ءبىر رەت كاليان شەگۋ - 100 تەمەكى تارتقانمەن تەڭ

الماتى. KAZINFORM - كەيىنگى جىلدارى قازاقستاندا تەمەكى شەگەتىندەر سانى 30 پايىزعا ازايدى. بۇل كورسەتكىش - زياندى ادەتتىڭ الدىن الۋعا باعىتتالعان مەملەكەتتىك جانە قوعامدىق شارالاردىڭ تيىمدىلىگىن كورسەتەدى.

بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا الماتى قالالىق پسيحيكالىق دەنساۋلىق ورتالىعى ديرەكتورىنىڭ ورىنباسارى روزا تاتيەۆا مالىمدەدى.

ونىڭ ايتۋىنشا، ەلدە تەمەكى تۇتىناتىنداردىڭ سانى 30 پايىزعا ازايدى. ودان باس تارتقان جاستار جاعى سپورتپەن اينالىسىپ، شىعارماشىلىققا بەت بۇرعان. الايدا سپيكەر ۆەيپ پەن ەلەكتروندى شىلىمعا اۋەس تۇرعىنداردىڭ كوبەيىپ جاتقانىن، اسىرەسە بۇل ونىمدەردىڭ جاسوسپىرىمدەر اراسىندا كەڭ تاراعانىن اتاپ ءوتتى.

- كەي جاستار كالياندى قاۋىپسىز دەپ قابىلدايدى. الايدا ءبىر رەت كاليان شەگۋ - 100 تەمەكى تارتقانمەن تەڭ. ونىڭ تۇتىنىندە نيكوتين، شايىر جانە اۋىر مەتالداردىڭ مولشەرى تەمەكىدەن 3- 5 ەسە كوپ بولۋى مۇمكىن، - دەيدى سپيكەر.

كالياندى جابىق بولمەدە شەككەندە، ونىڭ ءتۇتىنى ينفەكسيالىق اۋرۋلاردىڭ تارالۋىنا جاعداي جاسايدى. ال ءبىر مۇشتىكتى بىرنەشە ادامنىڭ قولدانۋى - جۇقپالى اۋرۋلار ءۇشىن تىكەلەي جول.

- كاليان - اعزانى ۋلايتىن قۇرال عانا ەمەس، جاستاردى تاۋەلدىلىككە يتەرمەلەيتىن الەۋمەتتىك قۇبىلىس. ول تەمەكىدەن دە قاۋىپتى، - دەدى روزا تاتيەۆا.

ساراپشىلاردىڭ پىكىرىنشە، ادام زياندى ادەتتەن نەعۇرلىم ەرتەرەك باس تارتسا، وعان قايتا ورالۋ ىقتيمالدىعى سوعۇرلىم ازايادى. سوندىقتان جاستاردىڭ سالاۋاتتى ءومىر سالتىن ۇستانۋىنا جاعداي جاساۋ - مەملەكەت پەن قوعامنىڭ ورتاق ءارى ماڭىزدى مىندەتى.

ايتۋىنشا، تەمەكىدەن باس تارتقىسى كەلەتىندەر ءۇشىن ەلىمىزدىڭ ەمحانالارىندا 86 ارنايى كەڭەس بەرۋ كابينەتى جۇمىس ىستەيدى.

بۇعان دەيىن الماتىدا 18 مىڭنان استام قوراپ زاڭسىز تەمەكى ءونىمى انىقتالعانى تۋرالى جازعانبىز.

اۆتور

الما مۇقانوۆا