ءبىرىڭعاي ۋاقىت بەلدەۋ بيزنەسكە قالاي اسەر ەتەدى

استانا. KAZINFORM - ق ر ۇلتتىق ەكونوميكا ءبىرىنشى ۆيتسە-ءمينيسترى تيمۋر جاقسىلىقوۆ ۋاقىت بەلدەۋىنىڭ وزگەرۋى ەلىمىزدەگى بيزنەسكە قالاي اسەر ەتەتىنىن ايتتى.

«ساۋدا مينيسترلىگىندەگى ارىپتەستەرىمىز بۇل ماسەلەمەن جان-جاقتى اينالىسىپ جاتىر. ولار ءتيىستى تالداۋ جاسادى. مەنىڭ ويىمشا، ولار بۇل سۇراققا تولىعىراق جاۋاپ بەرە الادى. بيزنەس ءۇشىن ايتارلىقتاي شىعىن بولمايدى دەپ سانايمىز. كەرىسىنشە، تۇتىنۋشىلار قانداي دا ءبىر قولايسىز جاعدايعا تاپ بولسا، بۇل بىرەن- ساران سيپاتتا بولادى»، - دەدى ت. جاقسىلىقوۆ سەناتتا وتكەن بريفينگىدە.

ونىڭ ايتۋىنشا، كەڭ بايتاق ەلىمىزدىڭ بارلىق ايماقتارىندا جۇمىس كۇنى ءبىر ۋاقىتتا باستالاتىندىقتان، بيزنەس ۇزاق مەرزىمدى وڭ ناتيجە الادى.

«ال مەملەكەتتىك قىزمەتتەردى الۋعا قاتىستى بارلىق راسىمدەر ءبىر ۋاقىتتا باستالىپ، ءبىر ۋاقىتتا اياقتالادى. بۇل ءوز كەزەگىندە بيزنەسكە قاتىستى جاقسى جاعداي جاساۋعا مۇمكىندىك بەرەدى»، - دەدى ۆيتسە-مينيستر.

ەسكە سالا كەتەيىك، 1-ناۋرىزدان باستاپ ەلىمىزدىڭ بۇكىل اۋماعىندا ءبىرىڭعاي ۋاقىت بەلدەۋى ورنايدى.

 

اۆتور
رۋسلان عابباسوۆ