۇلوۆا.
ماماننىڭ ايتۋىنشا، بۇدان بولەك ءموبيلدى قوسىمشا ەنگىزىلەدى. مۇندا جەكە كابينەتتىڭ فۋنكتسيونالى قولجەتىمدى بولادى جانە سمارتفون كامەراسى ارقىلى ەسەپتەگىش كورسەتكىشىن اۆتوماتتى تۇردە تانىپ، ەسەپكە الاتىن، سەرۆيستىك كومپانيالارعا ونلاين ءوتىنىم بەرۋ سەكىلدى ءبىرقاتار جاڭا قىزمەتتەردى قوسۋ جوسپارلانعان.
قاعاز تۇبىرتەكتەن باس تارتۋ جانە ەلەكتروندىق تولەمدەر
ءبىرىڭعاي تولەم قۇجاتى جۇيەسىنىڭ ءتيىمدى جۇزەگە اسۋىنا ءبىرىڭعاي ەسەپ ايىرىسۋ ورتالىقتارىمەن قاتار ءبىرقاتار سەرىكتەس قۇرىلىمدار، ونىڭ ىشىندە قازپوشتا دا قاتىسادى.
قازپوشتا ءوز بولىمشەلەرى ارقىلى تۇرعىنداردان كوممۋنالدىق تولەم قابىلدايدى. بۇل قىزمەت كورسەتۋشى ۇيىمدارمەن جاسالعان شارتتار نەگىزىندە جۇرگىزىلەدى.
- پوشتا ۇيىمى ءبىرقاتار وڭىرلەردە تۇبىرتەكتەردى جەتكىزۋمەن اينالىسادى. اتاپ ايتقاندا، پاۆلودار، الماتى، شىعىس قازاقستان، قاراعاندى، جامبىل، اباي جانە سولتۇستىك قازاقستان وبلىستارىندا قىزمەت كورسەتىلەدى. 2024 -جىلدىڭ قورىتىندىسى بويىنشا «قازپوشتا» ا ق 1438500 دەن استام ابونەنتكە قاعاز نۇسقاداعى ەسەپ-شوتتاردى جەتكىزگەن. ايتا كەتەرلىك جايت، تۇرعىنداردان قاعاز تۇبىرتەك جەتكىزۋ ءۇشىن ەشقانداي كوميسسيالىق اقى الىنبايدى، - دەيدى «قازپوشتا» ا ق قارجىلىق بيزنەس دەپارتامەنتىنىڭ ديرەكتورى گۇلنارا مولداگاليەۆا.
جۇيەگە كوشۋ نەگە كەشەۋىلدەپ جاتىر؟
ونەركاسىپ جانە قۇرىلىس مينيسترلىگىنىڭ مالىمەتىنشە، شىمكەنتتە سۋمەن جابدىقتاۋدىڭ كوممۋنالدىق قىزمەتىن ءبىرىڭعاي تولەم قۇجاتىنا ەنگىزۋ جۇمىستارى باستالدى.
الماتى، باتىس قازاقستان جانە تۇركىستان وبلىستارىندا بارلىق اۋماق قامتىلىپ، ەلەكترمەن جابدىقتاۋ بويىنشا قىزمەتتەر قوسىلدى، پاۆلودار وبلىسىندا سۋ جانە ەلەكترمەن جابدىقتاۋ ەنگىزىلىپ، قازىرگى ۋاقىتتا قالعان كوممۋنالدىق قىزمەتتەردى جۇيەگە قوسۋ جۇمىسى اتقارىلىپ جاتىر.
سونىمەن قاتار، ليفت جانە دوموفون قىزمەتتەرىن ەنگىزۋ جوسپارلانعان، ءتيىستى جۇمىس اكىمدىكتەر تاراپىنان اتقارىلادى.
- قازىرگى ۋاقىتتا وبلىستىق ماڭىزى بار 4 قالا - قاراعاندى وبلىسىنداعى تەمىرتاۋ، ساران، پريوزەرسك قالالارى، ماڭعىستاۋ وبلىسىنداعى جاڭاوزەن قالاسى جانە 2897 اۋىل، اۋداندىق ماڭىزى بار 19 قالانى قوسا العاندا 61 اۋدان قامتىلماعان. ونىڭ نەگىزگى سەبەپتەرى - اقپاراتتىق تەحنولوگيالار ينفراقۇرىلىمىنىڭ جوقتىعى، ءبىرىڭعاي ەسەپ ايىرىسۋ ورتالىعىنىڭ تەحنيكالىق دايىن بولماۋى، قوسىلۋدان باس تارتۋ جانە باسقالار. جالپى بۇل جۇيەگە وسى جىلدىڭ سوڭىنا دەيىن كەزەڭ-كەزەڭىمەن تولىق كوشۋ جوسپارلانىپ وتىر، - دەلىنگەن ۆەدومستۆونىڭ رەسمي جاۋابىندا.
ەستەرىڭىزگە سالايىق، «ەنەرگەتيكالىق جانە كوممۋنالدىق سەكتوردى جاڭعىرتۋ» ۇلتتىق جوباسى اياسىندا ت ۇ ك ش سالاسىنا 10 تريلليون تەڭگە ينۆەستيتسيا تارتىلاتىنىن جازعان ەدىك.
