ءبىرقاتار اۋرۋ انىقتالدى: كيىكتەرگە ۆاكسينا ەگۋ مۇمكىن ەمەس

استانا. KAZINFORM - كيىكتەرگە ۆاكسينا ەگۋ مۇمكىن ەمەس. بۇل تۋرالى اۋىل شارۋاشىلىعى مينيسترىلىگى ۆەتەريناريالىق باقىلاۋ جانە قاداعالاۋ كوميتەتىنىڭ ءتوراعاسى قازبەك تاشيموۆ ءمالىم ەتتى.

اتاپ ايتقاندا، بۇگىن ماجىلىستەگى اگرارلىق ماسەلەلەر كوميتەتىنىڭ كەڭەيتىلگەن وتىرىسىندا كيىكتىڭ ەگىس القاپتارى مەن شابىندىقتاردى تاپتاپ كەتۋىنەن باتىس قازاقستان جانە اقمولا وبلىسىنىڭ فەرمەرلەرى مەن اۋىل تۇرعىندارى زارداپ شەگىپ جاتقانى ايتىلدى.

- كيىك سانىنىڭ شەكتەن تىس كوبەيۋى ۆەتەريناريا سالاسىن دا الاڭداتىپ وتىر. ەپيزووتيالىق احۋالدىڭ تۇراقتىلىعى ءبىز ءۇشىن ءبىرىنشى كەزەكتە تۇر. ولاردىڭ سانىنىڭ كۇرت ارتۋى كوپتەگەن فاكتورلارعا الىپ كەلۋى مۇمكىن. ۆەتەريناريا بويىنشا ۇلتتىق رەفەرەنتتىك ورتالىق جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىمەن بىرلەسە ءبىرازدان بەرى ەپيزووتيالىق مونيتورينگتى جۇرگىزىپ كەلەدى. جالپى، ۇلتتىق رەفەرەنتتىك ورتالىق بىلتىردىڭ وزىندە جابايى فاۋناعا 1,5 مىڭنان استام زەرتتەۋ جاسادى. سونىڭ ناتيجەسىندە ءبىرقاتار اۋرۋلاردىڭ دەرەكتەرى كەزدەستى، - دەدى ق. تاشيموۆ.

ونىڭ ايتۋىنشا، اڭنىڭ اراسىندا ءجيى تارالاتىن اۋرۋلاردىڭ تارالۋىنا جول بەرمەۋ ماقساتىندا كيىكتەرگە ۆاكسينا سالۋ مۇمكىن ەمەس. سوندىقتان جۇرگىزگەن مونيتورينگ ناتيجەسىندە، قولداعى مالعا ۆاكتسينا ەگۋ كورسەتكىشى ارتتى. اسىرەسە، كيىك كوپ تاراعان باتىس قازاقستان وبلىسىندا وسى جۇمىستار كۇشەيتىلدى.

بۇدان بۇرىن حابارلانعانداي، قازاق عالىمدارى كيىكتى ارنايى ءتالىمباقتا ءوسىرىپ، زەرتتەپ جاتقانىن جازعان ەدىك.