ءبىر ءۇزىم نانىمەن بولىسكەن قازاق حالقىنا العىسىمىز شەكسىز - گەريحان يانديەۆ

كوكشەتاۋ. KAZINFORM - باسىمىزعا كۇن تۋعان شاقتا بىزگە قولداۋ كورسەتىپ، ءبىر ءۇزىم نانىمەن بولىسكەن قازاق حالقىنا العىسىمىز شەكسىز. بۇل تۋرالى اقمولا وبلىستىق «ۆايناح» شەشەن- ينگۋش ەتنومادەني بىرلەستىگىنىڭ ءتوراعاسى، قازاقستان حالقى اسسامبلەياسىنىڭ مۇشەسى گەريحان يانديەۆ ايتتى.

ونىڭ سوزىنشە، 20- عاسىردىڭ باسىنداعى اشارشىلىققا قاراماستان قازاقتار كۇشتەپ قازاقستانعا قونىس اۋدارىلعان وزگە كوپتەگەن ۇلتتار سياقتى شەشەن- ينگۋشتەردى دا قۇشاق جايا قارسى الدى.

«وتكەن عاسىردىڭ 30-جىلدارىنىڭ باسىندا قازاقتار اشتىققا ۇرىنىپ، كوپ اۋىرتپالىق تارتقانى بەلگىلى. قانشاما قازاقستاندىق سول اشارشىلىقتان كوز جۇمدى. سوعان قاراماستان، قوناقجاي قازاق حالقى سول جىلداردا جەر اۋدارىلىپ كەلگەندەردى كەڭ پەيىلمەن قارسى الىپ، ولارعا جاناشىرلىق تانىتتى. مەنىڭ اكەم 14 اعايىندى ەكەن، الىس جولدىڭ اۋىرتپالىعىنا شىداماي سودان 4-ەۋى عانا امان قالدى»، - دەيدى «ۆايناح» شەشەن-ينگۋش قوعامىنىڭ ءتوراعاسى گەريحان يانديەۆ.

وسى رەتتە، ول سول ءبىر قيىن شاقتا قول ۇشىن بەرىپ، كومەگىن اياماعان قوناقجاي قازاق حالقىنىڭ جاقسىلىعىن قازاقستاندا تۇرىپ جاتقان ءار ءبىر ۇلت وكىلى ءبىلۋى ءتيىس ەكەنىن ايتۋدا.

«بۇگىندە ءبىز قازاق جەرىنە، حالقىنا العىسىمىزدى جەتكىزەمىز. سەبەبى، باسىمىزعا كۇن تۋعان شاقتا بىزگە قولداۋ كورسەتىپ، ءبىر ءۇزىم نانىمەن ءبولىستى. ءبىز سونىڭ ارقاسىندا امان قالدىق، قازىردە ءوزىمىزدىڭ مادەنيەتىمىزدى، سالتىمىزدى دامىتۋعا مۇمكىندىك الىپ وتىرمىز»، - دەپ تۇيىندەدى گ. ياندييەۆ.

ايتا كەتەيىك، وتكەن 20 - عاسىردىڭ 30-جىلدارىنىڭ باسىندا تەك قانا اقمولا وبلىسىنا 30 مىڭنان اسا حالىق جەر اۋدارىلدى. ولاردىڭ قاتارىندا شەشەن-ينگۋش ۇلتىنىڭ وكىلدەرى دە بار. كەيىن 1944-جىلدىڭ باسىندا ك س ر و قىزىل ارمياسى ۆايناحتاردى ورتا ازيا مەن قازاقستانعا قونىس اۋدارۋ جوسپارىن جۇزەگە اسىرا باستايدى. بيىل شەشەن جانە ينگۋشتاردىڭ تاريحي وتانىنان قاسيەتتى قازاق جەرىنە كەلگەنىنە 80 جىل تولادى. بۇگىندە تەك قانا اقمولا وبلىسى اۋماعىندا 10 مىڭعا جۋىق شەشەن-ينگۋش ۇلتىنىڭ وكىلدەرى تاتۋ-ءتاتتى ءومىر ءسۇرىپ، ءوز تىلدەرى مەن مادەنيەتىن ساقتاۋ مۇمكىندىگىنە يە بولىپ وتىر.

اۆتور

اسلان وسپانوۆ