ءبىرىڭعاي ۋاقىت بەلدەۋىنە كوشكەندە وقۋشىلار ساباعى قالاي رەتتەلەدى

استانا. KAZINFORM – ق ر وقۋ-اعارتۋ ءمينيسترى عاني بەيسەمبايەۆ 1-ناۋرىزدا ءبىرىڭعاي ۋاقىت بەلدەۋىنە كوشۋ جانە ونىڭ وقۋ پروتسەسىنە اسەرى تۋرالى پىكىر ءبىلدىردى.

«نە دەگەنمەن، بۇل شەشىمدى ءتيىستى ساراپشىلار قاۋىمداستىعى مەن عالىمدار تالداپ-تەكسەرىپ، قابىلدادى. سوندىقتان، مۇنداي شەشىم قابىلدانعان بولسا، بارلىعى ورىندى»، - دەدى عاني بەيسەمبايەۆ ۇكىمەتتە وتكەن بريفينگتە.

سونىمەن بىرگە، مينيستر ۋاقىت اۋىسۋىنىڭ مەكتەپتەردەگى وقۋ پروتسەسىنە ىقتيمال اسەرى تۋرالى ايتىپ بەردى.

«وقۋ ۋاقىتىنىڭ ەسەبىنەن، ارينە، جەرگىلىكتى اتقارۋشى ورگانعا قاجەت بولعان جاعدايدا ساباقتىڭ باستالۋ ۋاقىتىن قايتا قاراۋعا مۇمكىندىك بەرەمىز»، - دەپ تولىقتىردى سپيكەر.

بۇعان دەيىن عاني بەيسەمبايەۆ قازاق ءتىلى وقۋلىعىنداعى «كوگونىس» (көгөніс) ءسوزىن وقۋلىققا كىم ەنگىزگەنىن، مۇنىڭ قانشالىقتى دۇرىس ەكەنىن تۇسىندىرگەن ەدى.

ءوز كەزەگىندە مينيستر «كوگونىس» ءسوزىنىڭ دۇرىس جازىلعانىن ايتتى.

«ا. بايتۇرسىنوۆ اتىنداعى ءتىل ءبىلىمى ينستيتۋتى بار. سول جەردەگى عالىمدار قاي ءسوزدىڭ قالاي جازىلۋىنا بايلانىستى شەشىم قابىلدايدى. بۇل وقۋلىق ساراپتامادان وتكەن، ساراپتاماعا دەيىن دە لينگۆيستيكالىق تەكسەرۋدەن وتەدى. تىلگە قاتىستى وقۋلىققا ەنەتىن بارلىق وزگەرىستەر ءتيىستى مەملەكەتتىك ورگاننىڭ قاداعالاۋىندا. بۇل سۇراقتى ينستيتۋتتان قوسىمشا سۇراي الامىز. مەن دە ساراپشىلار قابىلداعان كاسىبي شەشىممەن كەلىسۋىم قاجەت دەپ ەسەپتەيمىن»، - دەپ جاۋاپ بەردى وقۋ- اعارتۋ ءمينيسترى.

اۆتور

ايجان سەرىكجان قىزى